ເປີດບໍລິການປໍ້ານໍ້າມັນເຊື້ອໄຟ ຈະເລີນໄຊ ສາຂາ 2 ທີ່ສາມຫຼຽມເຊໂນ

ໃນຕອນເຊົ້າວັນທີ 18 ກໍລະກົດ 2024ນີ້ ໄດ້ມີພິທີເປີດສະຖານີບໍລິການປໍ້ານໍ້າມັນເຊື້ອໄຟ ພີທີທີ ຈະເລີນໄຊ ສາຂາ 2 ຢູ່ສາມຫຼຽມເຊໂນ. ຂຶ້ນຢ່າງເປັນທາງການ ໂດຍໃຫ້ກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ, ເຈົ້າແຂວງສະຫວັນນະເຂດ, ທ່ານ ພິລະເວດ ນະລະນອງ ຜູ້ອໍານວຍການບໍລິສັດ ພິທີທີ (ລາວ) ຈຳກັດ, ທ່ານ ໂອໄດ ເສນສອນ ປະທານບໍລິສັດຈະເລີນໄຊພັດທະນາ ,ມີການນຳຂັ້ນແຂວງ,ຂັ້ນເມືອງ,ພິເສດມີທ່ານ ກົງສູນໃຫຍ່ແຫ່ງ ຣາຊນາຈັກໄທປະຈຳແຂວງສະຫວັນນະເຂດ , ນັກທຸລະກິດພ້ອມແຂກຖືກເຊີນເຂົ້າຮ່ວມ.

