ສໍາເລັດເກືອບ 40% ໂຄງການກໍ່ສ້າງຫໍພິພິທະພັນກອງເຂົ້າໃຫຍ່ເມືອງພຽງ

ກອງປະຊຸມຊຸກຍູ້ໂຄງການກໍ່ສ້າງຫໍພິພິທະພັນກອງເຂົ້າໃຫຍ່ເມືອງພຽງ ແຂວງໄຊຍະບູລີໄດ້ຈັດຂື້ນໃນວັນທີ 1 ສິງຫາ 2024 ຢູ່ທີ່ຫ້ອງປະຊຸມຂອງເມືອງໂດຍການເປັນກຽດເຂົ້າຮ່ວມຂອງທ່ານ ນາງ ແສງອາພອນ ແກ້ວບົວໂຮມ ຮອງເລຂາພັກເມືອງ ປະທານກວດກາພັກຫົວໜ້າກວດກາລັດເມືອງ, ມີບັນດາຄະນະຮັບຜິດຊອບຊຸກຍູ້ໂຄງການກໍ່ສ້າງຫໍພິພິທະພັນກອງເຂົ້າໃຫຍ່, ຕາງໜ້າບໍລິສັດພຸດລືໄຊ ກໍ່ສ້າງເຄຫະສະຖານ ຜູ້ຮັບເໝົາກໍ່ສ້າງຫໍພິພິທະພັນກອງເຂົ້າໃຫຍ່ພ້ອມດ້ວຍພະນັກງານຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງເຂົ້າຮ່ວມ.

ໃນກອງປະຊຸມ ຜູ້ຕາງໜ້າບໍລິສັດພຸດລືໄຊໄດ້ລາຍງານການຈັດຕັ້ງປະຕິບັດການກໍ່ສ້າງຫໍພິພິທະພັນດັ່ງກ່າວ. ເຊິ່ງໂຄງການກໍ່ສ້າງຫໍພິພິທະພັນກອງເຂົ້າໃຫຍ່ແມ່ນໄດ້ເລີມລົງມື້ກໍ່ສ້າງມາແຕ່ ເດືອນ ພະຈິກ 2021 ເປັນຕົ້ນມາ ໂດຍແມ່ນ ບໍລິສັດພຸດລືໄຊ ເປັນຜູ້ຮັບເໝົາກໍ່ສ້າງ ເຊິ່ງມີກອງເຂົ້າໃຫຍ່ 1 ກອງ ກວ້າງ 24 ແມັດ, ສູງ 29 ແມັດ, ມີກອງເຂົ້ານ້ອຍ 8 ກອງ ກວ້າງ 7 ແມັດ, ສູງ 8 ແມັດ ລວມມູນຄ່າໃນການກໍ່ສ້າງທັງໝົດ 8 ຕື້ກວ່າກີບ ເຊິ່ງມາຮອດປັດຈຸບັນແມ່ນສຳເລັດເກືອບ 40 ສ່ວນຮ້ອຍໂດຍກອງປະຊຸມໃນຄັ້ງນີ້ແມ່ນໄດ້ຕົກລົງເຫັນດີໃຫ້ບໍລິສັດພຸດລືໄຊສືບຕໍ່ປະຕິບັດໜ້າວຽກຄື: ເທຄານຊັ້ນສອງ, ປູພື້ນຊັ້ນສອງ, ຖອກເສົາຊັ້ນສອງ, ກໍ່ສ້າງລານກອງເຂົ້າພ້ອມທັງຖົມດີນ ແລະ ເທພື້ນກອງເຂົ້ານ້ອຍໃຫ້ສຳເລັດໃນທ້າຍປີ 2024 ນີ້ເພຶ່ອກຽມຄວາມພ້ອມໃນການຈັດງານເທສະການບຸນກອງເຂົ້າໃຫຍ່ທັງເປັນການສ້າງຂະບວນການຂ່ຳນັບຮັບຕ້ອນກອງປະຊຸມໃຫຍ່ຂອງອົງຄະນະພັກເມືອງພຽງທີ່ຈະໄຂຂື້ນໃນຕໍ່ໜ້ານີ້ໃຫ້ເປັນຂະບວນການຟົດຟື້ນ.

ຂ່າວໂດຍ: ວົງສະຫວັນ ສຸທິໂວຫານ

แชร์