ຮອດທ້າຍເດືອນກໍລະກົດ ພາສີແຂວງຄຳມ່ວນ ເກັບລາຍຮັບໄດ້ 661.03 ຕື້ກີບ

ວັນທີ 30 ກໍລະກົດ 2024 ຢູ່ທີ່ຫ້ອງປະຊຸມຂອງພະແນກການເງິນແຂວງຄໍາມ່ວນ ໄດ້ຈັດກອງປະຊຸມສະຫຼຸບວຽກງານ 06 ເດືອນ ຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ຂອງວຽກງານພາສີປະຈໍາແຂວງຄຳມ່ວນ ໂດຍການເປັນປະທານຂອງທ່ານ ພູເມືອງ ແກ້ວຈັນທະລາ ຫົວໜ້າພາສີປະຈຳແຂວງ, ມີບັນດາທ່ານໃນຄະນະພາສີປະຈຳແຂວງ, ຄະນະດ່ານພາສີສາກົນຂົວມິດຕະພາບ 3, ດ່ານພາສີສາກົນນາເພົ້າ, ຄະນະດ່ານທ້ອງຖິ່ນ, ດ່ານປະເພນີ ແລະ ຂະແໜງການທີ່ຂຶ້ນກັບພາສີປະຈຳແຂວງເຂົ້າຮ່ວມ.

