ລັດຖະບານ ຊຸກຍູ້ວຽກງານທີ່ສະມາຄົມກາເຟລາວ

ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສະຫະກຳ ແລະ ການຄ້າ ໄດ້ເດີນທາງມາຢ້ຽມຢາມຕິດຕາມ, ຊຸກຍູ້ວຽກງານທີ່ສະມາຄົມກາເຟລາວ ທີ່ນະຄອນປາກເຊ ແຂວງຈຳປາສັກ ໃນວັນທີ 21 ກໍລະກົດ 2024.

ຈຸດປະສົງໃນການຢ້ຽມຢາມສະມາຄົມກາເຟລາວ ໃນຄັ້ງນີ້ ເພື່ອຕິດຕາມ, ຊຸກຍູ້ ແລະ ຟັງລາຍງານສະພາບການປະກວດກາເຟໝາກຊ້ອມລາວ ປະຈຳປີ 2024 ທີ່ຈັດຂຶ້ນ ແລະ ດຳເນີນມາແຕ່ວັນທີ 18 ກໍລະກົດ 024.ທີ່ສະມາຄົມກາເຟລາວ ເຊີ່ງຕາມແຜນແມ່ນຈະໃຫ້ສຳເລັດໃນວັນທີ 22 ກໍລະກົດ ແລະ ປະກາດຜົນມອບລາງວັນໃນວັນທີ 23 ກໍລະກົດ 2024 ທີ່ສວນກາເຟກຸ່ມບໍລິສັດດາວເຮືອງ ເມືອງປາກຊ່ອງ ແຂວງຈຳປາສັກ ການປະກວດຄຸນນະພາບກາເຟໝາກຊ້ອມລາວ ປະຈຳປີ 2024 ມີກາເຟຕົວແທນຈາກຊາວສວນ, ກຸ່ມການຜະລິດ, ສະຫະກອນ, ບໍລິສັດ ສົ່ງເຂົ້າຮ່ວມທັງໝົດ 25 ພາກສ່ວນ ໃນ 2 ປະເພດກາເຟຄື: ປະເພດກາເຟນ້ອຍ ອາຣາບີກາ (ARABICA ) ແລະ ກາເຟກາງ ໂຣບັສຕາ( ROBUSTA).

ການປະກວດກາເຟໝາກຊ້ອມລາວ ປະຈຳປີ 2024 ຈັດຂື້ນຈຸດປະສົງເພື່ອປະເມີນຄຸນນະພາບກາເຟລາວ, ສົ່ງເສີມການຜະລິດກາເຟຄຸນນະພາບມາດຕະຖານສາກົນ ແລະ ເພື່ອຄັດເລືອກເອົາກາເຟທີ່ໄດ້ຄຸນນະພາບ ແລະຍາດໄດ້ລາງວັນອັນທີ 1 ຫາ ທີ 10 ຂອງແຕ່ລະປະເພດເປັນຕົວແທນກາເຟລາວ ເຂົ້າຮ່ວມປະກວດກາເຟຄຸນນະພາບໃນລະດັບອາຊຽນ.

ໂອກາດຢ້ຽມຢາມສະມາຄົມກາເຟລາວ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສະຫະກຳ ແລະການຄ້າ ສະແດງເຖິງຄວາມເອົາໃຈໃສ່ຕໍ່ວຽກງານການພັດທະນາຄຸນນະພາບກາເຟ ເຊິ່ງກາເຟແມ່ນສິນຄ້າຍຸດສາດຂອງລັດຖະບານກໍຄືແຂວງຈຳປາສັກ ທີ່ສົ່ງອອກຂາຍຕ່າງປະເທດ, ນຳເງິນຕາເຂົ້າມາ ແລະສ້າງລາຍຮັບແກ່ຊາວສວນ,ກຸ່ມການຜະລິດ,ສະຫະກອນ ກໍຄືບໍລິສັດຜູ້ປະກອບການໄດ້ເປັນຢ່າງດີ. ຖ້າເອົາໃຈໃສ່ໃນການຄວບຄຸມຄຸນນະພາບກາເຟໃຫ້ໄດ້ດີມີມາດຕະຖານກໍເປັນທີ່ຕ້ອງການຕະຫຼາດຊາວສວນ, ຜູ້ຜະລິດກໍຈະມີລາຍຮັບຢ່າງຕໍ່ເນື່ອງ ແລະ ຍືນຍົງ.

ຂ່າວ:ເກດສະໜາ ແກ້ວສູວັນນະແສງ

แชร์