ເຂື່ອນໄຟຟ້ານໍ້າກົງ ແຂວງອັດຕະປື ຫາລືກັບພາກລັດກຽມບໍລິຫານນໍ້າຊ້ວງລະດູຝົນ

ໃນວັນທີ 19 ກໍລະກົດ 2024 ບໍລິສັດເຂື່ອນໄຟຟ້ານໍ້າກົງ 1, 2, 3 ເມືອງພູວົງ ແຂວງອັດຕະປື ໄດ້ຈັດກອງປະຊຸມປຶກສາຫາລືກັບພາກລັດເພື່ອກະກຽມບໍລິຫານຈັດການນໍ້າໃນຊ້ວງລະດູຝົນປີນີ້ ໃຫ້ໄດ້ຮັບປະກັນຄວາມປອດໄພຕໍ່ສິ່ງແວດລ້ອມ ແລະ ສັງຄົມ. ໃນກອງປະຊຸມໄດ້ຮັບກຽດເປັນປະທານໂດຍ ທ່ານ ສຸລິຈັນ ໂຊກຄຳຈັນ ເລຂາພັກ, ເຈົ້າເມືອງພູວົງ, ມີບັນດາທ່ານຜູ້ຕ່າງໜ້າຄະນະກຳມະການກ່ຽວຂ້ອງຂັ້ນແຂວງ, ຂັ້ນເມືອງ, ຜູ້ຮັບຜິດຊອບໂຄງການໃນເຂື່ອນ ແລະພະນັກງານວິຊາການຈາກພາກລັດ ແລະ ໃນບໍລິສັດໂຄງການເຂື້ອນໄຟຟ້າ ນໍ້າກົງ 1, 2, 3 ເຂົ້າຮ່ວມ.

ກອງປະຊຸມຖືເປັນເວທີການປຶກສາຫາລືທາງດ້ານວິຊາການເພື່ອກະກຽມບໍລິຫານຈັດການອ່າງນໍ້າ, ຕິດຕາມກວດກາຄວາມປອດໄພຂອງແຕ່ລະເຂື່ອນ ພ້ອມທັງມີການປະກອບຄຳເຫັນວາງແຜນຮັບມືສຸກເສີນຂອງແຕ່ລະເຂື່ອນໃນຊ່ວງລະດູຝົນປີ ເພື່ອໃຫ້ແຕ່ລະເຂື່ອນມີຄວາມປອດໄພສູງສຸດ, ຫລຸດຜ່ອນຜົນກະທົບທີ່ຈະຕາມມານັ້ນ ກໍຄືຕໍ່ເສດຖະກິດ, ສິ່ງແວດລ້ອມ ແລະ ສັງຄົມ ທັງເປັນການຮັບປະກັນການບໍລິຫານຈັດການນໍ້າ ຂອງບັນດາເຂື່ອນຕ່າງໆໃຫ້ມີຄວາມຮັບປະກັນ, ພ້ອມທັງຮັບມືສຸກເສີນທຸກກໍລະນີດ້ວຍຄວາມຮັບຜິດຊອບສູງ.

ກອງປະຊຸມໃນເບື້ອງຕົ້ນກໍໄດ້ມີການລາຍງານ ແລະນຳສະເໜີແຜນການບໍລິຫານຈັດການນໍາຂອງບັນດາໂຄງການເຂື່ອນໄຟຟ້າ ນໍ້າກົງ1, 2-3 (ຊ້ວງລະດູຝົນ) ເຊິ່ງເຫັນໄດ້ວ່າມາຮອດປັດຈຸບັນໃນແຕ່ລະເຂື່ອນແມ່ນໄດ້ເອົາໃຈໃສ່ປັບປຸງເງື່ອນໄຂການຄຸ້ມຄອງອ່າງ ນໍ້າຂະໜາດໃຫຍ່ ດ້ວຍການສ້ອມແປງ ແລະ ປັບປຸງພື້ນຖານໂຄງລ່າງກະກຽມຄວາມພ້ອມໃນລະດູຝົນ ເຊິ່ງໃນປີນີ້ແມ່ນຕ້ອງຕິດຕາມກວດກາຢຢ່າງໃກ້ຊິດ ແລະດັດສົມແຜນການລະບາຍນໍ້າໃຫ້ເໝາະສົມຕະຫຼອດລະດູຝົນ ລວມທັງການກວດກາຄວາມປອດໄພຂອງເຂື່ອນ, ປະຕູລະບາຍນໍ້າແລະ ສະຖານີໂທລະຄົມພ້ອມແລ້ວເພື່ອສະກັດກັ້ນໄພນໍ້າຖ້ວມຢ່າງມີປະສິດທິຜົນ.

ເຂື່ອນໄຟຟ້າ ນໍ້າກົງ 1,2,3 ແມ່ນໜຶ່ງໃນບັນດາໂຄງການບູລິມະສິດອັນສຳຄັນຂອງລັດຖະບານ ກໍຄືແຂວງອັດຕະປື ເຊິ່ງຜ່ານມາໄດ້ປະກອບສ່ວນຕໍ່ການພັດທະນາເສດຖະກິດ-ສັງຄົມຂອງແຂວງ ແລະ ເມືອງໃຫ້ມີການພັດທະນາດີຂຶ້ນຕາມລຳດັບ ສ່ວນບັນຫາທີ່ເປັນຄວາມສ່ຽງເລົ່ານັ້ນກໍ່ລ້ວນແມ່ນເປັນອີກສ່ວນໜຶ່ງໂດຍອີງຕາມເງື່ອນສະພາບແວດລ້ອມຂອງທຳມະຊາດ ແລະສັງຄົມ ເຊິ່ງທຸກພາກສ່ວນຕ້ອງໄດ້ມີສ່ວນຮ່ວມໃນການແກ້ໄຂ ແລະເຊື່ອແນ່ວ່າ ກອງປະຊຸມປອກສາຫາລືເທື່ອນີ້ຈະເປັນຜົນງານຢັ້ງຢືນຕໍ່ກັບການແກ້ໄຂບັນຫາຄວາມສ່ຽງໃຫ້ຖືກຕ້ອງຕາມຂອງລະບຽບກົດໝາຍສູງຂຶ້ນ.
ໂດຍ: ໄພບູນ

แชร์