ການພັດທະນາຂອງລັດຢູ່ແຂວງອັດຕະປື ຍັງມີຂໍ້ຄົງຄ້າງຕ້ອງໄດ້ສຶບຕໍ່ແກ້ໄຂ

ເຖິງວ່າໃນ​ໄລ​ຍະ​ 6 ເດືອນ ຕົ້ນປີ 2024 ຜ່ານ​ມາ​ອົງ​ການ​ປົກ​ຄອງ​ແຂວງອັດຕະປື ໄດ້ສຸ່ມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງລັດ, ແກ້ໄຂຄວາມຫຍຸ້ງຍາກວິກິດການຕ່າງໆ ສາມາດບັນລຸຕາມຄາດໜາຍວາງໄວ້, ເຮັດໃຫ້ແຂວງຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດ ສືບຕໍ່ມີການຂະຫຍາຍຕົວ, ຊີວິດການເປັນຢູ່ ຂອງປະຊາຊົນບັນດາເຜົ່າ ໄດ້ຮັບການຍົກສູງຂຶ້ນຕາມລຳດັບ ແຕ່ຄຽງຄູ່ກັບຜົນ​ສໍາ​ເລັດ ​ແລະດ້ານຕັ້ງໜ້າກໍຍັງມີດ້ານອ່ອນ-ຂໍ້ຄົງຄ້າງຈຳນວນໜຶ່ງ ທີ່​ຈະ​ຕ້ອງ​ໄດ້​ສືບ​ຕໍ່​ແກ້​ໄຂໃນ 6 ເດືອນທ້າຍປີ ເພື່ອຮັບປະກັນໃຫ້ແກ່ການຈັດຕັ້ງ​ປະຕິບັດໃຫ້ໄດ້ຮັບຜົນດີເທື່ອລກ້າວ.

