ປກສ ແຂວງບໍລິຄຳໄຊຢຶດຢາໄອສ໌ 1,449 ກິໂລກຼາມ

ໃນຕົ້ນເດືອນກໍລະກົດ 2024 ໄດ້ມີຂໍ້ມູນແຫຼ່ງຂ່າວທີ່ອ້າງອີງໄດ້ວ່າ: ມີກຸ່ມຄົນຈຳນວນໜຶ່ງໄດ້ເຄື່ອນໄຫວຄ້າ-ຂາຍ ແລະ ຂົນສົ່ງຢາເສບຕິດຈໍານວນ ຫຼາຍຈາກນະຄອນຫຼວງວຽງຈັນຜ່ານເສັ້ນທາງ 13 ໃຕ້ ໄປສູ່ເມືອງ ຄຳເກີດ ແຂວງບໍລິຄຳໄຊ ເພື່ອສົ່ງອອກສູ່ປະເທດໄກ້ຄຽງ, ຈາກນັ້ນເຈົ້າໜ້າທີ່ວິຊາສະເພາະໄດ້ຕິດຕໍ່ປະສານສົມທົບພາກສ່ວນວິຊາສະເພາະທີ່ປະຈຳຈຸດກວດກາ, ເພື່ອ ຕິດຕາມເປົ້າໝາຍສົງໄສ ຈົນສາມາດຮູ້ໄດ້ການເຄື່ອນໄຫວ ແລະ ພົບເຫັນ ກຸ່ມເປົ້າໝາຍທີ່ພວມຈະຂົນສົ່ງຢາເສບຕິດອອກໄປຂາຍຢູ່ຕ່າງປະເທດ ໂດຍອາໄສຂົນສົ່ງຜ່ານເສັ້ນທາງຫຼວງອອກສູ່ຊາຍແດນໄປຍັງປະເທດໄກ້ຄຽງ, ຜ່ານການເກັບກຳຂໍ້ມູນ, ກວດກາພິສູດແຫຼ່ງຂ່າວທີ່ໄດ້ຮັບມາ ເຫັນວ່າຈະມີການເຄື່ອນໄຫວທີ່ຜິດກົດໝາຍ. ຕໍ່ກັບສະພາບການດັ່ງກ່າວໜ່ວຍງານວິຊາສະເພາະຈຶ່ງລາຍງານຕໍ່ຄະນະບັນຊາ ສ້າງເປັນລາຍຄະດີສະເພາະ ຮ່ວມກັບຕຳຫຼວດວິຊາສະເພາະທີ່ປະຈຳຈຸດກວດກາຕ່າງໆ; ຜ່ານການຈັດຕັ້ງປະຕິບັດ ຂອງເຈົ້າໜ້າທີ່ ຕິດຕາມບັນດາເປົ້າໝາຍຕ້ອງສົງໄສ ຈົນມາຮອດເວລາ 01 ໂມງເຊົ້າ ຂອງວັນທີ 29 ກໍລະກົດ 2024 ຈຶ່ງພົບເຫັນລົດບັນທຸກ 22 ລໍ້, ສີແດງ, ຍີ່ຫໍ້ ໂຮໂວ ໝາຍເລກທະບຽນ ບຄ 2577 ກຳແພງນະຄອນ, ເຊິ່ງມີລົດຟໍຈູເນີ ສີຂາວ, ໝາຍເລກທະບຽນ ກນ 9424 ກຳແພງນະຄອນ, ທີ່ຂັບຂີ່ມາກ່ອນ ເພື່ອສັງເກດການປະຕິບັດວຽກງານຂອງເຈົ້າໜ້າທີ່, ພໍມາຮອດຈຸດກວດກາຢາເສບຕິດເຂດບ້ານ ນາໄຊ ເມືອງ ທ່າພະບາດ ແຂວງບໍລິຄຳໄຊ, ເຈົ້າໜ້າທີ່ວິຊາ ສະເພາະຈຶ່ງໄດ້ອອກຄໍາສັ່ງ ໃຫ້ພາຫະນະຢຸດຈອດ ແລ້ວເຫັນນັກຂັບຂີ່ມີສີໜ້າທ່າທາງຜິດປົກກະຕິ, ບໍ່ໃຫ້ຄວາມຮ່ວມມືກັບເຈົ້າໜ້າທີ່, ຈຶ່ງໄດ້ເຂົ້າກວດກາ ພົບເຫັນຂອງກາງປະເພດ ຢາເສບຕິດບັນຈຸມາເຕັມກະບະລົດ, ພ້ອມນັ້ນກໍ່ໄດ້ກັກຕົວຜູ້ຮ່ວມຂະບວນການ ທັງໝົດ 03 ຄົນ, ມາສືບສວນ-ສອບສວນ ໃນເບື້ອງຕົ້ນຮູ້ວ່າ: ຊື່ ທ້າວ ຊໍ່ມົວ, ອາຍຸ 43 ປີ, ທ້າວ ຕູ້ຢ່າງ, ອາຍຸ 23 ປີ ທັງສອງຢູ່ບ້ານ ວັງເຮືອ, ເມືອງທຸລະຄົມ, ແຂວງວຽງຈັນ ແລະ ທ້າວ ກູ້ຊົ່ງ, ອາຍຸ 29 ປີ, ບ້ານ ພູຄຳ, ເມືອງ ບໍລິຄັນ, ແຂວງບໍລິຄຳໄຊ, ພົບເຫັນຂອງກາງສິ່ງເສບຕິດປະເພດຢາໄອສ໌ ຈໍານວນ 44 ເປົາ, 1,449 ຫໍ່, ນໍ້າໜັກ 1,449 ກິໂລກຼາມ, ຢູ່ເທິງລົດບັນທຸກ 22 ລໍ້, ສີແດງ, ຄັນດັ່ງກ່າວ, ດັ່ງນັ້ນ, ເຈົ້າໜ້າທີ່ຈຶ່ງໄດ້ກັກຕົວພວກກ່ຽວ ພ້ອມຂອງກາງຢາເສບຕິດຈໍານວນດັ່ງກ່າວມາສືບສວນ-ສອບສວນ ຕາມຂັ້ນຕອນລະບຽບກົດໝາຍ.
ປັດຈຸບັນນີ້ ເຈົ້າໜ້າທີ່ວິຊາສະເພາະກຳລັງເລັ່ງດຳເນີນການສືບສວນ-ສອບສວນຂະຫຍາຍຜົນເພີ່ມເຕີມ ແລະ ສະຫຼຸບສົ່ງສຳນວນ-ສຳເນົາສັ່ງຟ້ອງຕາມຂະບວນການຍຸຕິທຳທີ່ກຳນົດໄວ້.

แชร์