ໄຊຍະບູລີ ມີອາຊະຍາກໍາອາຍາເກີດຂຶ້ນ102 ລາຍ ເສຍຊີວິດ 6 ຄົນ

ສະພາບການເຄື່ອນໄຫວຂອງກຸ່ມຄົນບໍ່ດີຢູ່ລຽບຊາຍແດນ ໂດຍສະເພາະສະພາບຄວາມບໍ່ເປັນລະບຽບຮຽບຮ້ອຍໃນສັງຄົມ, ໃນໄລຍະ 6 ເດືອນຜ່ານມາ ແຂວງໄຊຍະບູລີ ມີອາຊະຍາກໍາອາຍາເກີດຂຶ້ນທັງໝົດ 102 ລາຍ (ບໍ່ນັບຄະດີຢາເສບຕິດ) ໃນນັ້ນ, ພົ້ນເດັ່ນແມ່ນຄະດີລັກຊັບພົນລະເມືອງມີ 55 ລາຍ, ຊຶ່ງສົ່ງຜົນເສຍຫາຍຕໍ່ສັງຄົມເຮັດໃຫ້ມີຄົນເສຍຊີວິດ 6 ຄົນ, ເຈັບສາຫັດ 4 ຄົນ, ບາດເຈັບສົມຄວນ 3 ຄົນ, ເງິນກີບ 1 ຕື້ກວ່າກີບ, ບາດ 3 ແສນກວ່າບາດ, ຄໍາຮູບປະພັນ 1 ບາດ 2 ສະຫລຶງ, ລົດກະບະແດຫັນ 1 ຄັນ, ລົດວີໂກ 1 ຄັນ, ລົດຈັກ 27 ຄັນ, ຕູບຂາຍເຄື່ອງ 1 ຫລັງ, ງົວ-ຄວາຍ 7 ໂຕ, ສາຍໄຟຟ້າເຍືອງທາງ 125 ແມັດ, ຖຽງນາ 1 ຫລັງ, ເຂົ້າເປືອກ 10 ກະສອບ ແລະ ໄກ່ 12 ໂຕ.

ທ່ານ ພັນເອກ ສຸກສົມພອນ ທອງຄໍາ ຫົວໜ້າ ຫ້ອງການ ປ້ອງກັນຊາດ-ປ້ອງກັນຄວາມສະຫງົບແຂວງໄຊຍະບູລີ ໄດ້ລາຍງານໃນກອງປະຊຸມ ສະຫລຸບວຽກງານປ້ອງກັນຊາດ-ປ້ອງກັນຄວາມສະຫງົບ ປະຈໍາ 6 ເດືອນຕົ້ນປີ 2024 ເມື່ອບໍ່ດົນມານີ້ວ່າ: ສໍາລັບວຽກງານສະກັດກັ້ນ ແລະ ແກ້ໄຂບັນຫາຢາເສບຕິດ ແມ່ນໄດ້ສຸມໃສ່ດໍາເນີນການປາບປາມແກ້ໄຂຕໍ່ບຸກຄົນທີ່ຄ້າ-ຂາຍຢາເສບຕິດໄດ້ 72 ລາຍ, ກັກຜູ້ກະທໍາຜິດ 119 ຄົນ, ຍຶດຂອງກາງໄດ້ ຢາບ້າ 80.549 ເມັດ, ຢາໄອ້ KKK-1000 ນໍ້າໜັກ 1.033 ກິໂລກຣາມ, ເງິນກີບ 600 ກວ່າລ້ານ, ເງິນບາດ 49 ພັນກວ່າບາດ, ເງິນຢວນ 110 ຢວນ, ລົດ 6 ລໍ້ 1 ຄັນ, ລົດກະບະຮຸນໄດ 1 ຄັນ, ລົດຈັກ 18 ຄັນ, ປືນລົມ 1 ກະບອກ, ລູກປືນອາກາ 10 ລູກ, ລູກປືນກາມ້າ 9 ລູກ, ແກ໋ບໝາກຟ່າ 3 ດອກ, ໝາກຟ່າ 20 ກ້ອນ, ໂຟນີ 2 ເຄື່ອງ, ໝໍ້ຊ໋ອດປາ 2 ເຄື່ອງ, ປຶ້ມບັນຊີເງິນຝາກປະຍັດ 2 ຫົວ, ບັດເອທີເອັມ 2 ບັດ, ພັດສະປອດ 5 ຫົວ, ໂທລະສັບມືຖື 32 ເຄື່ອງ, ໃບກະທ່ອມ 1,5 ກິໂລກຣາມ ພ້ອມດ້ວຍຫົວເຊື້ອ 349 ຂວດ ແລະ ປືນສັ້ນ 1 ກະບອກ ດັດແປງ 5 ກະບອກ.

ຂ່າວ-ພາບ: ອຸ່ນເຮືອນ ໂພທິລັກ

แชร์