ທ່ານ ນາງ ທູນສະຫວັນ ສີຈັນທອງທິບ ທີ່ປຶກສາບໍລິສັດຈະເລີນໄຊ ພັດທະນາ ທັງເປັນຮອງປະທານສະພາການຄ້າ-ອຸດສາຫະກຳແຂວງສະຫວັນນະເຂດ ໄດ້ລາຍງານ ຜົນສໍາເລັດການພັດທະນາ ຈຸດພັກລົດ ແລະ ປໍ້ານໍ້າມັນ ພິທີທີ ຈະເລີນ ໄຊສາຂາ 2ວ່າ: ໄລຍະຜ່ານມາ ທາງບໍລິສັດ ຈະເລີນໄຊພັດທະນາ ຈຳກັດ ແມ່ນໄດ້ຮັບອະນຸຍາດເຊົ່າສໍາປະທານພື້ນທີ່ດິນລັດ ສາມ ຫຼ່ຽມ ເຊໂນ ຢູ່ບ້ານໄຊອຸດົມ ເມືອງອຸທຸມພອນ, ຈາກເບື້ອງລັດໃນເນື້ອທີ່ 48.476 ຕາແມັດ (ຕາມສັນຍາລົງ ວັນທີ 15 ກໍລະກົດ 2022) ເພື່ອພັດທະນາໃຫ້ເປັນ ສະຖານທີ່ຈຸດແວ່ພັກເຊົາສໍາລັບນັກທ່ອງທ່ຽວ ແລະ ສະຖານີບໍລິການຂົນສົ່ງສິນຄ້າຄົບວົງຈອນ ຕາມແລວທາງເສດຖະກິດຕະເວັນອອກ - ຕະເວັນຕົກ ແລະ ແລວ ທາງ ເໜືອ-ໃຕ້, ຜ່ານການປະຕິບັດໂຄງການຕົວຈິງ ວຽກງານພື້ນຖານໂຄງລ່າງໄດ້ສໍາເລັດແລ້ວເປັນສ່ວນໃຫຍ່ (ປະມານ 80%), ມູນຄ່າການລົງທຶນປະມານ 162,5 ຕື້ກວ່າກີບທີ່ພົ້ນເດັ່ນກວ່າໝູ່ແມ່ນສະຖານນີບໍລິການ ປໍ້ານໍ້າມັນເຊື້ອໄຟ ພິທີທີ ແຫ່ງນີ້ໄດ້ສຳເລັດ 100% ແລະ ໄດ້ມີພິທີເປີດຢ່າງເປັນທາງການ ແລະ ປະມານໃນກາງເດືອນສິງຫາ ກໍຈະໄດ້ເປີດຮ້ານສະດວກຊື້ 7-Elevens ຕື່ມອີກ,ການເປີດສະຖານີບໍລິການປໍ້ານໍ້າມັນເຊື້ອໄຟຄົບວົງຈອນຮູບແບບ PTT Life Station ສູນການ ບໍລິການໂລຈິດຕິກ ເຊໂນແຫ່ງນີ້ ນອກຈາກຈະເປັນໂອກາດອັນດີ ແລະ ມີຄວາມໝາຍສໍາຄັນ ໃນການຮ່ວມມື ເພື່ອສ້າງຄວາມໝັ້ນຄົງທາງດ້ານພະລັງງານນໍ້າມັນເຊື່ອໄຟ ແລະ ປະກອບສ່ວນເຂົ້າໃນການພັດທະນາເສດຖະກິດສັງຄົມຂອງແຂວງ ແລະ ເມືອງແລ້ວ; ຍັງຈະເປັນອີກທາງເລືອກທີ່ພ້ອມສ້າງເງື່ອນໄຂອໍານວຍຄວາມສະດວກເປັນເພື່ອນຮ່ວມເດີນທາງໃຫ້ກັບພໍ່ແມ່ພີ່ນ້ອງປະຊາຊົນບັນດາເຜົ່າ, ນັກທ່ອງທ່ຽວພາຍໃນ ແລະ ຕ່າງປະເທດດ້ວຍການໃຫ້ບໍລິການນໍ້າມັນເຊື້ອໄຟທີ່ມີຄຸນນະພາບ ໄດ້ຮັບການຢັ້ງຢືນມາດຕະຖານຈາກຂະແໜງການມາດຕະຖານ ແລະວັດແທກຂອງກະຊວງອຸດສາຫະກຳ ແລະ ການຄ້າ, ລວມທັງການ ບໍລິການທີ່ໜ້າປະທັບໃຈຈາກຮ້ານສະດວກຊື້ທີ່ມີຊື່ສຽງໂດ່ງດັງ 7-Elevens, ຮ້ານກາເຟອະເມຊອນ, ຮ້ານ ອາຫານປີ້ງໄກ່ລາດເຊໂນ ສິນຄ້າໂອດອບທີ່ມີຊື່ສຽງຂອງແຂວງ, ສູນບໍລິການສ້ອມແປງລົດຍົນ, ຈຸດຈອດ ລົດ-ຄີວລົດເມ, ບ່ອນພັກລົດຂົນສົ່ງສິນຄ້າ,ໜ່ວຍບໍລິການທະນາຄານທຸລະກິດ ແລະຮ້ານຂາຍເຄື່ອງທີ່ລະ ນິກອື່ນໆ; ນອກຈາກນັ້ນ ສະຖານີປໍ້ານໍ້າມັນເຊື້ອໄຟພວກເຮົາ ຍັງໃຫ້ຄວາມສໍາຄັນກ່ຽວກັບ ຫ້ອງນໍ້າສາທາ ລະນະ ຊຶ່ງຖືເປັນຫົວໃຈຂອງການໃຫ້ບໍລິການ ນໍ້າມັນເຊື້ອໄຟ ໂດຍໄດ້ຈັດໃຫ້ມີຫ້ອງນໍ້າສາທາລະນະທີ່ສະອາດທົ່ວໄປ, ຫ້ອງນໍ້າສໍາລັບຜູ້ພິການ ຫຼືຜູ້ສູງອາຍຸທີ່ໄດ້ມາດຕະຖານສາກົນ ໃຫ້ບໍລິການອີກດ້ວຍ. ບໍລິສັດ ຈະເລີນໄຊ ພັດທະນາ ໄດ້ເລີ່ມລົງທຶນໃນທຸລະກິດນໍ້າມັນເຊື້ອໄຟຕັ້ງແຕ່ປີ 2017 ເປັນຕົ້ນມາ, ຊຶ່ງໄດ້ມີສ່ວນແບ່ງການຕະຫຼາດນໍ້າມັນເຊື້ອໄຟຂາຍຍ່ອຍຂອງແຂວງຈໍານວນໜຶ່ງ, ໂດຍມີສະຖານີ ປໍ້ານໍ້າມັນເຊື້ອໄຟ ພີທີທີ ທີ່ພ້ອມໃຫ້ບໍລິການ ພາຍໃນເມືອງອຸທຸມພອນແລ້ວສອງແຫ່ງ ເພື່ອຈຳໜ່າຍນໍ້າມັນ ໃຫ້ກັບພາກທຸລະກິດອຸດສາຫະກຳ ແລະ ການຂົນສົ່ງສິນຄ້າພາຍໃນແຂວງ ແລະ ພວກເຮົາຍັງມີແຜນທີ່ຈະ ຂະຫຍາຍການລົງທຶນໃນຮູບແບບຕ່າງໆ ຕໍ່ໄປໃນອະນາຄົດ.

