ການຝຶກຊ້ອມຕົວຈິງວຽກງານກູ້ໄພສຸກເສີນຄັ້ງນີ້, ບັນດາອາສະໝັກໄດ້ຮຽນຮູ້ວຽກງານກູ້ໄພສຸກເສີນທາງບົກ, ທາງນໍ້າ, ການມອດໄຟ, ການຊ່ວຍຄົນຕົກນໍ້າ, ຍົກຍ້າຍ, ການປະຖົມພະຍາບານຜູ້ບາດເຈັບ, ການຊ່ວຍເຫລືອບັນເທົາທຸກສຸກເສີນ ແລະວຽກງານສຸຂະພິບານ ເວລາມີເຫດສຸກເສີນ.

 

ການຝຶກຊ້ອມຄັ້ງນີ້ ຈັດຂຶ້ນເປັນປີທີ 2 ໂດຍໄດ້ຮັບການສະໜັບສະໜູນ ຈາກອົງການກາແດງສະວິດສ໌ 48 ລ້ານກີບ ປະກອບມີ 4 ພາກສ່ວນເຂົ້າຮ່ວມຄື: ອົງການກາແດງແຂວງຫລວງພະບາງ, ແຂວງໄຊຍະບູລີ, ແຂວງອຸດົມໄຊ, ກອງເລຂາຄະນະກຳມະການ ຄຸ້ມຄອງໄພພິບັດຂັ້ນແຂວງ, ຕຳຫລວດດັບເພີງ, ກອງບັນຊາການທະຫານແຂວງ ລວມທັງໝົດ 101 ຄົນ ຍິງ 35 ຄົນ, ຊຶ່ງໄດ້ຮັບການຊີ້ນຳ ແລະ ຝຶກຕົວຈິງ ຈາກທີມງານວິຊາການ ພະແນກການແພດສຸກເສີນ ແລະ ພະແນກຄຸ້ມຄອງໄພພິບັດ ອົງການກາແດງແຫ່ງຊາດລາວ ໂດຍຖືເອົາການກູ້ໄພທາງນໍ້າ-ທາງບົກເປັນຫລັກ ແລະ ຖືເອົາບັນດາເຫດການ ທີ່ມັກຈະເກີດຂຶ້ນຢູ່ແຂວງຫລວງພະບາງ ເປັນຕົ້ນປະກົດການນໍ້າປ່າໄຫລຊຸ, ໄຟໄໝ້ລົດຕົກເຫວ ທີ່ມີຄົນຕິດຢູ່ພາຍໃນລົດ ແລະການຊ່ວຍເຫລືອບັນເທົາທຸກ ກໍຄື ວຽກງານສຸຂະພິບານ ໃນເຫດການສຸກເສີນ.

 

ໂອກາດນີ້, ຜູ້ເຂົ້າຮ່ວມໄດ້ຮັບຊົມການຝຶກຊ້ອມເປັນຕົ້ນການຊອກຫາ ແລະຊ່ວຍເຫລືອປະຊາຊົນເວລາມີເຫດການນໍ້າປ່າໄຫລຊຸ, ການເຄື່ອນຍ້າຍປະຊາຊົນ ແລະ ຄົນເຈັບ ໄປສະຖານທີ່ປອດໄພ, ການດຳເນີນການມອດໄຟ ກໍລະມີມີເຫດການໄຟໄໝ້ເຮືອນ, ການສາທິດມອດໄຟທີ່ເກີດຂຶ້ນກັບຖັງແກັສ, ການມອດໄຟໄໝ້ທີ່ໃຊ້ກຳລັງຄົນ, ການຊ່ວຍເຫລືອຄົນເຈັບຕິດຄ້າງໃນລົດເວລາເກີດອຸບັດເຫດໂດຍການນຳໃຊ້ເຄື່ອງຕັດຖ່າງ, ການຕັ້ງຈຸດບໍລິການບຳບັດນໍ້າເປື້ອນເພື່ອຊ່ວຍເຫລືອປະຊາຊົນເວລາມີເຫດການນໍ້າຖ້ວມ, ຊຶ່ງການຝຶກຊ້ອມຄັ້ງນີ້, ສາມາດຮັບປະກັນຄວາມປອດໄພ ແລະບັນລຸຜົນສຳເລັດໄດ້ເປັນຢ່າງດີ.