ລອງແທ່ງ-ວຽງຈັນ ມອບ 3,8 ຕື້ກີບ ຊ່ວຍສະຫະພັນນັກຮົບເກົ່າ

ໃນວັນທີ 11 ເມສາຜ່ານມາ ທ່ານ ເລວັນກ໋ຽມ ຄະນະກໍາມະການປະຈຳສະຫະພັນນັກຮົບເກົ່າແຫ່ງ ສສ ຫວຽດນາມ, ປະທານສະພາບໍລິຫານບໍລິສັດຫຸ້ນສ່ວນລົງທືນ ແລະທຸລະກິດກ໊ອຟລອງແທ່ງ, ປະທານສະພາບໍລິຫານເຂດເສດຖະກິດສະເພາະລອງແທ່ງ-ວຽງຈັນ ໄດ້ນຳເອົາເງິນຈຳນວນ 450.000 ໂດລາ ຫຼື ປະ ມານ 3,8 ຕື້ກີບ ມາມອບໃຫ້ສະຫະພັນນັກຮົບເກົ່າແຫ່ງ ສປປ ລາວ ຊຶ່ງຕ່າງໜ້າມອບໂດຍທ່ານ ເລຮຸຍ ຮວ່າງ ຮອງປະທານສະພາບໍລິຫານ, ອຳນວຍການບໍລິສັດ KN ກຣຸບ ແລະຮັບໂດຍ ທ່ານ ພົນຈັດຕະວາ ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງ ສປປ ລາວ ໂດຍມີພາກສ່ວນກ່ຽວຂອງທັງ ສອງຝ່າຍເຂົ້າຮ່ວມ.

 ຊຶ່ງເງິນທີນຳມາມອບໃນຄັ້ງນີ້, ຈະໄດ້ນຳໃຊ້ເຂົ້າໃນກອງທຶນພັດທະນາເສດຖະກິດນັກຮົບເກົ່າໂດຍຈະນຳໄປຝາກທະນາຄານເພື່ອນຳໃຊ້ເງິນດອກເບ້ຍເງິນຝາກເຂົ້າໃນບັນດາການເຄື່ອນໄຫວຕ່າງໆເປັນຕົ້ນຫັກ 60% ຂອງດອກເບ້ຍເງິນຝາກແຕ່ລະປີໃຫ້ບັນດານັກຮົບເກົ່າກູ້ຢືມເພື່ອສ້າງເສດຖະກິດຄອບຄົວແບບບໍ່ ມີດອກເບ້ຍ ແລະ ບໍ່ຕ້ອງມີຊັບສິນຄ້ຳປະກັນ, ຊ່ວຍເຫຼືອແກ້ໄຂຄວາມຫຍຸ້ງຍາກແບບກະທັນຫັນ ຫຼື ມີເຫດບັງເອີນຂອງບັນດາອ້າຍນ້ອງນັກຮົບເກົ່າທີ່ເກີດ ມີການເສຍຫາຍທາງດ້ານຊັບສິນ, ເຮືອນຊານ, ບ້ານຊ່ອງໂດຍທີ່ບໍ່ຄາດຄິດຍ້ອນໄພທຳມະຊາດ, ນຳໃຊ້ເຂົ້າໃນການຢ້ຽມຢາມບັນດານັກຮົບເກົ່າທີ່ປ່ວຍໜັກ ແລະ ທຸກຍາກ, ເງິນອຸດໜູນໃນແຕ່ລະເດືອນສຳລັບບັນດາລູກຫຼານຂອງນັກຮົບຜູ້ເສຍສະຫຼະຊີວິດ, ທະຫານທີ່ໄດ້ຮັບບາດເຈັບໜັກ,ຖືກທາດຜິດເຄມີ, ມອບຂອງຂວັນໃຫ້ກັບລູກຫຼານຂອງບັນດານັກຮົບເກົ່າທີ່ມີສະຖານະການພິເສດ; ຫັກ 40% ຈໍານວນເງິນດອກເບ້ຍເພື່ອມອບຕື່ມເຂົ້າໃນກອງທຶນໂຮມໃສ່ກັບຕົ້ນທຶນຊຶ່ງຈະເຮັດໃຫ້ເງິນກອງທຶນໄດ້ຮັບການຂະຫຍາຍຂຶ້ນເລື້ອຍໆ ແລະເງິນທຶນຈະຄົງຢູ່ຕະຫຼອດໄປ.

  ໃນໄລຍະຜ່ານມາທ່ານ ເລວັນ ກ໋ຽມ ພ້ອມດ້ວຍຄອບຄົວໄດ້ເຮັດວຽກສັງຄົມສົງເຄາະ ແລະຕອບບຸນແທນຄຸນໃຫ້ແກ່ປະເທດລາວຊຶ່ງລວມເປັນເງິນປະມານ 5 ລ້ານໂດລາ ເຂົ້າໃນບັນດາວຽກງານຕ່າງເຊັ່ນ: ສ້າງໂຮງຮຽນມັດຖະຍົມສຶກສາຈຳນວນ 2 ຫຼັງ, ສ້າງໂຮງຮຽນປະຖົມສຶກສາຈຳນວນ 2 ຫຼັງ, ສ້າງສຸກສາລາ ຈຳນວນ 1 ຫຼັງ, ສະໜັບສະໜູນແຫຼ່ງທຶນໃຫ້ການຜ່າຕັດຕາໃຫ້ແກ່ຄົນທຸກຍາກຫຼາຍກວ່າ 2 ພັນຄົນ, ລົງທຶນຊື້ອຸປະກອນເຄື່ອງມືໃຫ້ແກ່ສະຖານີໂທລະພາບແຂວງເຊກອງ, ປະກອບສ່ວນ 4 ແສນໂດລາໃຫ້ແກ່ການກໍ່ສ້າງອະນຸສອນສະຖານນັກຮົບປະຕິວັດ, ປະກອບສ່ວນ 3 ແສນໂດລາ ເຂົ້າໃນການກໍ່ສ້າງສີລາຈາລຶກລາຍຊື່ທະຫານຮ່ວມສຳພັນສູ້ຮົບຫວຽດ-ລາວ ທີ່ເສຍສະລະໃນປີ 1946 ທີ່ບ້ານເກິນ, ຊ່ວຍເຫຼືອກໍ່ສ້າງຫໍຈາລຶກເສັ້ນທາງເລກ 9 ພາກໃຕ້ຂອງລາວ ແລະອື່ນໆ.

ຂ່າວ: ວົງມະນີ  

แชร์