ປະທານບໍລິສັດ ແພນອອສ໌ ຢ້ຽມຢາມເຂດດໍາເນີນງານຂອງບໍລິສັດ ພູເບ້ຍ ມາຍນິງ

ບໍລິສັດ ພູເບ້ຍ ມາຍນິງ ໄດ້ຕ້ອນຮັບຢ່າງອົບອຸ່ນ ທ່ານ ຫວູ ຖາວ, ປະທານບໍລິສັດ ແພນອອສ໌ຄົນໃໝ່ ແລະ ຮອງປະທານບໍລິສັດ ກວາງດົງ ຣາຍຊີງ ນ່ອນເຟີຣາສ ມາຍນິງ ກຣຸບ (GRNMG). ນີ້ແມ່ນການຢ້ຽມຢາມລາວຄັ້ງທໍາອິດຂອງປະທານ ຫວູ ແລະ ຄະນະຫົກທ່ານຈາກ GRNMG. ບໍລິສັດ ແພນອອສ໌ ແມ່ນຢູ່ໃນເຄືອຂອງລັດວິສາຫະກິດ ກວາງດົງ ຣາຍຊີງ ໂຮນດີ້ງ ກຣຸບ (GDRH).

ທ່ານ ຫວູ ໄດ້ມີປະສົບການໃນໂລຫະທາດພື້ນຖານ ແລະ ໄດ້ຮັບຫຼາຍໆຕໍາແໜ່ງໃນຫຼາຍບໍລິສັດ ນັບແຕ່ປີ 1996. ຕໍາແໜ່ງຂັ້ນສູງຂອງທ່ານ ຫວູ ປະກອບມີ ຮອງຜູ້ຈັດການທົ່ວໄປ ຢູ່ບໍລິສັດ ເຊີ່ນເຈີ້ນ ຊົງຍິນ ລິນອ່ານ ເຕັກໂນໂລໂຊີ ຈໍາກັດ; ຜູ້ຈັດການທົ່ວໄປ ຢູ່ບໍລິສັດ ເຊີ່ນເຈີ້ນ ຊົງຍິນ ລິນອ່ານ ນ່ອນເຟີຣາສ ຈໍາກັດ ແລະ ຮອງຜູ້ຈັດການທົ່ວໄປຝ່າຍບໍລິຫານ ຂອງບໍລິສັດ ກວາງດົງ ຣາຍຊີງ ນ່ອນເຟີຣາສ ເມຕານ ກຣຸບ ຈໍາກັດ.

ໃນໄລຍະການຢ້ຽມຢາມຂອງຄະນະຢູ່ໂຄງການຂຸດຄົ້ນ-ປຸງແຕ່ງທອງ-ຄໍາ ພູຄໍາ ແລະ ໂຄງການຂຸດຄົ້ນ-ປຸງແຕ່ງຄໍາ-ເງິນ ບ້ານ ຫ້ວຍຊາຍ, ຄະນະຢ້ຽມຢາມ ໄດ້ຢ້ຽມຊົມຫ້ອງຄວບຄຸມທີ່ທັນສະໄໝ, ໂຮງງານ ປຸງແຕ່ງ, ບໍ່ເປີດ, ບໍ່ໃຕ້ດິນ ແລະ ໂຄງການພາກຂະຫຍາຍຂອງບ້ານ ຫ້ວຍຊາຍ. ຄະນະຢ້ຽມຢາມ ຍັງໄດ້ຮັບຟັງການນໍາສະເໜີໂຄງການປະຕິບັດດີທີ່ສຸດລະດັບສາກົນຂອງບໍລິສັດໃນການເອົາໃຈໃສ່ ແລະ ການຄຸ້ມຄອງສິ່ງແວດລ້ອມ, ການພັດທະນາຊັບພະຍາກອນມະນຸດ ແລະ ການຝຶກອົບຮົມໃຫ້ພະນັກງານຄົນລາວ ແລະ ການປະກອບສ່ວນດ້ານເສດຖະກິດ ແລະ ສັງຄົມຂອງບໍລິສັດ ຕໍ່ຊຸມຊົນທ້ອງຖິ່ນ. ກຸ່ມຢ້ຽມຢາມລະດັບສູງ ຍັງໄດ້ຮັບຟັງຕົວຢ່າງຢູ່ເຂດດໍາເນີນງານຂອງບໍລິສັດ ພູເບ້ຍ ມາຍນິງໃນວິທີທີ່ທີມງານ ນໍາໃຊ້ ແລະ ຈັດຕັ້ງປະຕິບັດຄຸນນະທໍາຫຼັກຂອງ GDRH ໃນດ້ານຈຸດສຸມ, ການປະຕິບັດ, ນະວັດຕະກໍາ, ເຕັກໂນໂລຊີ ແລະ ການວາງຄົນເປັນທີ່ຕັ້ງ ເພື່ອສ້າງຂັ້ນຕອນຕ່າງໆ ແລະ ສ້າງປະສິດທິຜົນທົ່ວຂົງເຂດທຸລະກິດຢ່າງຕໍ່ເນື່ອງ.

