ສະຫວັນນະເຂດ ສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວຄົບຮອບ 69 ປີ

ໃນຕອນເຊົ້າວັນທີ 19 ກໍລະກົດ 2024 ຢູ່ທີ່ສູນການຄ້າສະຫວັນ-ໄອເຕັກໄດ້ຈັດຕັ້ງພິທີສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວຄົບຮອບ 69 ປີຄື: 20 ກໍລະກົດ 1955 – 20 ກໍລະກົດ 2024 ພາຍໃຕ້ຄຳຂວັນ ພັດທະນາຄວາມສະເໝີພາບຍິງ - ຊາຍ ຕິດພັນກັບການພັດທະນາປະເທດຊາດ ໃຫ້ກຽດເຂົ້າຮ່ວມເປັນປະທານຂອງທ່ານ ບຸນໂຈມ ອຸບົນປະເສີດ ເລຂາພັກແຂວງ ເຈົ້າແຂວງ ສະຫວັນນະເຂດ , ທ່ານ ນ ຫລິງທອງ ແສງຕາວັນ ຮອງເຈົ້າແຂວງ , ທ່ານ ນ ວຽງສະໝອນ ພະທິທັກ ວ່າການປະທານສະຫະພັນແມ່ຍິງແຂວງ, ມີການນຳຂອງແຂວງ- ນະຄອນໄກສອນພົມວິຫານ , ອາດີດປະທານສະຫະພັນແມ່ຍິງແຂວງ ສະຫວັນນະເຂດ , ສະຫະພັນແມ່ຍິງພະແນກການອ້ອມຂ້າງແຂວງ, ນັກທຸລະກິດຍິງ , ສະມາຊິກແມ່ຍິງ ພິເສດຍັງມີກົງສູນໃຫ່ຍແຫ່ງ ສສ ຫວຽດນາມ, ສະມາຄົມຈີນ ເຂົ້າຮ່ວມ.

ທ່ານ ບຸນໂຈມ ອຸບົນປະເສີດ ເຈົ້າແຂວງ ສະຫວັນນະເຂດ ໄດ້ກ່າວປາຖະກະຖາຕໍ່ພິທີສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວຄົບຮອບ 69 ປີ ເຊິ່ງທ່ານໄດ້ຫວນຄືນການກຳເນີດ ແລະ ເຕີບໃຫ່ຍຂະຫຍາຍຕົວ ຂອງອົງການຈັດຕັ້ງສະຫະພັນແມ່ຍິງລາວ ນັບແຕ່ມື້ສ້າງຕັ້ງເປັນຕົ້ນມາ, ອົງການຈັດຕັ້ງແມ່ຍິງກໍ່ໄດ້ເຄື່ອນໄຫວຕາມພາລະບົດບາດ ທີ່ໄດ້ກຳນົດໄວ້ໃນກົດລະບຽບ, ໂຄງການດຳເນີນງານຂອງຕົນ ແລະ ໄດ້ປັບປຸງໃຫ້ສອດຄ່ອງກັບຄວາມຮຽກຮ້ອງຕ້ອງການໜ້າທີ່ການເມືອງຂອງພັກ ໃນແຕ່ລະໄລຍະ.

ມາຮອດວັນທີ 6 ມັງກອນ 1956 ກອງປະຊຸມໃຫຍ່ແນວລາວອິດສະຫຼະທົ່ວປະເທດໄດ້ໄຂຂຶ້ນ ແລະ ໄດ້ຕົກລົງປ່ຽນຊື່ຈາກ ແນວລາວອິດສະຫຼະ ມາເປັນ ແນວລາວຮັກຊາດ. ໃນເວລານັ້ນ, ກຳມະການສູນກາງແນວລາວຮັກຊາດທັງຍິງ ແລະ ຊາຍ ຕ່າງກໍ່ສະໜັບສະໜູນໃຫ້ແມ່ຍິງລາວບັນດາເຜົ່າ ໄດ້ມີອົງການຈັດຕັ້ງສະເພາະຂອງຕົນ ແລະ ໄດ້ປຸກລະດົມຊຸກຍູ້ໃຫ້ແມ່ຍິງເຂົ້າການຈັດຕັ້ງສະເພາະຂອງເພດຍິງ, ເພາະວ່າການຈັດຕັ້ງແມ່ຍິງຜ່ານມາແມ່ນຂຶ້ນກັບອົງການແນວໂຮມ, ແຕ່ອົງການແນວໂຮມພັດປະກອບດ້ວຍຫຼາຍຊັ້ນຄົນ, ມີອາຍຸກະສຽນແຕກຕ່າງກັນ ແລະ ສ່ວນຫຼາຍແມ່ນຜູ້ຊົງຄຸນວຸດທິ (ໝາຍວ່າ: ແມ່ນຜູ້ມີອາຍຸສູງ ແລະ ມີຖານະບົດບາດໃນສັງຄົມ).

