ສສຂ ສະຫວັນນະເຂດ ສະເໜີໃຫ້ປາບຮ້ານແລກປ່ຽນທີ່ບໍ່ເກງກົວກົດໝາຍ

ປັດຈຸບັນເລື່ອງໄພເງິນເຟີ້ແມ່ນເປັນກະແສທີ່ໂດ່ງດັງ ແລະ ເປັນຂ່າວທີ່ຍອດຮິດມາແຮງຢູ່ໃນສັງຄົມທຸກມື້ນີ້ເຊິ່ງຍາມໃດລັດຖະບານກໍ່ໄດ້ພະຍາຍາມແກ້ໄຂບັນຫາດັ່ງກ່າວຢ່າງເອົາຈິງເອົາຈັງສຳລັບຢູ່ແຂວງສະຫວັນນະເຂດ ທາງຄະນະປົກຄອງແຂວງກໍ່ໄດ້ເອົາໃຈໃສ່ແກ້ໄຂບັນຫາດັ່ງກ່າວຢ່າງບໍ່ລົດລະເຖິງຂັ້ນມີການສັ່ງປິດຮ້ານແລກປ່ຽນເງິນຕາ ໃນທົ່ວແຂວງ, ແຕ່ບັນດາຮ້ານເລົ່ານັ້ນກໍ່ໄດ້ປ່ຽນຊື່ຈາກຮ້ານແລກປ່ຽນເງິນຕາມາເປັນຮ້ານໂອນເງິນດ່ວນແຕ່ເບື້ອງຫຼັງກໍຍັງຮັບແລກປ່ຽນເງິນຕາແບບປົກກະຕິທົ່ວໄປໂດຍບໍ່ຢ້ານກົວຕໍ່ກົດໝາຍບ້ານເມືອງ.

ທ່ານ ນາງ ຫົງຄໍາ ໄຊຍະຄົມ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ແຂວງສະຫວັນນະເຂດ ທັງເປັນສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງອາດສະພອນ ໄດ້ປະກອບຄໍາເຫັນໃສ່ບົດລາຍງານຂອງທ່ານເຈົ້າແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດຂອງແຂວງສະຫວັນນະເຂດ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ທີ່ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຊຸດທີ II. ຊຶ່ງທ່ານ ນາງ ຫົງຄົມ ໄຊຍະຄົມໄດ້ສະເໜີໃຫ້ພາກສ່ວນກ່ຽວຂ້ອງ ກໍ່ຄືຄະນະປົກຄອງແຂວງໄດ້ຖືເອົາວຽກງານການແກ້ໄຂບັນຫາເງິນເຟີ້, ບັນຫາລາຄາສິນຄ້າ ເຄື່ອງອຸປະໂພກ-ບໍລິໂພກທີ່ມີລາຄາແພງທີ່ສົ່ງຜົນກະທົບໂດຍກົງຕໍ່ປະຊາຊົນ, ພະນັກງານ, ທະຫານ-ຕໍາຫຼວດຢູ່ພາຍໃນແຂວງສະຫວັນນະເຂດຂອງພວກເຮົາ, ເພາະວ່າໃນ14 ຈຸດສຸມອົງການປົກຄອງແຂວງທີ່ໄດ້ກໍານົດແມ່ນຍັງບໍ່ໄດ້ມີຂໍ້ກຳນົດອັນລະອຽດກ່ຽວກັບການແກ້ໄຂບັນຫາເງິນເຟີ້ວ່າຈະແກ້ໄຂແນວໃດ, ຈຶ່ງສະເໜີໃຫ້ອົງການປົກຄອງແຂວງລະບຸຕື່ມເປັນຈຸດສຸມທີ 15 ທີ່ກ່ຽວກັບການແກ້ໄຂບັນຫາເງິນເຟີ້ນີ້ຢ່າງລະອຽດ, ກຳນົດມາດຕະການບັງຄັບທີ່ຊັດເຈນ ແລະ ປາບປາມຢ່າງເດັດຂາດຕໍ່ຜູ້ລະເມີດກົດໝາຍ ໂດຍສະເພາະບັນດາຮ້ານແລກປ່ຽນ ທີ່ກຳນົດອັດຕາແລກປ່ຽນຕາມລຳພັງໃຈ. ເພາະຈາກການລາຍງານຂອງທ່ານຮອງຫົວໜ້າທະນາຄານແຫ່ງ ສປປ ລາວ ປະຈຳພາກກາງໄດ້ລາຍຕໍ່ກອງປະຊຸມສະໄໝສາມັນເທື່ອ 7 ຂອງສະພາປະຊາຊົນແຂວງຊຸດທີ II ວ່າຜ່ານການກວດກາການຈັດຕັ້ງປະຕິບັດຕົວຈິງຜ່ານມາເຫັນວ່າມີຮ້ານແລກປ່ຽນຈຳນວນໜຶ່ງທີ່ບໍ່ປະຕິບັດຕາມລະບຽບ,ຕາມກົດໝາຍເຊິ່ງເປັນຮ້ານໃຫຍ່,ຮ້ານດັງ ກໍ່ເລີຍບໍ່ສາມາດເຮັດຫຍັງກັບເຂົາໄດ້ ນັ້ນກໍ່ສະແດງວ່າການບັງຄັບໃຊ້ກົດໝາຍຂອງເຈົ້າໜ້າທີ່ຍັງບໍ່ເດັດຂາດ. ເພາະທຸກຄົນຈະມີຖານະລວຍພຽງໃດ, ຈະມີອຳນາດທາງດ້ານການເງິນຫຼາຍປານໃດກໍ່ຢູ່ພາຍໃຕ້ກົດໝາຍຢ່າງສະເໝີພາບກັນ.
ສະນັ້ນຈຶ່ງສະເໜີມາຍັງພາກສ່ວນທີ່ກ່ຽວຂ້ອງເວົ້າລວມເວົ້າສະເພາະກໍຄືອົງການປົກຄອງແຂວງ ໃຫ້ໄດ້ນໍາໃຊ້ກົດໝາຍຕໍ່ການຄຸ້ມຄອງ ເພາະບັນດາຄວາມຫຍຸ້ງຍາກທາງດ້ານເສດຖະກິດ: ບັນດາຜົນກະທົບຕ່າງໆໃນໄລຍະນີ້ປັດໄຈພື້ນຖານແມ່ນເກີດຈາກອັດຕາແລກປ່ຽນເງິນ.

แชร์