ຄະນະກໍາມະການຄຸ້ມຄອງໄພພິບັດ ກວດກາສະໜາມຝຶກຊ້ອມກວດກູ້ໄພພິບັດ ຢູ່ອ່າງນໍ້າຫຸ່ມ

ຄະນະກໍາມະການຄຸ້ມຄອງໄພພິບັດ ກະຊວງປ້ອງກັນປະເທດນໍາໂດຍ ສະຫາຍ ພົຕ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ, ຄະນະກໍາມະການຄຸ້ມຄອງໄພພິບັດ ກະຊວງປ້ອງກັນປະເທດພ້ອມຄະນະໄດ້ລົງເຄື່ອນໄຫວກວດກາສະໜາມຝຶກຊ້ອມກອບກູ້ໄພພິບັດຢູ່ອ່າງນໍ້າຫຸ່ມ ເມືອງນາຊາຍທອງນະຄອນຫລວງວຽງຈັນ ໃນວັນທີ 23 ກໍລະກົດ 2024 ເພື່ອວາງແຜນຄາດຄະເນກໍານົດບັນດາຈຸດຝຶກຊ້ອມ, ສະຖານທີ່ພັກເຊົ່າ ແລະ ບ່ອນເຮັດວຽກເພື່ອຮັບປະກັນໃຫ້ແກ່ການຝຶກຊ້ອມຝ່າຍດຽວ ກ່ອນທີ່ຈະເດີນທາງໄປເຂົ້າຮ່ວມຝຶກຊ້ອມກອບກູ້ໄພພິບັດ 3 ກອງທັບ ກໍາປູເຈຍ-ລາວ-ຫວຽດນາມ ທີ່ຈະຈັດຂຶ້ນໃນລະຫວ່າງເດືອນພະຈິກ 2024 ທີ່ກອງທັບຣາຊະອານາຈັກກໍາປູເຈຍ ເປັນເຈົ້າພາບ.

ພາຍຫຼັງສໍາເລັດການລົງກວດກາສະໜາມຕົວຈິງແລ້ວ, ຄະນະຊີ້ນໍາຍັງໄດ້ປຶກສາຫາລືກ່ຽວກັບຄວາມພ້ອມດ້ານຕ່າງໆຂອງແຕ່ລະພາກສ່ວນເຊິ່ງໄດ້ເຫັນດີເປັນເອກະພາບ ໃນການກໍານົດຈຸດຕ່າງໆ. ໃນນັ້ນ, ສະໜາມຝຶກຊ້ອມປະກອບມີສະໜາມຫັດແອບຊອກຄົ້ນ-ກອບກູ້ຜູ້ປະສົບໄພທາງນໍ້າ, ສະໜາມຫັດແອບຊອກຄົ້ນ-ກອບກູ້ຜູ້ປະສົບໄພທາງບົກ, ສະໜາມຫັດແອບການນໍາໃຊ້ໂດຣນບິນສໍາຫລວດ ແລະ ຍົກ-ຢ່ອນ ເຄື່ອງກູ້ໄພ ແລະ ເຄື່ອງບັນເທົາທຸກ ໃຫ້ຜູ້ປະສົບໄພພິບັດທາງນໍ້າ ແລະ ສະຖານທີ່ຮັບປະກັນສະໜາມປະກອບມີສະຖານທີ່ພັກເຊົາຂອງກໍາລັງຝຶກຊ້ອມ, ສະຖານທີ່ພາກສ່ວນເຮັດວຽກງານພະລາທິການ, ເຕັກນິກ ແລະ ສະຖານທີ່ຮັບປະກັນດ້ານຕ່າງໆ.

ໂອກາດນີ້, ທ່ານ ພົຕ ໄພວັນ ຈັນທະພົມມາ ຍັງໄດ້ຊີ້ນໍາໃຫ້ແຕ່ລະພາກສ່ວນຈົ່ງພ້ອມກັນນໍາເອົາເນື້ອໃນຈິດໃຈທີ່ໄດ້ເປັນເອກະພາບໃນຄັ້ງນີ້, ໄປຈັດຕັ້ງປະຕິບັດໃຫ້ມີປະສິດທິຜົນສູງ, ຮັບປະກັນໃຫ້ແກ່ການຝຶກຊ້ອມຝ່າຍດຽວກ່ອນຈະເຂົ້າຮ່ວມຝຶກຊ້ອມກອບກູ້ໄພພິບັດ 3 ກອງທັບ ກໍາປູເຈຍ-ລາວ-ຫວຽດນາມ ທີ່ຈະຈັດຂຶ້ນໃນເດືອນພະຈິກ ທີ່ຈະມາເຖິງນີ້ໃຫ້ມີຜົນສຳເລັດຕາມແຜນການທີ່ວາງໄວ້.
ທີ່ມາ: ຂປລ

แชร์