ທຫລ ຈະດຳເນີນ ນະໂຍບາຍເງິນຕາ ຣັດກຸມຂຶ້ນ ເພື່ອຮັກສາສະຖຽນລະພາບເງິນກີບ

ກົມນະໂຍບາຍເງິນຕາ, ທະນາຄານແຫ່ງ ສປປ ລາວ ອອກຖະແຫຼງການ ຈະສືບຕໍ່ດຳເນີນນະໂຍບາຍເງິນຕາທີ່ຮັດກຸມຂຶ້ນກວ່າເກົ່າ ເພື່ອແກ້ໄຂບັນຫາເງິນເຟີ້ທີ່ຍັງຢູ່ລະດັບສູງ ແລະ ບັນຫາອັດຕາແລກປ່ຽນທີ່ຍັງມີຄວາມຜັນແປໃຫ້ມີຄວາມໝັ້ນທ່ຽງຫຼາຍຂຶ້ນກວ່າເກົ່າ.


ໃນໄລຍະ 5 ເດືອນຕົ້ນປີ 2024 ທີ່ຜ່ານມາ ສປປ ລາວ ຍັງສືບຕໍ່ປະເຊີນກັບຄວາມຫຍຸ້ງຍາກທາງດ້ານເສດຖະກິດ ຈາກບັນຫາເງິນເຟີ້ ແລະ ເງິນກີບອ່ອນຄ່າ ທີ່ເກີດມາຈາກທັງປັດໄຈພາຍນອກ ແລະ ພາຍໃນ. ໂດຍໃນໄລຍະ 5 ເດືອນ ຕົ້ນປີ ສປປ ລາວ ມີອັດຕາເງິນເຟີ້ ສະເລ່ຍ ໃນລະດັບ 25%. ສ່ວນອັດຕາແລກປ່ຽນຂອງທະນາຄານທຸລະກິດ ໃນເດືອນ 5 ປີ 2024 ທຽບໃສ່ ທ້າຍປີ 2023 ເງິນກີບ ທຽບໃສ່ໂດລາ ອ່ອນຄ່າ 3,98%, ເງິນກີບ ທຽບໃສ່ບາດ ອ່ອນຄ່າລົງ 2,96%

ທ່ານ ສຸລິສັກ ທຳນຸວົງ ຫົວໜ້າກົມນະໂຍບາຍເງິນຕາ, ທະນາຄານແຫ່ງ ສປປ ລາວ ກ່າວກ່ຽວກັບ ການຈັດຕັ້ງປະຕິບັດນະໂຍບາຍເງິນຕາໃນໄລຍະ 5 ເດືອນຕົ້ນປີ 2024 ແລະ ທິດທາງການຈັດຕັ້ງປະຕິບັດນະໂຍບາຍເງິນຕາໃນໄລຍະ 7 ເດືອນທ້າຍປີ 2024 ວ່າ: ໃນໄລຍະ 5 ເດືອນຕົ້ນປີ ສປປ ລາວ ນຳເຂົ້າສິນຄ້າ ແລະ ບໍລິການ ກໍຍັງມີທ່າອ່ຽງເພີ່ມຂຶ້ນ ເຖິງແມ່ນວ່າ ຈະມີຄວາມຫຍຸ້ງຍາກ ແລະ ອັດຕາແລກປ່ຽນ ຍັງມີຄວາມຜັນແປກໍຕາມ ນອກນັ້ນການອ່ອນຄ່າຂອງເງິນກີບ ແລະ ອັດຕາເງິນເຟີ້ທີ່ສູງໃນໄລຍະຜ່ານມາ ກໍຍັງໄດ້ສົ່ງຜົນໃຫ້ ປະຊາຊົນມີຄວາມຕ້ອງການຖືຄອງເງິນກີບໜ້ອຍລົງ ແລ້ວຫັນຈາກເງິນກີບເປັນເງິນຕາ ເພື່ອຮັກສາກຳລັງຊື້ຂອງຕົນເອງໄວ້.

ເພື່ອແກ້ໄຂ ບັນຫາເງິນເຟີ້ທີ່ຍັງສູງ ແລະ ຄວາມຜັນແປຂອງອັດຕາແລກປ່ຽນ ພາຍໃນປະເທດ ທຫລ ຈະສືບຕໍ່ດຳເນີນ ນະໂຍບາຍເງິນຕາ ແບບຮັດກຸມຂຶ້ນກວ່າເກົ່າ ໂດຍ ທ່ານ ສຸລິສັກ ທຳນຸວົງ ກ່າວວ່າ:ນັບຕັ້ງແຕ່ປັດຈຸບັນ ຈົນຮອດທ້າຍປີນີ້ ທຫລ ຈະສືບຕິດຕາມ ແລະ ປັບປຸງ ອັດຕາດອກເບ້ຍພື້ນຖານ ທຫລ ໄລຍະ 7 ວັນ ໃຫ້ສອດຄ່ອງກັບສະພາບເສດຖະກິດ-ການເງິນ ຕາມສະພາບການນັ້ນໆ, ປັບປຸງໂຄງສ້າງການຮັກສາເງິນແຮຝາກບັງຄັບໃຫ້ມີຄວາມຮັດກຸມ.

