ອາດີດ ປະທານປະເທດແຫ່ງ ສປປ ລາວ ລົງຢ້ຽມຢາມ ແລະໂອ້ລົມພະນັກງານຫຼັກແຫຼ່ງຂອງ ແຂວງວຽງຈັນ

ໃນວັນທີ 23 ກໍລະກົດ 2024 ນີ້ ທ່ານ ຈູມມະລີ ໄຊຍະສອນ, ອາດີດເລຂາທິການໃຫຍ່ຂອງພັກ ປະຊາຊົນປະຕິວັດລາວ, ອາດີດປະທານປະເທດແຫ່ງ ສປປ ລາວ ໄດ້ລົງຢ້ຽມຢາມ, ຕິດຕາມ ແລະ ຊຸກຍູ້ການຈັດຕັ້ງປະຕິບັດໜ້າທີ່ການເມືອງຂອງຄະນະພັກ-ອົງການປົກຄອງແຂວງວຽງຈັນ ຢູ່ທີ່ເມືອງວັງວຽງ, ໂດຍການຕ້ອນຮັບອັນອົບອຸ່ນຂອງ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ, ພ້ອມດ້ວຍບັນດາສະຫາຍຄະນະປະຈໍາພັກແຂວງ, ຄະນະປະຈໍາພັກເມືອງທົ່ວແຂວງເຂົ້າຮ່ວມ.

ໃນໂອກາດນີ້ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນໄດ້ຕາງໜ້າຄະນະພັກ-ຄະນະນໍາ, ພະນັກງານ, ສະມາຊິກພັກ, ທະຫານ, ຕໍາຫຼວດ ຕະຫຼອດຮອດປະຊາຊົນຊາວແຂວງວຽງຈັນ ໄດ້ສະແດງຄວາມຍິນດີຕ້ອນຮັບ ແລະ ຮູ້ບຸນຄຸນເປັນຢ່າງສູງທີ່ທ່ານ ຈູມມະລີ ໄຊຍະສອນ ອາດີດເລຂາທິການໃຫຍ່ຂອງພັກ ປະຊາຊົນປະຕິວັດລາວ, ອາດີດປະທານປະເທດແຫ່ງ ສປປ ລາວ ທີ່ໄດ້ສະຫຼະເວລາອັນມີຄຸນຄ່າລົງມາຢ້ຽມຢາມ, ຕິດຕາມ, ຊຸກຍູ້ການຈັດຕັ້ງປະຕິບັດໜ້າທີ່ການເມືອງຂອງຄະນະພັກ-ອົງການປົກຄອງແຂວງວຽງຈັນ ເຊິ່ງເປັນການສະແດງໃຫ້ເຫັນເຖິງຄວາມເປັນຫ່ວງເປັນໃຍຕໍ່ການສືບທອດພາລະກິດປະຕິວັດປົກປັກຮັກສາ ແລະ ສ້າງສາພັດທະນາປະເທດຊາດ, ພ້ອມທັງໄດ້ລາຍງານການຈັດຕັ້ງປະຕິບັດໜ້າທີ່ການເມືອງຂອງແຂວງວຽງຈັນ ໃນໄລຍະຜ່ານມາໂດຍສັງເຂບໂດຍສະເພາະການຈັດຕັ້ງດໍາເນີນກອງປະຊຸມໃຫຍ່ 3 ຂັ້ນຢູ່ພາຍໃນແຂວງ; ການປະຕິບັດວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດຮອບດ້ານ ຕິດພັນກັບວຽກງານ 3 ສ້າງ ແລະ ສະພາບການພັດທະນາເສດຖະກິດ-ສັງຄົມຂອງແຂວງ ຕິດພັນກັບ 2 ວາລະແຫ່ງຊາດ. ຜ່ານມາຄະນະປະຈໍາພັກແຂວງວຽງຈັນ ໄດ້ລົງຊຸກຍູ້ກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ໃນທົ່ວແຂວງ ເລີ່ມຈາກຂັ້ນຮາກຖານບ້ານ ປັດຈຸບັນ ແມ່ນສໍາເລັດກອງປະຊຸມໃຫຍ່ຂັ້ນບ້ານ 100%. ສໍາລັບການດໍາເນີນກອງປະຊຸມໃຫຍ່ຂອງໜ່ວຍພັກສໍານັກງານອົງການຂັ້ນເມືອງໃນທົ່ວແຂວງ ແມ່ນໄດ້ຈັດຕັ້ງສໍາເລັດແລ້ວ 72% ຂອງຈໍານວນໜ່ວຍພັກທັງໝົດ ເຊິ່ງຄາດວ່າຈະສໍາເລັດ 100% ໃນເດືອນກັນຍາ 2024, ສຳລັບຮາກຖານພັກອ້ອມຂ້າງແຂວງແມ່ນຈະໃຫ້ສໍາເລັດພາຍໃນເດືອນທັນວາ 2024 ຕາມຄາດໝາຍທີ່ກໍານົດໄວ້. ຄະນະພັກ-ຄະນະນໍາຂອງແຂວງໄດ້ເອົາໃຈໃສ່ວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ແລະ ລົບລ້າງຄວາມທຸກຍາກ ຕິດພັນກັບວຽກງານ 3 ສ້າງ ສາມາດຮັກສາໄດ້ຄວາມສະຫງົບຂັ້ນຮາກຖານໂດຍພື້ນຖານ ເຊິ່ງເປັນພື້ນຖານໃຫ້ແກ່ການພັດທະນາເສດຖະກິດ-ສັງຄົມຂອງແຂວງໃນທົ່ວແຂວງ ສາມາດລຶບລ້າງບ້ານທຸກຍາກໄດ້ 100%. ປັດຈຸບັນ, ຍັງມີຄອບຄົວທຸກຍາກທັງໝົດ 3.720 ຄອບຄົວ ເທົ່າກັບ 4,72% ຂອງຈໍານວນຄອບຄົວທົ່ວແຂວງ.

