ຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີເວທີການເມືອງລະດັບສູງເພື່ອການພັດທະນາແບບຍືນຍົງ ປະຈໍາປີ 2024

ໃນລະຫວ່າງວັນທີ 15-17 ກໍລະກົດ ນີ້ ທີ່ ນິວຢອກ ສ ອາເມຣິກາ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີເວທີການເມືອງລະດັບສູງ ເພື່ອການພັດທະນາແບບຍືນຍົງປະຈຳປີ 2024 (The Ministerial meeting of the High-Level Political Forum on Sustainable Development - HLPF), ພາຍໃຕ້ຫົວຂໍ້: ຊຸກຍູ້ວາລະ 2030 ແລະ ການລຶບລ້າງຄວາມທຸກຍາກໃນທ່າມກາງສະພາບວິກິດການຫຼາຍດ້ານ: ການຈັດຕັ້ງປະຕິບັດແນວທາງແກ້ໄຂບັນຫາແບບຍືນຍົງ, ການສ້າງຄວາມເຂັ້ມແຂງ ແລະ ນະວັດຕະກຳຢ່າງມີປະສິດທິຜົນ (Reinforcing the 2030 Agenda and eradicating poverty in times of multiple crises: the effective delivery of sustainable, resilient and innovative solutions). ກອງປະຊຸມ ຈະໄດ້ທົບທວນຄວາມຄືບໜ້າໃນການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ, ໂດຍລົງເລິກ 5 ເປົ້າໝາຍການພັດທະນາແບບຍືນຍົງ (ປພຍ) ຄື ປພຍ 1 ລຶບລ້າງຄວາມທຸກຍາກ; ປພຍ 2: ລຶບລ້າງໄພອຶດຫິວ; ປພຍ 13: ມີແຜນການຮັບມືກັບການປ່ຽນແປງຂອງດິນຟ້າອາກາດ; ປພຍ 16: ມີສັນຕິພາບ, ຄວາມຍຸຕິທຳ ແລະ ສະຖາບັນທີ່ເຂັ້ມແຂງ; ແລະ ປພຍ 17: ເປັນຄູ່ຮ່ວມມືເພື່ອເປົ້າ ໝາຍການພັດທະນາແບບຍືນຍົງໃນສະພາບການທີ່ຫຼາຍປະເທດໃນທົ່ວໂລກກໍາລັງຮັບມືກັບຄວາມຫຍຸ້ງຍາກທາງດ້ານເສດຖະກິດທີ່ມີຜົນກະທົບມາຈາກວິກິດການຕ່າງໆໃນໄລຍະຜ່ານມາ.

ໃນວັນທີ 15 ກໍລະກົດ, ທ່ານ ສະເຫຼີມໄຊ ກົມມະສິດ ໄດ້ຂຶ້ນກ່າວຄຳເຫັນທັງໃນນາມອາຊຽນ ແລະໃນນາມ ສປປ ລາວ ໃນກອງປະຊຸມພາກອະພິປາຍທົ່ວໄປ ຊຶ່ງໃນນັ້ນທ່ານໄດ້ເນັ້ນໜັກເຖິງຜົນກະທົບທີ່ແກ່ຍາວມາຈາກວິກິດການຕ່າງໆຂອງສາກົນ, ລວມທັງຄວາມເຄັ່ງຕຶງທາງດ້ານພູມສາດການເມືອງ ແລະການຄ້າ, ຂໍ້ຫຍຸ້ງຍາກດ້ານເສດຖະກິດ, ລະບົບການເງິນ ແລະ ບັນຫາການປ່ຽນແປງຂອງດິນຟ້າອາກາດທີ່ມີຜົນຕໍ່ການຈັດຕັ້ງປະຕິບັດວາລະ 2030 ກໍຄືບັນດາເປົ້າໝາຍການພັດທະນາແບບຍືນຍົງ ແລະການພັດທະນາເສດຖະກິດ-ສັງຄົມ ໂດຍລວມພ້ອມທັງໄດ້ຮຽກຮ້ອງໃຫ້ບັນດາປະເທດສະມາຊິກຍົກລະດັບການຮ່ວມມືຢ່າງຮອບດ້ານ ແລະສະໜອງການຊ່ວຍເຫຼືອດ້ານຕ່າງໆໂ ດຍສະເພາະການຊ່ວຍເຫຼືອບັນດາປະເທດທີ່ມີສະພາບເງື່ອນໄຂພິເສດເປັນຕົ້ນປະເທດດ້ອຍພັດທະນາຄຽງຄູ່ກັບການຂັບເຄື່ອນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດເພື່ອບັນລຸ ປພຍ ພາຍໃນປີ 2030 ແລະ ພ້ອມກັນກ້າວໄປເພື່ອການພັດທະນາຢ່າງຍືນຍົງໃນອະນາຄົດ.