ເມື່ອບໍ່ດົນມານີ້ ທຫລ ໄດ້ມີມະຕິຄື ປັບຂຶ້ນອັດຕາດອກເບ້ຍ ພື້ນຖານ ທຫລ ສະກຸນເງີນກີບ ໄລຍະ 7 ວັນ ຈາກ 8.5% ເປັນ 10% ຕໍ່ປີ ແລະ ໄດ້ຖືເອົາອັດຕາດອກເບ້ຍພື້ນຖານດັ່ງກ່າວ ເປັນອັດຕາດອກເບ້ຍ ພັນທະບັດ 7 ວັນ, ນອກນັ້ນກໍໄດ້ອອກຜະລິດຕະພັນໃໝ່ ໃນຕະຫຼາດເປີດເພີ່ມຂຶ້ນ ເຊັ່ນ: ຜະລິດຕະພັນ ໄລຍະ 3 ເດືອນ ແລະ 6 ເດືອນ ໃນອັດຕາດອກເບ້ຍ 11.24% ແລະ 11.50% ຕາມລຳດັບ. ນອກນີ້ປັບປຸງໂຄງສ້າງການຮັກສາເງິນແຮຝາກບັງຄັບ ໂດຍການປັບຫຼຸດ ອັດຕາສ່ວນການຮັກສາເງີນແຮຝາກບັງຄັບໃນຮູບແບບ ພັນທະບັດ ປັບຫຼຸດລົງຈາກ 70% ເຫຼືອ 50% ເພື່ອເຮັດໃຫ້ ທະນາຄານທຸລະກິດ ສາມາດບໍລິຫານ ສະພາບຄ່ອງຂອງຕົນເອງໄດ້ ແລະ ເປັນການຊຸກຢູ້ໃຫ້ທະນາຄານທຸລະກິດ ອອກຜະລິດຕະພັນເພື່ອລະດົມເງິນຝາກຈາກມວນຊົນ.

ທ່ານ ສຸລິສັກ ກ່າວຕໍ່ວ່າ: ທຫລ ສືບຕໍ່ຈຳໜ່າຍພັນທະບັດ ທຫລ ໃນຕະຫຼາດເປີດ ແລະ ຊຸກຍູ້ໃຫ້ຕະຫຼາດມີການເຄື່ອນໄຫວທີ່ແຂງແຮງ, ສືບຕໍ່ຕິດຕາມ ສະພາບຄ່ອງຂອງທະນາຄານທຸລະກິດ ທີ່ມີເງິນຝາກຢູ່ ທຫລ ໃຫ້ເປັນປົກກະຕິ ແລະ ທັນກັບ ສະພາບການໃນແຕ່ລະໄລຍະ. ນອກຈາກນີ້ ທຫລ ຍັງຈະສືບຕໍ່ດຳເນີນນະໂຍບາຍ ອັດຕາແລກປ່ຽນ ຕາມກົນໄກຂອງຕະຫຼາດ ທີ່ມີລັດຄຸ້ມຄອງ ໂດຍຈະດຳເນີນໄປໃນລັກສະນະທີ່ມີຄວາມຍືດຢຸ່ນ ຂະຫຍາຍຕາໜ່າງການແລກປ່ຽນເງິນຕາຂອງທະນາຄານທຸລະກິດ, ສືບຕໍ່ດັດສົມເງິນຕາຕ່າງປະເທດໃຫ້ແກ່ບັນດາ ສິນຄ້າບູລິມະສິດທີ່ຈຳເປັນ, ພ້ອມນັ້ນ ຈະດຳເນີນ ນະໂຍບາຍໃນການຄຸ້ມຄອງເງີນຕາຕ່າງປະເທດ ໂດຍການສ້າງເງື່ອນໄຂ ໃນການເພີ່ມເງິນຕາຕ່າງປະເທດ ແລະ ຫຼຸດຜ່ອນຄວາມຕ້ອງການເງິນຕາຕ່າງປະເທດໃນລະບົບເສດຖະກິດລົງ.

ເພື່ອໃຫ້ການຈັດຕັ້ງປະຕິບັດ ມາດຕະການດັ່ງກ່າວ ໄດ້ຮັບຜົນສູງສຸດ, ທ່ານ ສຸລິສັກ ໄດ້ຕາງໜ້າໃຫ້ ທຫລ ຮຽກຮ້ອງໃຫ້ ບັນດາກະຊວງ ແລະ ພາກສ່ວນທີ່ກ່ຽວຂ້ອງ ຮີບຮ້ອນດຳເນີນທຸກມາດຕະການເພື່ອຊຸກຢູ້ການຜະລິດ ແລະ ບໍລິການ ເພື່ອສ້າງລາຍຮັບເປັນເງິນຕາໃຫ້ຫຼາຍຂຶ້ນ ເປັນຕົ້ນແມ່ນ ຂະແໜງການທ່ອງທ່ຽວ, ຂະແໜງການບໍ່ແຮ່, ຂະແໜງການກະສິກຳ ແລະ ການດຶງດູດການລົງທຶນຈາກຕ່າງປະເທດ. ພ້ອມທັງໃຫ້ຄົ້ນຄວ້າມາດຕະມາດຕະການຕ່າງໆ ເພື່ອຫຼຸດຜ່ອນຄວາມຕ້ອງການເງີນຕາຕ່າງປະເທດ, ຊ່ວຍ ທຫລ ໃນການຫຼຸດຄວາມກົດດັນ ຂອງຄວາມຕ້ອງການນຳໃຊ້ເງີນຕາຕ່າງປະເທດ ໃນທຸກຮູບແບບ ແລະ ຄຸ້ມຄອງການຄ້ານອກລະບົບ ເພື່ອຈຳກັດການແລກປ່ຽນນອກລະບົບທີ່ບໍ່ຖືກຕ້ອງຕາມກົດໝາຍ.

แชร์