ທ່ານ ຫີນເພັດ ຫຼ້າຄອນວົງ ຮອງຫົວໜ້າກົມທາງລົດໄຟ ກະຊວງ ໂຍທາທິການ ແລະ ຂົນສົ່ງລາຍງານວ່າ: ພິທີເປີດແລ່ນລົດໄຟຂົນສົ່ງຜູ້ໂດຍສານ ລາວ-ໄທ ແຕ່ບ້ານຄໍາສະຫວາດ ນະຄອນຫຼວງວຽງຈັນ ຫາ ບາງກອກ ສະຖານີ ກຸງເທບອະພິວັດ, ເປັນໂຄງການກໍ່ສ້າງເສັ້ນທາງລົດໄຟ ລາວ-ໄທ ທ່ານາແລ້ງ-ຄໍາສະຫວາດ ແມ່ນໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານໃຫ້ແກ່ ສປປ ລາວ ຈາກລັດຖະບານໄທ ຜ່ານອົງການ NEDA ຊຶ່ງນອນໃນແຜນຍຸດທະສາດ ການພັດທະນາເສັ້ນທາງລົດໄຟ ເຊື່ອມຕໍ່ ລາວ-ໄທ ຂອງກະຊວງ ໂຍທາທິການ ແລະ ຂົນສົ່ງ, ທັງເປັນການຊ່ວຍເຫຼືອທີ່ມີຄວາມໝາຍຄວາມສຳຄັນ ແລະ ຈະດຶງດູດນັກທ່ອງທ່ຽວເຂົ້າມາທ່ຽວ ສປປ ລາວ ໃຫ້ຫຼາຍຂຶ້ນທັງເປັນການພັດທະນາໂຄງລ່າງພື້ນຖານ ຂອງ ສປປ ລາວ, ໂຄງການນີ້ແມ່ນໃຊ້ງົບປະມານທັງໝົດ 1.650.000.000 ບາດ (ສະກຸນເງິນໄທ), ໃນນີ້ເປັນເງິນກູ້ 70 % ແລະ ຊວ່ຍເຫຼືອ 30 % ໂຄງການກໍ່ສ້າງເສັ້ນທາງລົດໄຟ ລາວ-ໄທ ໄລຍະ 2 ຊຶ່ງປະກອບມີການກໍ່ສ້າງສະຖານີວຽງຈັນ (ຄຳສະຫວາດ), ສະຖານີສິນຄ້າ ທ່ານາແລ້ງ ແລະ ການກໍ່ສ້າງລາງລົດໄຟ ແຕ່ສະຖານີທ່ານາແລ້ງ-ສະຖານີວຽງຈັນ, ລວງຍາວ 7,5 ກມ ແລະ ໄດ້ສໍາເລັດ, ລົດໄຟຂົນສົ່ງຜູ້ໂດຍສານ ລາວ-ໄທ ແມ່ນໜຶ່ງໃນບັນດາໂຄງການຮວ່ມມື ຂອງສອງລັດຖະບານ ລາວ ແລະ ໄທ ໃນການສ້າງເງື່ອນໄຂອໍານວຍຄວາມສະດວກໃຫ້ແກ່ການສັນຈອນ ໄປ-ມາ ຫາສູ່ກັນຂອງປະຊາຊົນສອງຊາດ ລາວ-ໄທ ແລະ ການຂົນສົ່ງລະຫວ່າງປະເທດ ເພື່ອສົ່ງເສີມດ້ານການຄ້າ-ການລົງທຶນ ແລະ ທ່ອງທ່ຽວ ກໍຄືການນໍາໃຊ້ທີ່ຕັ້ງຍຸດທະສາດອັນສໍາຄັນຂອງສອງປະເທດຢູ່ອະນຸພາກພື້ນລຸ່ມແມ່ນໍ້າຂອງ ແລະ ອາຊີຕາເວັນອອກ-ສ່ຽງໃຕ້ ໃນການເຊື່ອມໂຍງ-ເຊື່ອມຈອດພື້ນຖານໂຄງລ່າງຕາມແລວເສດຖະກິດຕາເວັນອອກ-ຕາເວັນຕົກ, ເໜືອ-ໃຕ້ ຊຶ່ງຈະເປັນການອໍານວຍຄວາມສະດວກ ແລະ ສະໜັບສະໜູນການພັດທະນາການເຊື່ອມໂຍງການຂົນສົ່ງໃຫ້ໂລ່ງລ່ຽນ ລະຫວ່າງ ສອງປະເທດ ລາວ-ໄທ ກັບບັນດາປະເທດອະນຸພາກພື້ນໃຫ້ເກີດຜົນປະໂຫຍດສູງສຸດຮ່ວມກັນ.