ພິທີສະຫຼຸບຈັດຕັ້ງປະຕິບັດໂຄງການ SUSTOUR ລາວ
ພິທີສະຫຼຸບລາຍງານການຈັດຕັ້ງປະຕິບັດໂຄງການ ແລະ ສະເຫຼີມສະຫຼອງຜົນສຳເລັດຂອງໂຄງການ SUSTOUR ລາວຈັດຂຶ້ນໃນວັນທີ 16 ກໍລະກົດ 2024 ນີ້ ຕາງຫນ້າໂດຍກະຊວງອຸດສາຫະກຳແລະການຄ້າຮ່ວມກັບສະພາການຄ້າ ແລະ ອຸດສາຫະກຳແຫ່ງຊາດລາວ ທີ່ເປັນຄູ່ຮ່ວມຈັດຕັ້ງໂຄງການ ແລະພາກສ່ວນອື່ນໆທີ່ກ່ຽວຂ້ອງເຂົ້າຮ່ວມ.
ໂຄງການ SUSTOUR ລາວ ໄດ້ຮັບທຶນພາຍໃຕ້ໂຄງການ EU-SWITCH Asia ແລະ ຈັດຕັ້ງປະຕິບັດໂດຍ ອົງການແພລນສາກົນ ປະຈຳ ສປປ ລາວ, ຮ່ວມມືກັບກົມສົ່ງເສີມການຄ້າຂອງກະຊວງອຸດສາຫະກຳ ແລະ ການຄ້າ MoIC, ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ສູນການທ່ອງທ່ຽວແບບນິເວດ ແລະ ກະເສດຂອງເອີຣົບໂດຍຜ່ານລະບົບຕ່ອງໂສ້ທຸລະກິດຊັ້ນນໍາ
ໂຄງການດັ່ງກ່າວໄດ້ສະໜັບສະໜູນທຸລະກິດທ່ອງທ່ຽວໃຫ້ແກ່ຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງໃນນະຄອນຫຼວງວຽງຈັນ, ແຂວງວຽງຈັນ ແລະ ແຂວງຫຼວງພະບາງ ເພື່ອນຳໃຊ້ ແລະ ສົ່ງເສີມການບໍລິໂພກ ແລະ ການຜະລິດແບບຍືນຍົງ (SCP) ທົ່ວທັງລະບົບຕ່ອງໂສ້ການສະຫນອງ ແລະ ຂະບວນການດຳເນີນທຸລະກິດແບບເປັນມິດຕໍ່ສິ່ງແວດລ້ອມ.
ໂຄງການໄດ້ພັດທະນາການຢັ້ງຢືນ ລາວຍືນຍາວ ທີ່ຄຸ້ມຄອງ ໂດຍ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ໄດ້ດັດແປງມາຈາກ Travelife ເພື່ອປັບປຸງຄວາມຍືນຍົງຂອງຫົວໜ່ວຍທຸລະກິດ MSMEs ໃນຂະແໜງຫັດຖະກຳ, ອາຫານ ແລະ ເຄື່ອງດື່ມ, ການຂົນສົ່ງ ແລະ ການທ່ອງທ່ຽວວັດທະນະທຳ. ດ້ວຍການສະໜັບສະໜູນຂອງໂຄງການ, ເກືອບ 300 MSMEs ໄດ້ລົງທະບຽນໃນແຜນງານ ລາວຍືນຍາວ ແລະ ອີກ 95 ແຫ່ງໄດ້ລົງທະບຽນໃນແຜນງານທຣາເວລໄລຟ໌
ໂຄງການນີ້ໄດ້ຮັບການຍົກຍ້ອງວ່າປະສົບຜົນສຳເລັດໃນການສ້າງຜົນກະທົບເຊີງບວກຕໍ່ຂະແໜງການທ່ອງທ່ຽວຂອງລາວ ໂດຍສະເພາະໃນດ້ານຄວາມຍືນຍົງ ແລະ ການພັດທະນາສັກກະຍະພາບຂອງຜູ້ປະກອບການທ້ອງຖິ່ນ.
