ອຸດົມໄຊ ປະຕິບັດ 4 ມາດຕະການໃນການຄວບຄຸມ ແລະຄຸ້ມຄອງລາຄາສິນຄ້າ

ໃນ 6 ເດືອນຕົ້ນປີ 2024 ຂະແໜງອຸດສະຫະກຳ ແລະ ການຄ້າ ໃນນາມກອງເລຂາຄະນະຄຸ້ມຄອງລາຄາສິນຄ້າ ແລະ ຄ່າບໍລິການຂັ້ນແຂວງ ໄດ້ສົມທົບກັບຂະແໜງການຕ່າງໆທີ່ກ່ຽວຂ້ອງ ກຳນົດໂຄງປະກອບລາຄາສິນຄ້າໃນບັນຊີຄວບຄຸມໂດຍສະເພາະແມ່ນປະເພດເຂົ້າກິນ, ຊີ້ນປາອາຫານ, ສົ່ງເສີມການຜະລິດຢູ່ພາຍໃນໃຫ້ແຂງແຮງ ເພື່ອສາມາດສະໜອງຕາມຄວາມຕ້ອງການຢູ່ພາຍໃນ ແລະ ເປັນສິນຄ້າເພື່ອສົ່ງອອກ (ພືດຜັກ) ແລະ ເຮັດບົດບາດໃນການດຸ່ນດ່ຽງຈາກບັນດາແຂວງໃກ້ຄຽງເພື່ອຫລຸດຜ່ອນການນໍາເຂົ້າຈາກຕ່າງປະເທດ ແລະ ເພື່ອເຮັດໃຫ້ຮັບປະກັນການຊື້-ຂາຍເຕັມກິໂລ ໄດ້ມີການລົງຕິດຕາມລາຄາສິນຄ້າແລະການຊັ່ງຜອງໃນທ້ອງຕະຫຼາດເປັນປົກກະຕິ.

ທ່ານ ນາງ ໄມພອນ ສີລິວົງ ຫົວໜ້າພະແນກອຸດສະຫະກຳ ແລະ ການຄ້າແຂວງ ອຸດົມໄຊ ໄດ້ໃຫ້ສຳພາດຕໍ່ສື່ມວນຊົນວ່າ: ແຂວງ ອຸດົມໄຊ ໄດ້ສຸມໃສ່ຄຸ້ມຄອງ ລາຄາສິນຄ້າ, ຄຸ້ມຄອງເງິນຕາ ຢ່າງເປັນປົກກະຕິຕໍ່ເນື່ອງ ໂດຍສະເພາະແມ່ນ ສິນຄ້າທີ່ມີຜົນກະທົບໄວຕໍ່ການດໍາລົງຊີວິດປະຈໍາວັນ, ໄດ້ເອົາໃຈໃສ່ປົກປ້ອງຜູ້ບໍລິໂພກເຊັ່ນ: ການຕີລາຄາ ສິນຄ້າເປັນເງິນກີບ, ການປັບປຸງມາດຕະຖານຊິງຊັ່ງ ອັນພົ້ນເດັ່ນ ແມ່ນການປະຕິບັດມາດຕະການຕໍ່ຜູ້ນໍາ ເຂົ້າສິນຄ້າເກືອດຫ້າມ ໄດ້ຫລາຍຄັ້ງ ເຊິ່ງສາມາດຍຶດໄດ້ສິນຄ້າປະເພດພຶດຜັກ, ຊິ້ນສ່ວນສັດ ເປັນຈຳນວນ ແລະ ມີມູນຄ່າຫລວງຫລາຍ. ການເຄື່ອນໄຫວແກ້ໄຂສະພາບລາຄາສິນຄ້າ ແລະ ບັນຫາສະກັດກັ້ນການນຳເຂົ້າສິນຄ້ານອກລະບົບ ແລະບັນຫາອື່ນໆ ແມ່ນໄດ້ຈັດຕັ້ງປະຕິບັດ 4 ມາດຕະການຄື: ມາດຕະການຄຸ້ມຄອງລາຄາສິນຄ້າ, ລາຄານ້ຳມັນເຊື້ອໄຟ ແລະການຊັ່ງຜອງ; ມາດຕະການຄຸ້ມຄອງການນຳເຂົ້າ-ສົ່ງອອກ ອຳນວຍຄວາມສະດວກດ້ານການຄ້າ,ການຂົນສົ່ງ ແລະສະກັດກັ້ນການນຳເຂົ້າສິນຄ້ານອກລະບົບ; ມາດຕະການສົ່ງເສີມການຜະລິດເພື່ອທົດແທນການນຳເຂົ້າ ແລະການສົ່ງເສີມການນຳໃຊ້ຜະລິດຕະພັນລາວ; ມາດຕະການໂຄສະນາເຜີຍແຜ່ບັນດານິຕິກຳ-ນະໂຍບາຍ ແລະການແກ້ໄຂບັນຫາທີ່ເກີດຂື້ນ ແລະ ບັນຫາອື່ນໆ.