ໂອກາດນີ້ ທ່ານ ພິລະເວດ ນະລະນອງ, ຜູ້ອໍານວຍການບໍລິສັດ ພິທີທີ (ລາວ) ຈຳກັດກໍໄດ້ມີຄຳເຫັນ ວ່າ : ປັດຈຸບັນປໍ້ານໍ້າມັນ ພີທີທີ ທີ່ໃຫ້ບໍລິການພີ່ນ້ອງປະຊາຊົນລາວ ມີຈໍານວນ 55 ສະຖານີ ແລະ ມີເປົ້າໝາຍທີ່ຂະຫຍາຍສະຖານີບໍລິການໃຫ້ໄດ້ຈໍານວນ80 ແຫ່ງ ພາຍໃນປີ 2030 ການບໍລິການທຸລະກິດຂອງ ພີທີທີ ລາວ ໃນ ສປປ ລາວ ບໍ່ໄດ້ຫວັງປະໂຫຍດດ້ານທຸລະກິດ, ແຕ່ຍັງຄໍານຶງເຖິງສັງຄົມ ແລະ ຊຸມຊົນ ໂດຍມຸ້ງຫວັງເບິ່ງແຍງ ແລະ ຕອບແທນສັງຄົມ ແລະ ຊຸມຊົນດ້ວຍການຈ້າງງານເປີດໂອກາດໃຫ້ລູກຄ້າ ແລະ ຜູ້ຂົນສົງໃນທຸລະກິດສະຖານີບໍລິການເຂົ້າຮ່ວມເປັນສ່ວນໜຶ່ງໃນການເປັນເຈົ້າຂອງຮ່ວມກັບ ພີທີທີລາວ.

ຈາກນັ້ນໃນພິທີທ່ານເຈົ້າແຂວງກໍໃຫ້ກຽດຕັດແຖບຜ້າ ພ້ອມທັງລັ່ນຂ້ອງ 09 ບາດ ເພື່ອເປັນສິລິມຸງຄຸນແກ່ການເປີດສະຖານີບໍລິການປໍ້ານໍ້າມັນເຊື້ອໄຟ ພີທີທີ ຈະເລີນໄຊ ສາຂາ 2 ຢູ່ສາມຫຼ່ຽມເຊໂນອີກດ້ວຍໂດຍຊ່ອງໜ້າແຂກທີ່ເຂົ້າຮ່ວມ. ພ້ອມນັ້ນການນໍາແຂວງກໍໄດ້ເລາະຊົມຮ້ານກາເຟອະເມຊອນ, ຮ້ານອາຫານປີ້ງໄກ່ລາດເຊໂນ, ຈຸດຈອດ ລົດ-ຄີວລົດເມ ແລະປໍ້ານໍ້າມັນເຊື້ອໄຟ ພີທີທີ ຈະເລີນໄຊ ສາຂາ 2 ຕື່ມອີກ.

แชร์