ສະຫະພັນແມ່ຍິງ ສະມາຄົມນັກທຸລະກິດແມ່ຍິງ ດຳເນີນກອງປະຊຸມໃຫຍ່

ກອງປະຊຸມໃຫຍ່ສະມາຊິກສະຫະພັນແມ່ຍິງ ສະມາຄົມນັກທຸລະກິດແມ່ຍິງ ຄັ້ງທີ 1 ໄດ້ຈັດຂຶ້ນໃນວັນທີ 17 ກໍລະກົດ 2024 ທີ່ສູນຝຶກອົບຮົມແມ່ຍິງລາວ ໃກ້ກຽດເປັນປະທານຮ່ວມມີທ່ານ ນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ທ່ານ ນາງ ຈັນທະຈອນ ວົງໄຊ ປະທານຄະນະບໍຫານສະມາຄົມນັກທຸລະກິດແມ່ຍິງ, ທ່ານ ນາງ ວາລີ ເວດຊະພົງ ປະທານສະຫະພັນແມ່ຍິງສະພາການຄ້າແລະອຸດສາຫະກຳແຫ່ງຊາດລາວ, ທ່ານ ປ້າ ຈັນເທົ່າ ປະຖົມມະວົງ ປະທານກິດຕິມະສັກສະມາຄົມນັກທຸລະກິດແມ່ຍິງ, ທ່ານ ນາງ ມະໂນລາ ດາລາວົງ ປະທານທີ່ປຶກສາສະມາຄົມນັກທຸລະກິດແມ່ຍິງ, ມີບັນດາທ່ານແຂກຜູ້ມີກຽດ ແລະຜູ້ແທນກອງປະຊຸມເຂົ້າຮ່ວມ.

ທ່ານນາງ ສີຣິຄູນ ພູມລາວັນ ປະທານສະຫະພັນແມ່ຍິງ ສະມາຄົມນັກທຸລະກິດແມ່ຍິງ ໄດ້ກ່າວເປີດກອງປະຊຸມວ່າ: ກອງປະຊຸມໃຫຍ່ ສະມາຊິກສະຫະພັນແມ່ຍິງ ສະມາຄົມນັກທຸລະກິດແມ່ຍິງຄັ້ງນີ້ ໄດ້ໄຂຂຶ້ນເປັນຄັ້ງທໍາອິດ ທ່າມກາງບັນຍາກາດທົ່ວພັກທົ່ວປວງຊົນ ກຳລັງກະກຽມເປັນເຈົ້າພາບຈັດກອງປະຊຸມອາຊຽນໃນປີ 2024 ໂດຍສະເພາະສະມາຄົມ ນັກທຸລະກິດແມ່ຍິງກໍ່ກຳລັງຂຸ້ນຂ້ຽວກະກຽມກອງປະຊຸມ AWEN ໃນຫົວຂໍ້: ກອງປະຊຸມຜູ້ປະກອບການແມ່ຍິງອາຊຽນ 2024 ແລະ ພິທີມອບລາງວັນ ພິເສດນັກທຸລະກິດຍິງອາຊຽນ ໃນວັນທີ 04 ຕຸລາ 2024 ທີ່ຈະມາເຖິງນີ້. ຊຶ່ງກອງປະຊຸມໃຫຍ່ຄັ້ງນີ້ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານການເຄື່ອນໄຫວຮອບດ້ານ ຂອງສະຫະພັນແມ່ຍິງ ສະມາຄົມນັກທຸລະກິດແມ່ຍິງ ໃນໄລຍະເກືອບ 4 ປີທີ່ຜ່ານມາ ເຊິ່ງໄດ້ຍົກໃຫ້ເຫັນດ້ານດີ, ດ້ານຕັ້ງໜ້າ, ບາງດ້ານທີ່ຄົງຄ້າງບົດຮຽນທີ່ຖອດຖອນໄດ້ ແລະ ໄດ້ກຳນົດທິດທາງແຕ່ປີ 2026-2029.