ຫຼັງຈາກນັ້ນ ທ່ານ ຈູມມະລີ ໄຊຍະສອນ, ອາດີດເລຂາທິການໃຫຍ່ຂອງພັກ ປະຊາຊົນປະຕິວັດລາວ, ອາດີດປະທານປະເທດແຫ່ງ ສປປ ລາວ ໄດ້ມີຄຳເຫັນໂອ້ລົມ ແລະ ເນັ້ນໜັກໃຫ້ການນຳພັກ-ລັດຂອງແຂວງ ແລະ ເມືອງທົ່ວແຂວງວຽງຈັນ ສືບຕໍ່ນຳພາ-ຊີ້ນຳການຈັດຕັ້ງປະຕິບັດວຽກງານ 3 ສ້າງ ຄື: ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ. ການສ້າງແຂວງຕ້ອງສ້າງຕາມຍຸດທະສາດ 3 ດ້ານໃຫຍ່ ຄື: ຍຸດທະສາດດ້ານການເມືອງ, ຍຸດທະສາດດ້ານເສດຖະກິດ ແລະ ຍຸດທະສາດດ້ານການທະຫານ. ສ່ວນການສ້າງເມືອງໃຫ້ສ້າງຕາມ 4 ເນື້ອໃນ ຫຼື 4 ບຸກທະລຸ ຄື:1. ບຸກທະລຸທາງດ້ານຈິນຕະນາການ ຕ້ອງສືບຕໍ່ປັບປຸງໃຫ້ໜັກແໜ້ນຂຶ້ນໄປເລື້ອຍໆ, 2. ບຸກທະລຸທາງດ້ານບຸກຄະລາກອນ ໃຫ້ສືບຕໍ່ສ້າງຄົນ, ສ້າງກຳລັງ ແລະ ສ້າງຊັບພະຍາກອນມະນຸດ, 3. ບຸກທະລຸທາງດ້ານເສດຖະກິດ ຕ້ອງແກ້ໄຂດ້ານສິນຄ້າເປັນຕົ້ນແມ່ນການຜະລິດເປັນສິນຄ້າສົ່ງອອກຕ່າງປະເທດໃຫ້ຫຼາຍ.4.ບຸກທະລຸທາງດ້ານປ້ອງກັນຊາດ-ປ້ອງກັນຄວາມສະຫງົບ ຕ້ອງສືບຕໍ່ເຮັດຢ່າງຕັ້ງໜ້າແລະປົກະຕິ. ສຳລັບການສ້າງບ້ານ ເຊິ່ງເປັນຫົວໜ່ວຍຕ່ຳສຸດ ແລະ ເປັນບ່ອນຈັດຕັ້ງປະຕິບັດຕົວຈິງ ຕ້ອງໄດ້ສຸມໃສ່ຢ່າງຕັ້ງໜ້າ ຕ້ອງສ້າງກຸ່ມການຜະລິດຢູ່ແຕ່ລະບ້ານໃຫ້ໄດ້ 3 ກຸ່ມ ເປັນຕົ້ນແມ່ນກຸ່ມລ້ຽງສັດ, ກຸ່ມປູກຝັງ ແລະ ກຸ່ມບໍລິການ. ຫຼັງຈາກນັ້ນໃຫ້ເລີ່ມຫັນຈາກກຸ່ມການຜະລິດ ໃຫ້ເປັນບໍລິສັດຂະໜາດນ້ອຍໃຫ້ໄດ້ ໃນປີ 2025-2030.
ໃນໂອກາດດຽວກັນນີ້ ທ່ານ ຈູມມະລີ ໄຊຍະສອນ, ອາດີດເລຂາທິການໃຫຍ່ຂອງພັກ ປະຊາຊົນປະຕິວັດລາວ, ອາດີດປະທານປະເທດແຫ່ງ ສປປ ລາວ ໄດ້ໄປຢ້ຽມຊົມ #ສະຖານທີ່ທ່ອງທ່ຽວ #ຖ້ຳນາງຟ້າ, #ຖ້ຳນອນ ( #ຂົວສີຟ້າ) #ເມືອງວັງວຽງຕື່ມອີກ.
ພາບ-ຂ່າວ: ບຸນມາ ແກ້ວບຸດດາ

แชร์