ເຂື່ອນໄຟຟ້າ ນໍ້າກົງ1 ແຂວງອັດຕະປື ສ້າງຂະບວນການປ່ອຍປາ ແລະປູກຕົ້ນໄມ້

ວັນທີ 13 ກໍລະກົດ 2024 ບໍລິສັດ ເຂື່ອນໄຟຟ້ານໍ້າກົງ 1 ຈຳກັດ ເມືອງພູວົງ ແຂວງອັດຕະປື ໄດ້ຈັດພິທີສ້າງຂະບວນການປ່ອຍປາ ແລະ ປູກຕົ້ນໄມ້ ໂອກາດຄວາມໝາຍຄວາມສຳຄັນຂອງວັນອະນຸລັກສັດນໍ້າ-ສັດປ່າ ແລະ ວັນປູກຕົ້ນໄມ້ແຫ່ງຊາດ. ຂຶ້ນທີ່ເຂດບໍລິເວນອ່າງໂຕ່ງເຂື່ອນໄຟຟ້ານໍ້າກົງ 1 ໂດຍມີທ່ານ ນາງ ບຸນນານ ບຸນນະແສງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີ ທ່ານ ຈູຊີ້ ຮອງຄະນະອຳນວຍການ ບໍລິສັດ ເຂື່ອນໄຟຟ້ານໍ້າກົງ 1 ຈຳກັດ, ມີຕ່າງໜ້າຄະນະນໍາຂັ້ນແຂວງ, ຄະນະນໍາຂັ້ນເມືອງ, ອຳນາດການປົກຄອງບ້ານເປົ້າໝາຍ, ພະນັກງານວິຊາການ ແລະ ຫຼານນ້ອຍນັກຮຽນເຂົ້າຮ່ວມ.

ຂະບວນການປ່ອຍປາ ແລະປູກຕົ້ນໄມ້ ຢູ່ເຂື່ອນໄຟຟ້ານໍ້າກົງ 1 ຂອງບໍລິສັດ China International Waters and Electric Corp(CWE) ໃນເຄືອກຸ່ມບໍລິສັດChina Communications Construction Group Corporation Limited (CCCCG) ແມ່ນເປັນການສືບຕໍ່ເອົາໃຈໃສ່ປົກປັກຮັກສາສິ່ງແວດລ້ອມ, ປູກຈິດສຳນຶກ ໃຫ້ນ້ອງນັກຮຽນ ແລະ ພະນັກງານໃນບໍລິສັດ ໄດ້ຮູ້ຈັກປົກປັກຮັກສາສິ່ງແວດລ້ອມ, ເປັນແບບຢ່າງໃຫ້ທຸກພາກສ່ວນໃນສັງຄົມ ພ້ອມກັນຫັນມາໃສ່ໃຈຕໍ່ການອະນຸລັກສັດນໍ້າ-ສັດປ່າ ທັງພ້ອມກັນສ້າງສະພາບແວດລ້ອມທີ່ດີໃຫ້ທຳມະຊາດເພື່ອເຮັດໃຫ້ແຕ່ລະທ້ອງຖິ່ນມີຄວາມອຸດົມສົມບູນທາງດ້ານທຳມະ ຊາດໃຫ້ນັບມື້ຫລາຍຂຶ້ນ, ເປັນການປຸກຈິດສຳນຶກ ແລະທັງເປັນການປຸກລະດົມໃຫ້ທາງບໍລິສັດໄດ້ຮ່ວມແຮງຮ່ວມໃຈກັນຢ່າງຈິ່ງຈັງ, ໃຫ້ແກ່ອານຸຊົນລຸ້ນຫຼັງຮູ້ຮັກທໍາມະຊາດ ແລະ ຍັງໄດ້ຊຸກຍູ້ສົ່ງເສີມໃຫ້ປະຊາຊົນຫັນມາປູກຕົ້ນໄມ້ໃຫ້ໝາກ, ໄມ້ອຸດສາຫະກໍາ ແລະ ໄມ້ອື່ນໆໃຫ້ກາຍເປັນປ່າໄມ້ປົກຫຸ້ມ, ພ້ອມທັງເປັນເຈົ້າການປົກປັກຮັກສາສັດນໍ້າ-ສັດປາໃຫ້ຢູ່ຄຽງຄູກັບທໍາມະຊາດ ແລະສະພາບແວດລ້ອມໃຫ້ມີຄວາມສົມດູນ ພ້ອມກັນປົກປັກຮັກສາ ແລະແກ້ໄຂສິ່ງແວດລ້ອມ, ສະນັ້ນທຸກພາກສ່ວນໃນສັງຄົມຈົ່ງຮ່ວມແຮງຮ່ວມໃຈກັນປົກປັກຮັກສາສິ່ງແວດລ້ອມໂດຍຫັນປ່ຽນພຶດຕິກຳ ແລະຈິນຕະນາການຈາກການພັດທະນາເສດຖະດິດ-ສັງຄົມທີ່ທຳລາຍສິ່ງແວດ ລ້ອມ ມາເປັນການພັດທະນາທີ່ເປັນມິດຕໍ່ສິ່ງແວດລ້ອມເພື່ອໃຫ້ມີຄວາມຍືນຍົງ ແລະຍາວນານ.
ເບ້ຍໄມ້ທີນຳມາປູກໃນຄັ້ງນີ້ມີ: ຕົ້ນໝາກມ່ວງ
ຕົ້ນໝາກມີ້, ຕົ້ນໝາກຂາມ, ຕົ້ນໝາກລຳໃຍ, ຕົ້ນໝາກອາໂວກາໂດ້, ຕົ້ນໝາກກ້ຽງ, ຕົ້ນໝາກສີດາ, ຕົ້ນໝາກສົ້ມໂອ, ຕົ້ນໝາກເງາະ ແລະ ຕົ້ນໝາກລຳມຸດ ລວມທັງໝົດ 250 ຕົ້ນ ພ້ອມນີ້ຍັງໄດ້ປ່ອຍປາໃສ່ອ່າງນໍ້າກົງ 1 ຊະນິດພັນປາມີ: ປາປາກ, ປານວນຈັນ, ປາກົດ, ປາສະຫວາຍ ລວມທັງໝົດ: 100,000 ໂຕ ພ້ອມນີ້ໃນພິທີ ຍັງໄດ້ມີການມອບອຸປະກອນການຮຽນ ໃຫ້ນ້ອງນັກຮຽນໃນບ້ານເປົ້າໝາຍຂອງໂຄງການ ພ້ອມທັງຮ່ວມປູກຕົ້ນໄມ້, ປ່ອຍປາ ແລະ ພານ້ອງນັກຮຽນທ່ຽວຊົມພ້ອມສຶກສາເຂດໂຄງການກໍ່ສ້າງເຂື່ອນໄຟຟ້າຈຳນວນໜຶ່ງຕື່ມອີກ.
ໂດຍ: ໄພບູນ

แชร์