ການດໍາເນີນກອງປະຊຸມໃຫຍ່ຄັ້ງນີ້ ຜູ້ແທນກອງປະຊຸມໄດ້ເປັນເອກະສັນຮັບຮອງເອົາເນື້ອໃນສໍາຄັນດັ່ງນີ້: 1. ຮັບຮອງເອົາ ລາຍງານການເມືອງ ຂອງຄະນະບໍລິຫານງານສະຫະພັນແມ່ຍິງສະມາຄົມນັກທຸລະກິດແມ່ຍິງ ໃນ 04 ປີຜ່ານມາ, ຊຶ່ງໄດ້ຕີລາຄາຢ່າງພາວະວິໄສຕໍ່ຜົນສໍາເລັດໃນການນໍາພາ-ຊີ້ນໍາ ແລະ ຈັດຕັ້ງປະຕິບັດວຽກງານ ຂອງຄະນະບໍລິຫານງານສະຫະພັນແມ່ຍິງ ໂດຍສະເພາະແມ່ນ ມະຕິກອງປະຊຸມໃຫຍ່ຂອງ ສູນກາງ ສະຫະພັນແມ່ຍິງລາວ ປະສົບຜົນສໍາເລັດຕາມລະດັບຄາດໝາຍທີ່ໄດ້ວາງໄວ້; 2. ຮັບຮອງເອົາທິດທາງລວມ, ຄາດໝາຍສູ້ຊົນ, 05 ປີຕໍ່ໜ້າ (2025-2029) ຊຶ່ງລວມມີ 4 ຄາດໝາຍສູ້ຊົນ ຄື: 1) ດ້ານການເມືອງແນວຄິດໃຫ້ສະມາຊິກສະມາຊິກສະຫະພັນແມ່ຍິງເຊື່ອມຊຶມແນວທາງການເມືອງຂອງພັກ, ກົດໝາຍ ແລະ ທິດທາງເສດຖະກິດຂອງລັດ, ມີຄວາມສາມັກຄີໜັກແໜ້ນ ເພື່ອຈັດຕັ້ງປະຕິບັດວຽກງານໃຫ້ສໍາເລັດ; 2) ກໍ່ສ້າງພະນັກງານເພດຍິງ ໃຫ້ມີຄວາມຮູ້, ຄວາມສາມາດ, ເປັນຊ່ຽວຊານດ້ານຕ່າງໆ, ນໍາໃຊ້ວິທະຍາສາດ, ເທັກໂນໂລຊີເຂົ້າໃນ ການຄຸ້ມຄອງບໍລິຫານທຸລະກິດ, ການຜະລິດ ແລະ ອື່ນໆ; 3) ສົ່ງເສີມຄວາມກ້າວໜ້າຂອງແມ່ຍິງ ສະເໝີພາບ ບົດບາດຍິງຊາຍໃນຄອບຄົວ ແລະສັງຄົມ, ມີວິຊາຊີບ, ສີມື ແຮງງານ, ມີວຽກເຮັດງານທໍາ ຢ່າງສະເໝີພາບກັນ; 4) ຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ແລະແຜນພັດທະນາແມ່ຍິງລາວ 5 ປີ.

ນອກຈາກນີ້ ກອງປະຊຸມຍັງໄດ້ດໍາເນີນການປ່ອນບັດຄັດເລືອກເອົາຄະນະບໍລິຫານງານສະຫະພັນແມ່ຍິງ ສະມາຄົມນັກທຸລະກິດແມ່ຍິງ ຊຸດໃຫມ່ 7 ທ່ານ ໃນນັ້ນ ມີຜູ້ລົງສະໝັກ 11 ທ່ານ. ຜ່ານການປ່ອຍບັດຄັດເລືອກ ທ່ານນາງ ສີຣິຄູນ ພູມລາວັນ ໄດ້ເປັນປະທານຄະນະບໍລິຫານງານສະຫະພັນແມ່ຍິງ ສະມາຄົມນັກທຸລະກິດແມ່ຍິງ ຊຸດໃຫມ່, ທ່ານນາງ ຈໍາປາທອງ ທະລັງແສງຈັນ ເປັນຮອງປະທານ, ທ່ານນາງ ສີລິພອນ ພັນທະວົງສີ ເປັນປະທານກວດກາ ແລະ ມີຄະນະອີກ 4 ທ່ານ ໃນນັ້ນ ມີທ່ານນາງ ສຸດສະດີ ລືໄຊ, ທ່ານນາງ ອໍລະໄທ ສັນຕິຄົງຄາ, ທ່ານນາງ ປານິຕາ ປານຄໍາ ແລະ ທ່ານນາງ ນາລີ ແສງປັນຍາ.