ຕໍ່ບັນຫາ ແລະສະພາບການດັ່ງກ່າວ ທ່ານ ພົທ ວັນທອງ ກອງມະນີ ກຳມະການສູນກາງພັກ ເລຂາຄະນະພັກແຂວງ ເຈົ້າແຂວງອັດຕະປື ໄດ້ຢືນຢັນລາຍງານຕໍ່ກອງປະຊຸມສະພາປະຊາຊົນແຂວງສະໄໝສາມັນ ເທື່ອທີ 7 ທີ່ໄຂຂຶ້ນໃນວັນທີ 30 ກໍລະກົດ 2024 ໃຫ້ຮູ້ວ່າ: ໃນ 6 ເດືອນຜ່ານມາກໍ່ໄດ້ອອກຄໍາສັ່ງວ່າດ້ວຍການຄຸ້ມຄອງບັນຕ່າງໆເປັນຈຳນວນຫຼາຍສະບັບ ເພື່ອແນໃສ່ຄຸ້ມຄອງເສດຖະກິດ -ສັງຄົມຂອງແຂວງເປັນລະບົບ, ສອດຄ່ອງຕາມລະບຽບກົດໝາຍ, ມີຄວາມສະຫງົບເປັນລະບຽບຮຽບຮ້ອຍ ແລະ ຂະຫຍາຍຕົວຕາມແຜນການທີ່ວ່າງໄວ້; ນຳເອົາເນື້ອ​ໃນ​ຈິດ​ໃຈ​ໃໝ່ ທີ່​ອົງ​ການ​ປົກ​ຄອງ​ແຂວງ ໄດ້​ສຸມ​ທຸກຄວາມ​ພະ​ຍາ​ຍາມ, ສະ​ຕິ​ປັນ​ຍາ​ຂອງ​ຕົນເຂົ້າ​ໃນ​ການ​ຈັດ​ຕັ້ງ​ຜັນ​ຂະ​ຫຍາຍ ມະ​ຕິ​ກອງ​ປະ​ຊຸມ​ໃຫຍ່​ຄັ້ງ​ທີ XI ຂອງ​ພັກ ກໍ່​ຄື​ຂອງ​ອົງ​ຄະ​ນະ​ພັກ​ແຂວງທີ່​ບາງ​ອັນ​ກໍ່​ມີ​​ແຜນລະ​ອຽດ​ຕາມ​ຫົວ​ຂໍ້​ຂອງ​​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ, ບາງ​ອັນ​ກໍ່​ເປັນ​ວຽກ​ເຄັ່ງ​ຮ້ອນ​ຮີບ​ດ່​ວນແຕ່ໃນນີ້ ບັນຫາດ່ວນທີ່ສຸດຈະຕ້ອງໄດ້ເອົາໃຈໃສ່ຈັດຕັ້ງ​ປະຕິບັດນັ້ນແມ່ນບັນຫາດ້ານອ່ອນ-ຂໍ້ຄົງຄ້າງບາງຈຳນວນຕ້ອງ​ໄດ້​ສືບ​ຕໍ່​ແກ້​ໄຂດັ່ງນີ້:
1. ການສະໜອງງົບປະມານເຂົ້າ​ໃສ່ການລົງທຶນຂອງລັດ ​ບໍ່ພຽງພໍກັບຄວາມ​ຕ້ອງການ​ພັດທະນາ ເຮັດໃຫ້ໂຄງການຈຳນວນໜຶ່ງ ບໍ່ສາມາດຈັດຕັ້ງປະຕິບັດໄດ້ ແລະ ກ້າວໄປເຖິງການໂຈະຍົກເລີກໂຄງການ, ການແຈ້ງແຜນງົບປະມານການລົງທຶນຊັກຊ້າ ເຮັດໃຫ້ໂຄງການສະເໜີໃໝ່ ໃນປີ 2024 ບໍ່ໄດ້ປະຕິບັດຕາມແຜນ, ລ້າຊ້າແກ່ຍາວ.
2. ການປະຕິບັດວິໄນແຜນການ-ການເງິນ ຂອງບາງຂະແໜງການ ລວມທັງຜູ້ປະກອບການຈຳນວນໜຶ່ງ ຍັງບໍ່ທັນເຂັ້ມງວດ.
3. ການປັບປຸງກົນໄກການປະສານງານ ລະຫວ່າງຂະແໜງການ, ສູນກາງກັບທ້ອງຖິ່ນ ຍັງບໍ່ທັນໂລ່ງລ່ຽນ, ການບໍລິການ ແລະ ສະໜອງຂໍ້ມູນ ຍັງບໍ່ທັນຊັດເຈນ, ຂາດການວິເຄາະ-ວິໄຈທີ່​ດີ.
4. ການຊຸກຍູ້ສົ່ງເສີມການຜະລິດ ທົດແທນການນຳເຂົ້າ ແລະ ເພີ່ມການສົ່ງອອກຍັງບໍ່ທັນມີຫຼາຍ, ການຄຸ້ມຄອງລາຄາສິນຄ້າ ຍັງບໍ່ທັນເຮັດໄດ້ ຈິ່ງເຮັດໃຫ້ລາຄາສິນຄ້າມີທ່າອ່ຽງເພີ່ມຂຶ້ນ.
5. ການສ້າງກໍາລັງແຮງງານທີ່ມີສີມື, ມີຄຸນນະພາບ ຍັງເຮັດໄດ້ໜ້ອຍ, ຍັງບໍ່ສາມາດຕອບສະໜອງກັບຄວາມຮຽກຮ້ອງຕ້ອງການຂອງຕະຫຼາດແຮງງານ.
6. ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ຍັງບໍ່ທັນເຂັ້ມງວດເດັດຂາດ, ລະບອບ-ລະບຽບການເຮັດວຽກ ຂອງກົງຈັກລັດຂັ້ນຕ່າງໆ ເຖິງວ່າໄດ້ຮັບການປັບປຸງ ແຕ່ບໍ່ທັນມີການຫັນ ປ່ຽນຢ່າງແຂງແຮງ.
7. ເຖິງວ່າພວກເຮົາເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ຕາມ 4 ວາລະໃຫຍ່ຂອງແຂວງ ຕິດພັນກັບວາລະແຫ່ງຊາດ ຢ່າງ​ຈິງ​ຈັງ​ສົມ​ຄວນ, ແຕ່​ບັນ​ຫາ​​ຍໍ້​ທໍ້​ຕ່າງໆຍັງເກີດຂຶ້ນເປັນປະຈໍາ.
8. ການຈັດຕັ້ງປະຕິບັດບັນດາຄາດໝາຍ ຫຼື ຕົວ​ຊີ້​ວັດດ້ານ​ການ​ສຶກ​ສາ ​ລວມ​ທັງການ​ແກ້​ໄຂ​ບັນ​ຫາ​ປະ​ລະ​ການ​ຮຽນ, ຂາດ​ຄູ​ສອນ ຍັງເຮັດບໍ່ທັນໄດ້ດີ​ເທົ່າ​ທີ່​ຄວນ.
ໂດຍ: ໄພບູນ

แชร์