ຜູ້ນໍາຈີນແບກສຽມຮ່ວມຂຸດດິນ ປູກຕົ້ນໄມ້ກັບເຍົາວະຊົນ

ທ່ານ ສີ ຈິ້ນຜິງ ປະທານປະເທດຂອງ ສປ ຈີນ ແບກສຽມຮ່ວມຂຸດດິນປູດຕົ້ນໄມ້ກັບເຍົາວະຊົນ ໂດຍທ່ານໄດ້ເນັ້ນຄວາມສຳຄັນຂອງ ການຟື້ນຟູປ່າໄມ້.ສຳນັກຂ່າວຊິນຫົວລາຍງານວ່າ ທ່ານ ສີ ຈິ້ນຜິງ ຜູ້ນໍາຈີນ ໄດ້ກ່າວ ເຖິງຄວາມສໍາຄັນຂອງປ່າໄມ້ ໂດຍໄດ້ເນັ້ນເຖິງການຊຸກຍູ້ຄວາມພະຍາຍາມຂອງຈີນ ຊຶ່ງປະກອບດ້ວຍ ການຮັກສາປ່າ, ປູກປ່າ ແລະປົກປ້ອງປ່າຕະຫຼອດຈົນການສົ່ງເສີມໃຫ້ປະຊາຊົນຊາວຈີນທຸກຄົນມີສ່ວນຮ່ວມໃນການສ້າງປ່າຢ່າງເປັນຮູບປະທຳ. ທ່ານ ສີ ຈິ້ນຜິງ ຍັງໄດ້ກ່າວຄຳປາໄສໃນຂະນະທີ່ເຂົ້າຮ່ວມກິດຈະກຳປູກຕົ້ນໄມ້ຫຼາກຫຼາຍຊະນິດໃນເຂດທົງໂຈທາງພາກຕາເວັນອອກຂອງນະຄອນຫຼວງປັກກິ່ງຮ່ວມກັບເຈົ້າໜ້າທີ່ລະດັບສູງຂອງຈີນອີກຫຼາຍຄົນ.ພ້ອມກັນນັ້ນທ່ານຍັງໄດ້ໂອ້ລົມກັບບັນດານັກຮຽນທີ່ເຂົ້າຮ່ວມໃນກິດຈະກຳດັ່ງກ່າວກ່ຽວກັບເລື່ອງການຮຽນ ແລະການກີລາ ລວມເຖິງກະຕຸ້ນໃຫ້ເດັກນ້ອຍຄຳນຶງເຖິງການອະນຸຮັກສິ່ງແວດລ້ອມຕັ້ງແຕ່ຍັງນ້ອຍເພື່ອສ້າງໃຫ້ບ້ານເກີດມີຄວາມສວຍງາມຫຼາຍກວ່າເກົ່າ ດ້ວຍມືຂອງພວກເຂົາເອງ. ທ່ານ ສີ ຈິ້ນຜິງ ກ່າວວ່າ ປີນີ້ ເປັນວາລະຄົບຮອບ 40 ປີ ວັນປູກຕົ້ນໄມ້ແຫ່ງຊາດ. ຕະຫຼອດໄລຍະເວລາ 40 ປີທີ່ຜ່ານມາພື້ນທີ່ປ່າໄມ້ ແລະປະລິມານປ່າໄມ້ຂອງຈີນ ລ້ວນເພີ່ມຂຶ້ນເປັນສອງເທົ່າ ຊຶ່ງຈີນມີຖານະເປັນບ້ານຂອງປ່າປູກທີ່ມີຂະໜາດໃຫຍ່ທີ່ສຸດໃນໂລກ. ໃນຂະນະດຽວກັນກໍເປັນປະເທດທີ່ມີອັດຕາການເພີ່ມປະລິມານພືດຂອງ ໂລກຫຼາຍເປັນອັນດັບທີໜຶ່ງ.

ຢ່າງໃດກໍຕາມ ທ່ານ ສີ ຈິ້ນຜິງ ລະບຸວ່າບັນຫາປ່າໄມ້ຫຼຸດໜ້ອຍລົງ ແລະບັນຫາສິ່ງແວດລ້ອມທີ່ມີຄວາມບອບບາງທາງນິເວດວິທະຍາຍັງ ເປັນວຽກໜັກທີ່ຕ້ອງໃຊ້ຄວາມພະຍາຍາມຫຼາຍໃນການແກ້ໄຂ. ໂດຍຍັງ ແນະນຳໃຫ້ຊ່ວຍກັນສົ່ງເສີມການປູກປ່າແບບຄຸນນະພາບ ໂດຍຕ້ອງປະ ສານໃຫ້ສອດຄ່ອງກັບການຄຸ້ມຄອງຊັບພະຍາກອນທຳມະຊາດຕ່າງໆ ບໍ່ວ່າຈະເປັນພູຜາປ່າດົງ, ແມ່ນໍ້າລຳທານ, ເນື້ອທີ່ປູກຝັງ, ທະເລສາບ ແລະທົ່ງຫຍ້າ ແລະຕ້ອງເຮັດຢ່າງຕໍ່ເນື່ອງເພື່ອສ້າງເມືອງ ແລະຊົນນະບົດທີ່ ຢູ່ຮ່ວມກັບປ່າໄມ້.

ນສພ ເສດຖະກິດ-ສັງຄົມ

• 18/04/2019