ຢູ່ນະຄອນຫຼວງວຽງຈັນ, ທ່ານ ຫວູ ແລະຄະນະຍັງໄດ້ພົບປະພະນະທ່ານ ປອ ເພັດ ພົມພິພັກ, ລັດຖະມົນຕີກະຊວງແຜນການ ແລະການລົງທຶນ. ທ່ານລັດຖະມົນຕີ ໄດ້ສະແດງຄວາມຊົມເຊີຍຕໍ່ ທ່ານ ຫວູ ທີ່ໄດ້ຮັບການແຕ່ງຕັ້ງໃໝ່ ແລະ ຍ້ອງຍໍມາດຕະຖານສູງຂອງບໍລິສັດ ພູເບ້ຍ ມາຍນິງ ໃນການດໍາເນີນການຂຸດຄົ້ນ ແລະການປະກອບສ່ວນຕໍ່ປະເທດຊາດ.

 ທ່ານ ດາລິງ ເຊັງ, ຜູ້ອໍານວຍການ ແລະປະທານບໍລິຫານບໍລິສັດ ແພນອອສ໌, ໄດ້ກ່າວກ່ຽວກັບການຢ້ຽມຢາມລະດັບສູງຂອງຜູ້ຖືຮຸ້ນບໍລິສັດ ແພນອອສ໌ ຈາກ ຈີນ.

“ພວກເຮົາ ໄດ້ຕ້ອນຮັບຄະນະຜູ້ແທນຂັ້ນສູງຈາກລັດວິສາຫະກິດຈີນຂັ້ນສູງ ໃນນັ້ນມີ ທ່ານປະທານ GDRH, ປະທານບໍລິສັດ ແພນອອສ໌ຄົນໃໝ່ ແລະຮອງປະທານ GRNMG. ການຢ້ຽມຢາມຂອງຄະນະສະໜັບສະໜູນບັນດາໂອກາດຂອງການລົງທຶນເຊິ່ງເຮັດໃຫ້ມີການເຕີບໂຕດ້ານດີສໍາລັບບໍລິສັດ ພູເບ້ຍ ມາຍນິງ ເພື່ອພັດທະນາຫຼາຍໆໂຄງການຂຸດຄົ້ນທີ່ຈະນໍາເອົາຜົນປະໂຫຍດດ້ານເສດຖະກິດ ແລະສັງຄົມມາຢູ່ລັດຖະບານ ແລະປະຊາຊົນລາວ.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ ກ່າວຕື່ມວ່າ: “ຄະນະຜູ້ແທນຂັ້ນສູງຈາກລັດວິສາຫະກິດຈີນ ສາມາດເຫັນພາກປະຕິບັດຕົວຈິງຢູ່ເຂດດໍາເນີນງານຂອງບໍລິສັດ ພູເບ້ຍ ມາຍນິງ ແລະ ອຸດສາຫະກໍາບໍ່ແຮ່ໂດຍລວມໃນ ລາວ. ຄະນະດັ່ງກ່າວມີຄວາມຄາດຫວັງທີ່ເຂັ້ມແຂງກ່ຽວກັບຜົນການຜະລິດ ແລະຜົນດ້ານການເງິນທີ່ດີເລີດໃນໄລຍະທີ່ທຸລະກິດກ້າວໄປອີກຫົກເດືອນຂອງປີ 2024.”

แชร์