ໃນກອງປະຊຸມ ທ່ານປະທານຄະນະບໍລິຫານງານ ສູນກາງສະຫະພັນແມ່ຍິງລາວ ຍັງໄດ້ໃຫ້ກຽດໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງ ຄະນະບໍລິຫານງານສະຫະພັນແມ່ຍິງ ສະມາຄົມນັກທຸລະກິດແມ່ຍິງ ຍາດມາໄດ້ໃນໄລຍະຜ່ານມາ, ພ້ອມກັນນີ້ ທ່ານຍັງໄດ້ຮຽກຮ້ອງໃຫ້ ສະຫະພັນແມ່ຍິງ ສະມາຄົມນັກທຸລະກິດແມ່ຍິງ ຕ້ອງຍຶດໝັ້ນແນວຄິດຈົ່ງຮັກພັກດີ ຕໍ່ແນວທາງນະໂຍບາຍຂອງພັກ, ເຊື່ອໝັ້ນຕໍ່ການນໍາພາ ແລະພ້ອມກັນສະໜັບສະໜູນຕໍ່ແນວທາງນະໂຍບາຍດ້ວຍການຜັນຂະຫາຍຫັນເອົາ ບັນດາມະຕິ, ຄໍາສັ່ງ, ນະໂຍບາຍ, ແຜນພັດທະນາເສດຖະກິດຂອງລັດຖະບານມາຈັດຕັ້ງປະຕິບັດ, ໝູນໃຊ້ໃຫ້ປະກົດຜົນເປັນຈິງ; ເອົາໃຈໃສ່ເຕົ້າໂຮມຄວາມສາມັກຄີ, ຊ່ວຍເຫຼືອແລກປ່ຽນບົດຮຽນໃນດ້ານທຸລະກິດ, ສະໜັບສະໜູນເຊິ່ງກັນ ແລະກັນເປັນກຳລັງແຮງໜັກແໜ້ນເຕີບໃຫຍ່ໄປນຳກັນ, ຜູ້ໜຶ່ງເຂັ້ມແຂງ, ຫຼາຍຄົນເຂັ້ມແຂງ, ສັງຄົມ ແລະປະເທດຊາດກໍ່ເຂັ້ມແຂງ; ຕ້ອງຫັນທຸລະກິດເປັນທັນສະໄໝ, ຮຽນຮູ້ເຕັກນິກການບໍລິຫານໃໝ່, ການຕະຫຼາດໃໝ່ໂດຍກຳສະພາບຄວາມເປັນຈິງ ແລະແນວໂນ້ມຄວາມຕ້ອງການຂອງຕະຫຼາດເພື່ອຄວາມຍືນຍົງຂອງທຸລະກິດ; ສ້າງຄົນລຸ້ນໃໝ່ ເພື່ອສືບທອດ ສ້າງທຸລະກິດໃຫ້ໝັ້ນຄົງ-ຂະຫຍາຍຕົວ, ຖອດຖອນບົດຮຽນອັນດີໃຫ້ຄົນ ລຸ້ນໃໝ່ມີຄວາມຮູ້ຄວາມສາມາດມີຄວາມມານະອົດທົນ, ບຸກບືນ, ກ້າເຮັດ, ກ້າຕັດສິນໃຈ; ປະກອບສ່ວນສ້າງສະມາຄົມນັກທຸລະກິດແມ່ຍິງໃຫ້ເຂັ້ມແຂງທາງດ້ານການນໍາພາ, ດ້ານການປະສານງານ ສາມາດນໍາເອົາແນວທາງນະໂຍບາຍຂອງພັກ, ຂອງລັດ ແລະແຜນພັດທະນາແມ່ຍິງເຜີຍແຜ່ສ້າງຄວາມ ເຂົ້າໃຈໃຫ້ສະມາຊິກນັກທຸລະກິດຍິງໃຫ້ເຂົ້າໃຈເລິກເຊິ່ງ, ຂະຫຍາຍສະມາຊິກນັກທຸລະກິດຍິງກໍ່ຄືສະ ມາຊິກສະຫະພັນແມ່ຍິງຂອງສະມາຄົມເຊັ່ນກັນ; ມີລະບຽບແບບແຜນວິທີນຳພາ ວິທີເຮັດວຽກ ແບບມີວິທະຍາສາດ, ປະຕິບັດຫຼັກການລວມສູນ ປະຊາທິປະໄຕ, ເຮັດວຽກເປັນໝູ່ຄະນະ, ບຸກຄົນຮັບຜິດຊອບ; ນອກຈາກນັ້ນ, ໃນນາມທີ່ຕົວແທນແມ່ຍິງພວກເຮົາຈໍາຕ້ອງເພີ່ມທະວີໃນການສັ່ງສອນລູກຫຼານ, ເດັກ, ໃຫ້ຮູ້ວັດທະນະທຳ, ປະເພນີອັນດີງາມຂອງຊາດຂອງແມ່ຍິງລາວ, ອະນຸລັກຄຸນລັກສະນະອັນດີງາມທີ່ ເປັນມູນເຊື້ອ ຂອງເອື້ອຍນ້ອງແມ່ຍິງລາວ; ພ້ອມກັນປະຕິບັດຄໍາຂວັນ ແລະ ຂໍ້ແຂ່ງຂັນຂອງແມ່ຍິງ ຕິດພັນກັບຂະບວນຮັກຊາດ ແລະພັດທະນາ, ຂະບວນການສ້າງນັກທຸລະກິດດີເດັ່ນ, ແມ່ດີເດັ່ນ; ຕ້ອງສ້າງຄວາມເຂັ້ມແຂງໃຫ້ສະມາຊິກສະຫະພັນແມ່ຍິງດ້ວຍການສ້າງກອງທຶນຂອງນັກທຸລະກິດ ເພື່ອຊ່ວຍເຫຼືອເຊິ່ງກັນ ແລະກັນດເປັນກໍາລັງແຮງໃນການດໍາເນີນທຸລະກິດໂດຍສະເພາະຊ່ວຍເຫຼືອ ແມ່ຍິງກຳລັງເລີ່ມດຳເນີນທຸລະກິດຂະໜາດນ້ອຍ, ຂະໜາດກາງ ແລະ ອື່ນໆ.
ຂ່າວ: ສາລາວໃຕ້

แชร์