ທ່ານ ວີລະປະຊາ ຫຼວງອາມາດ ຮອງຫົວໜ້າພາສີປະຈຳແຂວງ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານພາສີປະຈຳ 06 ເດືອນຕົ້ນປີ 2024 ແລະ ການກໍານົດທິດທາງແຜນການ, ມາດຕະການໃນຕໍ່ໜ້າວ່າ: ໃນປີ 2024 ພາສີປະຈໍາແຂວງ ພ້ອມດ້ວຍຄະນະພັກ, ຄະນະນໍາຂອງດ່ານພາສີຊາຍແດນ ໄດ້ສຸມໃສ່ຫັນປ່ຽນ, ປະຕິຮູບວຽກງານໃນຂັ້ນຂອງຕົນໃຫ້ທັນກັບສະພາບການ ໂດຍເພີ່ມທະວີເອົາໃຈໃສ່ຕ້ານການຮົ່ວໄຫຼລາຍຮັບງົບປະມານຕາມຄໍາສັ່ງ ສະບັບເລກທີ 18/ນຍ ລົງວັນທີ 16 ກັນຍາ 2021, ເອົາໃຈໃສ່ໃນດ້ານມູນຄ່າແຈ້ງພາສີ ແລະ ສ້າງສິ່ງອໍານວຍຄວາມສະດວກ ແລະ ຄຸ້ມຄອງ ໃນການນໍາເຂົ້າ-ສົ່ງອອກຂອງບັນດາໂຄງການລົງທຶນຕ່າງໆ, ໄດ້ຫັນເປັນລະບົບທີ່ທັນສະໄໝເຂົ້າໃນການຄຸ້ມຄອງການຈັດເກັບລາຍຮັບ ເປັນຕົ້ນແມ່ນບັນດາລະບົບທີ່ກະຊວງການເງິນ, ກົມພາສີ ໄດ້ພັດທະນາ ແລະ ນຳໃຊ້ຕົວຈິງ. ປະຈຸບັນສາມາດເວົ້າໄດ້ວ່າໃນຂົງເຂດພາສີພວກເຮົາບໍ່ໄດ້ເກັບລາຍຮັບເປັນເງິນສົດແລ້ວ ຈາກການນຳໃຊ້ລະບົບທີ່ທັນສະໄໝນີ້ ໄດ້ສ້າງເງື່ອນໄຂອຳນວຍຄວາມສະດວກໃຫ້ແກ່ຜູ້ປະກອບການໃນການແຈ້ງມອບພັນທະດ້ານພາສີ ທັງຮັບປະກັນຕໍ່ການຮົ່ວໄຫຼ ແລະ ການຕົກເຮ່ຍເສຍຫາຍ, ສະເພາະປີ 2024 ພາສີປະຈໍາແຂວງຄໍາມ່ວນ ໄດ້ຮັບມອບໝາຍຕົວເລກແຜນລາຍຮັບຈາກກົມພາສີ ກະຊວງການເງິນຈໍານວນ 1.045 ຕື້ກີບ (ເຊິ່ງແຜນການຈັດຕັ້ງປະຕິບັດໃນ 06 ເດືອນ ປີ 2024 ເທົ່າກັບ 522.50 ຕື້ກີບ), ຜ່ານການຈັດຕັ້ງປະຕິບັດຕົວຈິງໃນ 06 ເດືອນ ສາມາດປະຕິບັດໄດ້ 584.81 ຕື້ກີບ ເທົ່າກັບ 111.93% ຂອງແຜນການ 06 ເດືອນ ແລະ ມາຮອດວັນທີ 29 ກໍລະກົດ 2024 ສາມາດຈັດຕັ້ງປະຕິບັດການຈັດເກັບລາຍຮັບໄດ້ 661.03 ຕື້ກີບ ເທົ່າກັບ 63.26% ຂອງແຜນການປີ. ໃນນັ້ນລາຍຮັບຈາກໝວດສິນຄ້າຕົ້ນຕໍ ທີ່ພາໃຫ້ການຈັດເກັບລາຍຮັບໄດ້ລື່ນແຜນ ປະກອບມີ: ປະເພດ ນໍ້າມັນເຊື້ອໄຟ, ພາສີຂາອອກ, ອາໄຫຼ່, ສິນຄ້ານຳເຂົ້າເພື່ອສົ່ງອອກຕໍ່, ຄ່າທຳນຽມຕ່າງໆ, ປະເພດ ສິນຄ້າຕາມສັນຍາອາຊ່ຽນ ແລະ ອື່ນໆ.
ສໍາລັບແຜນການ ແລະ ມາດຕະການ ຈັດເກັບລາຍຮັບໃນ 06 ເດືອນທ້າຍ ປີ 2024 ເພື່ອເຮັດໃຫ້ການເຄື່ອນໄຫວການຈັດເກັບລາຍຮັບໃຫ້ໄປຕາມແຜນທີ່ວາງໄວ້ ພາສີປະຈໍາແຂວງ ຄຳມ່ວນ ໄດ້ກຳນົດມາດຕະການຈຳນວນໜຶ່ງເປັນວຽກງານຈຸກສຸມ ເພື່ອຈັດຕັ້ງປະຕິບັດຄື: ເອົາໃຈໃສ່ສຶກສາອົບຮົມ ດ້ານການເມືອງ-ແນວຄິດ ໃຫ້ສະມາຊິກພັກ-ພະນັກງານທີ່ຢູ່ໃນຄວາມຮັບຜິດຊອບ ຂອງຕົນຢ່າງເປັນປົກກະຕິ, ທົ່ວເຖິງ ແລະ ເຮັດຕໍ່ເນື່ອງ, ສຸມໃສ່ໃນການຍົກລະດັບຄວາມຮູ້, ຄວາມສາມາດຂອງພະນັກງານໃຫ້ມີການຝຶກອົບຮົມຕາມຫລັກສູດວິຊາສະເພາະໃນວຽກງານພາສີ ຕາມແຜນພັດທະນາບຸກຄະລາກອນຂອງກົມພາສີໃນແຕ່ລະໄລຍະ, ຄົ້ນຄວ້າ, ສັບຊ້ອນ, ໝູນວຽນ ພະນັກງານຈໍານວນໜຶ່ງ ເພື່ອຮັບປະກັນໃນການຈັດຕັ້ງປະຕິບັດວຽກງານວິຊາສະເພາະຢູ່ລັດຖະການພາສີແຕ່ລະຈຸດ ໃຫ້ມີປະສິດທິພາບ ແລະ ປະສິດທິຜົນ, ຍົກສູງຄວາມຮັບຜິດຊອບໃນການຕິບັດໜ້າທີ່, ມີການມອບໝາຍແບ່ງງານຢ່າງລະອຽດ, ຊັດເຈນ, ເອົາໃຈໃສ່ໃນການຕິດຕາມ,ກວດກາ ແລະ ຄຸ້ມຄອງການນຳເຂົ້າ-ສົ່ງອອກ ສິນຄ້າເຄື່ອງຂອງ ຜ່ານດ່ານຊາຍແດນຢ່າງເຂັ້ມງວດ, ເກັບພັນທະໃຫ້ຖືກຕ້ອງ,ຄົບຖ້ວນ ,ທັນກຳນົດເວລາ ແລະ ອື່ນໆ.

แชร์