ເລີ່ມກໍ່ສ້າງອະນຸສອນສະຖານ ພົນເອກ ສີສະຫວາດ ແກ້ວບຸນພັນ

ເພື່ອເປັນການຈາລຶກບຸນຄຸນ, ຜົນງານ, ຄວາມງາມຄວາມດີໃນການເຄື່ອນໄຫວນຳພາ-ຊີ້ນຳ ຂະບວນການປະຕິວັດຕໍ່ສູ້ກູ້ຊາດກໍ່ຄືໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ຂອງ ພົນເອກ ສີສະຫວາດ ແກ້ວບຸນພັນ ພັກ-ລັກຖະບານ, ອົງການປົກຄອງແຂວງ ແລະຄອບຄົວແກ້ວບຸນພັນ ພ້ອມດ້ວຍປະຊາຊົນຊາວແຂວງຫົວພັນ ໄດ້ຈັດພິທີວາງສີລາລຶກໂຄງການກໍ່ສ້າງອະນຸສອນສະຖານ ພົນເອກ ສີສະຫວາດ ແກ້ວບຸນພັນ ຂື້ນທີ່ສວນມິດຕະພາບຫົວພັນ-ແທັງຮວາ ບ້ານພັນໄຊ ເມືອງຊຳເໜືອ ແຂວງຫົວພັນ ໃນວັນທີ 18 ກໍລະກົດ 2024. ໂດຍການເປັນກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ໄດ້ຕາງໜ້າພັກ-ລັດຖະບານ, ມີ ພົນໂທ ວົງຄຳ ພົມມະກອນ ຮອງລັດຖະມົນຕີກະຊວງປ້ອງກັນປະເທດ, ທ່ານ ນາງ ອິນລາວັນ ແກ້ວບຸນພັນ ຮອງປະທານສູນກາງແນວລາວສ້າງຊາດ, ມີການນຳພັກ-ລັດ ຕາງໜ້າຈາກກະຊວງ-ອົງການ, ອາດີດການນຳພັກ-ລັດ ແລະ ຄະນະນຳຂອງແຂວງ ພ້ອມດ້ວຍປະຊາຊົນລາວບັນດາເຜົ່າ ຊາວແຂວງຫົວພັນ ເຂົ້າຮ່ວມ.

ໃນພິທີໄດ້ຮັບຟັງການຫວນຄືນຊີວິດ, ປະຫວັດ ແລະຜົນງານການເຄື່ອນໄຫວຜະຕິວັດຂອງພົນເອກ ສີສະຫວາດ ແກ້ວບຸນພັນ ໂດຍຫຍໍ້ເພື່ອໃຫ້ຄົນຮຸ່ນຫລັງໄດ້ຮັບຮູ້ ແລະຈົດຈໍາຄຸນງາມຄວາມດີຂອງທ່ານຕະຫລອດໄປ.

แชร์