ໃນ 6 ເດືອນຕົ້ນປີນີ້ ມູນຄ່າການຄ້າກັບຕ່າງປະເທດປະຕິບັດໄດ້ 3,783.92 ຕື້ກີບ ໃນນີ້ ມູນຄ່າການນໍາເຂົ້າ ປະຕິບັດໄດ້ 227.54 ຕື້ກີບ ແລະ ມູນຄ່າການສົ່ງອອກປະຕິບັດໄດ້ 3,556.37 ຕື້ກີບ. ແຈ້ງໃຫ້ບັນດາຫົວໜ່ວຍທຸລະກິດທີ່ເຮັດກິດຈະກຳການນຳເຂົ້າ-ສົ່ງອອກສິນຄ້າຂື້ນທະບຽນຜູ້ນຳເຂົ້າ-ສົ່ງອອກນຳກະຊວງອຸດສະຫະກຳແລະການຄ້າ ແລະ ຕ້ອງໄປເປີດບັນຊີສະເພາະເຮັດທຸລະກຳການນຳເຂົ້າແລະສົ່ງອອກສິນຄ້າຜ່ານທະນາຄານສຳລັບຢູ່ແຂວງອຸດົມໄຊມີຫົວໜ່ວຍທຸລະກິດທັງໝົດ 118 ຫົວໜ່ວຍ ມາຂື້ນທະບຽນ 79 ຫົວໜ່ວຍ ໃນນັ້ນມີທຸລະກິດເຮັດການນຳເຂົ້າ 10 ຫົວໜ່ວຍ, ສົ່ງອອກ 25 ຫົວໜ່ວຍ ແລະ ນຳເຂົ້າ-ສົ່ງອອກ 44 ຫົວໜ່ວຍ ເທົ່າກັບ 65.25%, ຕິດຕາມການດຳເນີນທຸລະກິດຂອງຜູ້ປະກອບການນຳເຂົ້າ-ສົ່ງອອກເພື່ອສະກັດກັ້ນການນຳເຂົ້າທີ່ບໍ່ຖືກລະບຽບ ແລະ ສິນຄ້ານອກລະບົບ. ກວດກາພົບເຫັນການສົ່ງອອກສິນຄ້າຫລົບໜີ, ການປະກອບເອກະສານ ແລະ ປອມແປງລາຍເຊັນຫລົບໜີການເສຍພັນທະອາກອນ ມີ 1 ຫົວໜ່ວຍ, ແລະ ລັກນຳເຂົ້າສິນຄ້າທີ່ບໍ່ຖືກຕ້ອງ ບໍ່ມີເອກະສານ 15 ຄັ້ງມີ 6 ຫົວໜ່ວຍ. ຕິດຕາມກວດກາສິນຄ້າວາງຂາຍຕາມທ້ອງຕະຫລາດ ບໍ່ຕິດສະຫຼາກເປັນພາສາລາວ, ສິນຄ້າໝົດອາຍຸການນຳໃຊ້ ແລະ ສິນຄ້າປອມແປງລິຂະສິດ ຢ່າງເປັນປົກະຕິໃນນີ້ໄດ້ກວດກາພົບເຫັນ ແລະກວດຍຶດໄດ້ສິນຄ້າປະເພດພືດຜັກ, ຊີ້ນແຊ່ແຂງ, ເຄື່ອງທະເລ, ຄື່ອງດື່ມ, ຢາສູບ, ປະເພດອາຫານແຫ້ງ ຈຳນວນ 19 ລາຍການ ເປັນມູນຄ້າ 755 ລ້ານກວ່າກີບ ແລະໄດ້ນໍາໄປທໍາລາຍຖີ້ມຕາມລະບຽບການພ້ອມທັງໄດ້ເຮັດບົດບັນທຶກກ່າວເຕືອນ, ສຶກສາອົບຮົມຜູ້ປະກອບການ.

ໂດຍ: ຄຳພູສະຫວັນ ເພັນສະຫວັດ

แชร์