ເຊກອງ ມີການລົງທຶນພາກເອກະຊົນ 124 ໂຄງການ

ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານສົ່ງເສີມ ແລະຄຸ້ມຄອງການລົງທຶນເອກະຊົນພາຍໃນ ແລະຕ່າງປະເທດ ໃນວັນທີ 29 ກໍລະກົດ 2024 ທີ່ສະໂມສອນແຂວງ ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງພ້ອມດ້ວຍຂະແໜງການກ່ຽວຂ້ອງຂັ້ນແຂວງ, ຂັ້ນເມືອງ ແລະບັນດາບໍລິສັດການລົງທຶນເຂົ້າຮ່ວມ.

ທ່ານ ສາກົນ ພອນປະເສີດ ຫົວໜ້າພະແນກແຜນການ ແລະການລົງທຶນແຂວງໄດ້ລາຍງານວ່າ: ປັດຈຸບັນທົ່ວແຂວງເຊກອງມີໂຄງການລົງທຶນພາກເອກະຊົນພາຍໃນ ແລະ ຕ່າງປະເທດ (FDI) ທັງໝົດ 124 ໂຄງການ ມູນຄ່າຕາມສັນຍາ 9,547 ລ້ານໂດລາ ແລະ ຄາດຄະເນການຈັດຕັ້ງປະຕິບັດຕົວຈິງປະມານ 3,239 ລ້ານໂດລາ ຫຼືປະມານ 35% ຂອງມູນຄ່າທັງໝົດ. ໃນນີ້, ການລົງທຶນຂອງເອກະຊົນພາຍໃນ 79 ໂຄງການ, ມູນຄ່າ 2,059 ລ້ານໂດລາ ກວມເອົາ 61.62% ແລະ ການລົງທຶນຂອງເອກະຊົນຕ່າງປະເທດ 45 ໂຄງການ ມູນຄ່າ 1,311 ລ້ານໂດລາ ກວມເອົາ 38,37% ເຊິ່ງໂຄງການທັງໝົດນອນຢູ່ໃນຂັ້ນຕອນບົດບັນທຶກຄວາມເຂົ້າໃຈ (MOU) 34 ໂຄງການ, ຂັ້ນຕອນພັດທະນາໂຄງການ (PDA) 51 ໂຄງການ ແລະ ນອນໃນສັນຍາເຊົ່າ-ສໍາປະທານ ກັບພະແນກການເງິນແຂວງ 44 ໂຄງການ. ຊຶ່ງນອນໃນຂົງເຂດພະລັງງານໄຟຟ້າ 55 ໂຄງການ ມູນຄ່າ 2,902 ລ້ານໂດລາ ກວມເອົາ 86.83%; ນອນໃນຂົງເຂດບໍ່ແຮ່ 24 ໂຄງການ ມູນຄ່າ 1,012 ລ້ານໂດລາ ກວມເອົາ 10.59 %; ນອນໃນຂົງເຂດກະສິກຳ-ປ່າໄມ້ 35 ໂຄງການ ມູນຄ່າ 225 ລ້ານໂດລາ ກວມເອົາ 2.35% ແລະນອນໃນຂົງເຂດບໍລິການ-ການທ່ອງທ່ຽວ 11 ໂຄງການ ມູນຄ່າ 8.06 ລ້ານໂດລາ ກວມເອົາ 0.24% ຂອງມູນຄ່າທັງໝົດ.

ທ່ານ ສາກົນ ພອນປະເສີດ ໃຫ້ຮູ້ຕື່ມວ່າ: ພາຍໃຕ້ສັນຍາວ່າດ້ວຍການສຶກສາສໍາຫຼວດ, ການພັດທະນາ ແລະສັນຍາກໍ່ສ້າງ ທີ່ສູນກາງ ແລະທ້ອງຖິ່ນອະນຸຍາດໃຫ້ບໍລິສັດ ກໍຄືການຕິດຕາມ, ກວດກາ ແລະ ການຄົ້ນຄວ້າປຶກສາຫາລືຂະແໜງການກ່ຽວຂ້ອງໃນຈໍານວນ 124 ໂຄງການນີ້, ມີໂຄງການປະເພດ A ຈໍານວນ 15 ໂຄງການ ຄື: ຂົງເຂດພະລັງງານໄຟຟ້າ 6 ໂຄງການ, ບໍ່ແຮ່ 3 ໂຄງການ, ກະສິກໍາ 4 ໂຄງການ ແລະບໍລິການ 2 ໂຄງການ; ປະເພດ B ມີຈໍານວນ 96 ໂຄງການ ຄື: ຂົງເຂດພະລັງງານໄຟຟ້າ 47 ໂຄງການ, ບໍ່ແຮ່ 14 ໂຄງການ, ກະສິກໍາ 26 ໂຄງການ ແລະ ຂົງເຂດບໍລິການ 8 ໂຄງການ ແລະ ໂຄງການປະເພດ C ມີຈໍານວນ 13 ໂຄງການ ຄື: ຂົງເຂດໄຟຟ້າ 2 ໂຄງການ, ບໍ່ແຮ່ 5 ໂຄງການ ແລະ ຂົງເຂດກະສິກໍາ 5 ໂຄງການ.
---
ຂ່າວ: ອັດສະວິນ

แชร์