ວຽງຈັນໂລຊິດສະຕິກພາກ ເຂົ້າຮ່ວມງານວາງສະແດງສິນຄ້າ ຈີນ-ອາຊີຕາເວັນອອກສຽງໃຕ້

ທ່ານ ວຽງຄອນ ສິດທິໄຊ ຮອງປະທານບໍລິສັດ ວຽງຈັນໂລຊິດສະຕິກພາກ ຈໍາກັດ ພ້ອມດ້ວຍຄະນະໄດ້ເຂົ້າຮ່ວມງານວາງສະແດງສິນຄ້າ ຈີນ-ອາຊີຕາເວັນອອກສຽງໃຕ້ (China-South Asia Expo) ຄັ້ງທີ 8 ຈັດຂຶ້ນວັນທີ 23-28 ກໍລະກົດ 2024 ທີ່ນະຄອນຄຸນໝິງ ສປ ຈີນ.

ຈຸດປະສົງຂອງງານດັ່ງກ່າວ ເພື່ອເປັນການເຊື່ອມໂຍງ ແລະ ພັດທະນາຜັນຂະຫຍາຍໂຄງການໜຶ່ງແລວ ໜຶ່ງເສັ້ນທາງ ເຊື່ອມໂຍງຈີນສູ່ບັນດາປະເທດອາຊີ ແລະ ຍົກສູງຜັນຂະຫຍາຍດ້ານການຮ່ວມມືກັບບັນດາປະເທດ ທີ່ເຂົ້າຮ່ວມໂຄງການ ໜຶ່ງແລວ ໜຶ່ງເສັ້ນທາງ.

ໃນໂອກາດທີ່ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ທ່ານ Ding ZhongLi ຮອງປະທານສະພາປະຊາຊົນແຫ່ງຊາດ ເຈົ້າແຂວງຢຸນໜານ ສປ ຈີນ ພ້ອມດ້ວຍບັນດາຄະນະນຳຂອງປະເທດອາຊີຕາເວັນອອກສຽງໃຕ້ ແລະ ປະເທດອາຊີໃຕ້ເຂົ້າຮ່ວມ ໂອກາດດັ່ງກ່າວ ຄະນະໄດ້ຢ້ຽມຊົມ ບູດວາງສະແດງຂອງກຸ່ມບໍລິສັດ PTL holding ແລະ ວຽງຈັນໂລຊິດສະຕິກ ໂດຍໄດ້ຮັບຟັງການລາຍງານຂອງ ທ່ານ ວຽງຄອນ ສິດທິໄຊ ຮອງປະທານບໍລິສັດ ວຽງຈັນໂລຊິດສະຕິກພາກ ຈຳກັດ ໂດຍທ່ານໄດ້ຍົກໃຫ້ເຫັນວ່າ: ປະເທດລາວ ເປັນປະເທດທີ່ບໍ່ມີທາງອອກສຸ່ທະເລ ດັ່ງນັ້ນລັດຖະບານລາວຈຶ່ງໄດ້ມອບໃຫ້ບໍລິສັດ ວຽງຈັນໂລຊິດສະຕິກພາກ ຈຳກັດ ສ້າງທ່າເຮືອທາງບົກຂຶ້ນນັ້ນກໍຄືທ່າບົກທ່ານາແລ້ງຂຶ້ນຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ເຊິ່ງທ່າບົກແຫ່ງນີ້ໄດ້ກາຍເປັນຈຸດເຊື່ອມຕໍ່ທາງບົກທີ່ສຳຄັນ ໄປຍັງບັນດາປະເທດໃນອາຊຽນ ຈີນ ແລະ ເອີລົບ ເພື່ອສ້າງຄວາມສະດວກໃນການຂົນສົ່ງສິນຄ້າ ໄປຍັງບັນດາປະເທດຕ່າງໆໃນໂລກ ຜ່ານເສັ້ນທາງລົດໄຟທີ່ຈະເຮັດໃຫ້ປະຍັດເວລາການເດີນທາງ ແລະ ຫຼຸດຕົ້ນທຶນການຂົນສົ່ງສິນຄ້າ.

ງານວາງສະແດງສິນຄ້າຄັ້ງນີ້ ຈັດຂຶ້ນເປັນເວລາ 6 ວັນ ເຊິ່ງມີບັນດາຫົວໜ່ວຍທຸລະກິດຕ່າງໆໄດ້ນໍາເອົາສິນຄ້າຂອງຕົນເຂົ້າຮ່ວມວາງສະແດງພາຍໃນງານ ຫຼາຍກວ່າ 2.000 ບູດ ແລະ ງານຄັ້ງນີ້ກໍຖືເປັນໂອກາດດີສຳລັບທຸລະກິດໃນລາວເຮົາ ເພື່ອຊອກຫາຊ່ອງທາງ ແລະ ຄູ່ຮ່ວມມືການຄ້າກັບພາກທຸລະກິດຂອງຕ່າງປະເທດ ໂດຍສະເພາະພາກທຸລະກິດຈີນ ແລະ ອາຊີອາຕາເວັນອອກສຽງໃຕ້ ຖືໂອກາດການເຂົ້າຮ່ວມງານວາງສະແດງສິນຄ້າຄັ້ງນີ້ ແຈ້ງໃຫ້ນັກທຸລະກິດທົ່ວພາກພື້ນຊາບວ່າ ການບໍລິການດ້ານໂລຊິດສະຕິກຜ່ານລາວນັ້ນ ໃຫ້ໃຊ້ເສັ້ນທາງການຂົນສົ່ງທີ່ໃຊ້ຕົ້ນທຶນຕໍ່າຄື ນັບຕັ້ງແຕ່ລົດໄຟລາວ-ຈີນ ເຊິ່ງຈະມາເຊື່ອມຕໍ່ກັບລົດ ໄຟລາວ-ໄທທີ່ທ່ານາແລ້ງ ເລີ່ມເປີດໃຫ້ບໍລິການເດືອນທັນວາ 2021 ຜູ້ນຳເຂົ້າ ແລະ ສົ່ງອອກສິນຄ້າໄດ້ຮັບປະໂຫຍດຈາກຕົ້ນທຶນດ້ານໂລຊິດສະຕິກທີ່ຫຼຸດລົງຫຼາຍ.

ຂ່າວ: ວຽງຈັນໃໝ່

แชร์