ດັ່ງນັ້ນ, ໃນເດືອນ ມັງກອນ ປີ 1956 ສະມາຄົມແມ່ຍິງລາວຮັກຊາດ ກໍ່ໄດ້ຮັບການສ້າງຕັ້ງຂຶ້ນ. ສະມາຄົມແມ່ຍິງລາວຮັກຊາດ ແມ່ນສືບທອດມາຈາກໜ່ວຍຄົ້ນຄວ້າວຽກງານແມ່ຍິງ, ອະດີດຄະນະນໍາໜ່ວຍຄົ້ນຄວ້າວຽກງານແມ່ຍິງ ກໍໄດ້ຖືກແຕ່ງຕັ້ງໃຫ້ສືບຕໍ່ນໍາພາສະມາຄົມແມ່ຍິງລາວຮັກຊາດ ແຕ່ໃນຖານະບົດບາດສູງກວ່າ. ຄະນະປະ ກອບມີ 3 ທ່ານ ຄື: ທ່ານນາງ ຄຳຫຼ້າ ວົງສັກ ເປັນຫົວໜ້າ, ທ່ານນາງ ຄຳສຸກ ວົງວິຈິດ ແລະ ທ່ານນາງ ຄຳແພງ ບຸບຜາ ເປັນຮອງ, ຈາກນັ້ນ ກໍ່ໄດ້ຂະຫຍາຍສະມາຄົມແມ່ຍິງລາວຮັກຊາດລົງສູ່ຮາກຖານ ເພື່ອປ່ຽນແທນໜ່ວຍແມ່ນັກຮົບ, ໜ່ວຍເອື້ອຍນັກຮົບ ແລະ ໜ່ວຍຍຸວັນນາລີ ທີ່ໄດ້ຮັບການຈັດຕັ້ງ ແລະ ໄດ້ເຄື່ອນໄຫວປະຕິວັດມາແຕ່ກ່ອນນັ້ນ.

ຈາກນັ້ນໃນພິທີສະເຫລີມສະຫລອງຄັ້ງນີ້ ຍັງໄດ້ມີການເດີນແບບອາພອນເຜົ່າ ຈາກເອື້ອຍ-ນ້ອງໜ່ວຍສະຫະພັນແມ່ຍິງ ແລະ ຄອບຄົວແມ່ຍິງ 3 ດີ ,ມີການປະກວດອາຫານພື້ນບ້ານທີ່ເປັນເອກະລັກຂອງທ້ອງຖິ່ນ ຜົນການແຂ່ງຂັນລາງວັນທີ 1 ກຸ່ມວັດທະນະທຳ - ສັງຄົມໄດ້ຮັບເງິນສົດ 2 ລ້ານກີບພ້ອມໃບຍ້ອງຍໍ, ລາງວັນທີ 2 ກຸ່ມພັກ - ພະນັກງານ ແລະ ອົງການຈັດຕັ້ງມະຫາຊົນໄດ້ຮັບເງີນສົດ 1ລ້ານ 5 ແສນກີບພ້ອມໃບຍ້ອງຍໍ , ລາງວັນທີ 3 ກຸ່ມສະຫະພັນແມ່ຍິງນະຄອນໄກສອນພົມວິຫານໄດ້ຮັບເງີນສົດ 1 ລ້ານກີບພ້ອມໃບຍ້ອງຍໍ, ລາງວັນຊົມເຊີຍມີ 4 ລາງວັນຄື: ກຸ່ມເສດຖະກິດ - ລັດວິສາຫະກິດ, ກຸ່ມປ້ອງກັນຊາດ - ປ້ອງກັນຄວາມສະຫງົບ , ກຸ່ມນິຕິບັນຍັດ - ຕຸລາການ, ກຸ່ມນັກທຸລະກິດຍິງ - ນັກທຸລະກິດຍິງໄວໜຸ່ມ ໄດ້ຮັບເງີນສົດ 5 ແສນກີບພ້ອມໃບຍ້ອງຍໍ ໂດຍການເປັນກຽດມອບຂອງທ່ານເຈົ້າແຂວງ ສະຫວັນນະເຂດ ແລະວ່າການປະທານສະຫະພັນແມ່ຍິງແຂວງ.

ເນື່ອງໃນໂອກາດສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວຄົບຮອບ 69 ປີໃນຄັ້ງນີ້ທ່ານ ບຸນໂຈມ ອຸບົນປະເສີດ ເຈົ້າແຂວງ ສະຫວັນນະເຂດຍັງໄດ້ມອບເງິນຈຳນວນ 10 ລ້ານກີບໃຫ້ແກ່ສະຫະພັນແມ່ຍິງແຂວງເພື່ອຊຸກຍູ້ເຂົ້າໃນວຽກງານການເຄື່ອນໄຫວຂອງເອື້ອຍນ້ອງແມ່ຍິງແຂວງສະຫວັນນະເຂດຕື່ມອີກ.

แชร์