ທ່ານ ຢາງ​ ໂປ​ Yang Bo ໃຫ້ຮູ້ວ່າ: ຈຸດປະສົງຫຼັກຂອງໂຄງການ ແມ່ນສຶກສາຄວາມເປັນໄປໄດ້ໃນການສົ່ງເສີມການລົງທຶນພັດທະນາກະສິກຳ ແລະ ປ່າໄມ້ ແບບຄົບວົງຈອນ,​ ຊຶ່ງໂຄງການຮ່ວມມືດັ່ງກ່າວ ແມ່ນໄດ້ລິເລີ່ມມາຈາກ ນະໂຍບາຍ “ໜື່ງແລວ ໜື່ງເສັ້ນທາງ ຂອງ ສປ ຈີນ” ແລະ ນະໂຍບາຍ “ວ່າດ້ວຍການສົ່ງເສີ່ມການຜະລິດພາຍໃນ ເພື່ອສົ່ງອອກ ແລະ ຫລຸດຜ່ອນການນຳເຂົ້າ” ຂອງລັດຖະບານ ສປປ ລາວ”. ເປົ້າໝາຍລົງທຶນໃນການພັດທະນາກະສິກຳ ແບບຄົບວົງຈອນ ໃນການສົ່ງເສີມຊາວກະສິກອນ ເພື່ອພັດທະນາບັນດາ ປັດໃຈການຜະລິດເຊັ່ນ: ອຸປະກອນການຜະລິດ, ເຕັກນິກການປູກ-ການລ້ຽງ, ການເກັບກູ້, ການປຸງແຕ່ງ, ການຫຸ້ມຫໍ່ ແລະ ລວມເຖິງການຕະຫຼາດ-ການຂາຍ ຊຶ່ງປະກອບດ້ວຍໂຄງການຮ່ວມມືກັບຊາວກະສິກອນ ໃນການປູກຢາສູບ, ກ້ວຍ, ອ້ອຍ ແລະ ພືດສະໝຸນໄພ ເພື່ອປຸງແຕ່ງເປັນສິນຄ້າກະສິກຳ. ນອກຈາກນັ້ນ, ບໍລິສັດ ຍັງຈະໄດ້ສຸມໃສ່ລົງທຶນໃນການສ້າງຕັ້ງໂຮງງານສະກັດນ້ຳມັນພືດ; ໂຄງການລ້ຽງງົວ ແລະ ໂຮງງານຜະລິດອາຫານສັດ-ສັດນໍ້າ; ໂຮງງານຜະລິດຝຸ່ນຊີວະພາບ,ໂຄງການພັດທະນາພະລັງງານໝູນວຽນ ຄົບວົງຈອນ ພາຍໃນຟາມ ປູກ ແລະ ລ້ຽງ ດ້ວຍເຕັກໂນໂລຊີ ທີ່ທັນສະໄໝສູງເພື່ອສົ່ງເສີມການຜະລິດໃຫ້ເປັນສິນຄ້າຈໍາໜ່າຍພາຍໃນ ແລະ ສົ່ງອອກ.

ການເຊັນສັນຍາຮ່ວມມືໃນຄັ້ງນີ້ ມີອາຍຸສັນຍາ 18 ເດືອນ. ຫຼັງຈາກນັ້ນ, ທັງສອງຝ່າຍຈະຮ່ວມກັນກຳນົດ ແລະ ຄັດເລືອກໂຄງການທີ່ເປັນບຸລິມະສິດເພື່ອໃຫ້ສາມາດຈັດຕັ້ງປະຕິບັດ ແລະ ກ້າວເຂົ້າສູ່ການລົງທຶນພັດທະນາໂຄງການດັ່ງກ່າວໃຫ້ສຳເລັດຕາມເປົ້າໝາຍທີ່ໄດ້ກຳນົດໄວ້.