ພິເສດໃນກອງປະຊຸມປີນີ້, ທ່ານ ສະເຫຼີມໄຊ ກົມມະສິດ ໄດ້ຂຶ້ນນໍາສະເໜີບົດລາຍງານແຫ່ງຊາດແບບສະໝັກໃຈສະບັບທີ 3 ຂອງ ສປປ ລາວ ກ່ຽວກັບການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (Voluntary National Review-VNR),ໂດຍທ່ານໄດ້ຊີ້ໃຫ້ເຫັນຄວາມໝາຍໝັ້ນອັນແຮງກ້າຂອງລັດຖະບານໃນການຈັດຕັ້ງວາລະ 2030 ຄຽງຄູ່ກັບເປົ້າໝາຍທີ່ເປັນບຸລິມະສິດດ້ານການພັດທະນາປະເທດ ໂດຍຜ່ານການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມແຫ່ງຊາດ 5 ປີ ຄັ້ງທີ IX ຊຶ່ງເຫັນວ່າໄດ້ຮັບຜົນສໍາເລັດ ແລະ ຄວາມຄືບໜ້າໃນຫຼາຍດ້ານ ເວົ້າລວມ, ເວົ້າສະເພາະແມ່ນສາມາດສືບຕໍ່ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ການພັດທະນາເສດຖະກິດ-ສັງຄົມຄ່ອຍໆໄດ້ຮັບການຟຶ້ນຟູອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນບັນດາຊົນເຜົ່າໄດ້ຮັບການປັບປຸງດີຂຶ້ນ. ເຖິງຢ່າງໃດກໍຕາມ, ເນື່ອງຈາກຜົນກະທົບຈາກໄພພິບັດທໍາມະຊາດ ແລະ ວິກິດການຕ່າງໆຈາກພາກພື້ນ ແລະສາກົນໃນໄລຍະຜ່ານມາລວມໄປເຖິງສະພາບໄພເງິນເຟີ້ໄດ້ເຮັດໃຫ້ອັດຕາການຂະຫຍາຍຕົວຂອງເສດຖະກິດໃນຊຸມປີຜ່ານມາບໍ່ໄດ້ຕາມແຜນການທີ່ວາງໄວ້. ຕໍ່ໜ້າສະພາບການດັ່ງກ່າວ, ມັນໄດ້ຮຽກຮ້ອງໃຫ້ພວກເຮົາຕ້ອງໄດ້ສືບຕໍ່ເຮັດວຽກຮ່ວມກັນຢ່າງໃກ້ຊິດ, ພ້ອມກັນຕັດສິນໃຈຢ່າງກ້າຫານ ແລ ະຮ່ວມແຮງຮ່ວມໃຈກັນຈັດຕັ້ງປະຕິບັດວາລະດ້ານການພັດທະນາຂອງປະເທດ ແລະ ສາກົນ. ໃນນັ້ນ, ສປປ ລາວ ຈະສືບຕໍ່ພັດທະນາເສດຖະກິດຕາມແນວທາງຍຸດທະສາດການພັດທະນາແບບຍືນຍົງ ແລະສີຂຽວ, ຄຽງຄູ່ກັບການເຊື່ອມສານ ປພຍ ເຂົ້າໃນແຜນພັດທະນາເສດຖະກິດ-ສັງຄົມ, ກໍຄືການສ້າງພື້ນຖານເສດຖະກິດໃຫ້ມີຄວາມເຂັ້ມແຂງ ແລະ ສ້າງເງື່ອນໄຂທີ່ເອື້ອອໍານວຍເພື່ອນຳພາປະເທດຂ້າມຜ່ານອຸປະສັກ ແລະ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນອະນາຄົດ.

ຂະບວນການສົ່ງບົດລາຍງານແຫ່ງຊາດແບບສະໝັກໃຈແມ່ນກົນໄກໜຶ່ງ ຂອງອົງການ ສປຊ ໃນການລາຍງານຄວາມຄືບໜ້າ ແລະ ສິ່ງທ້າທາຍໃນການຈັດຕັ້ງປະຕິບັດ ປພຍ ໃນແຕ່ລະໄລຍະ. ບົດລາຍງານສະບັບທີ 3 ຂອງ ສປປ ລາວ ແມ່ນໄດ້ວິເຄາະວິໄຈທ່າອ່ຽງລວມຂອງທັງໝົດ 18 ເປົ້າໝາຍ ແລະ ການວິເຄາະວິໄຈແບບລົງເລິກບັນດາເປົ້າໝາຍທີ່ເຫັນວ່າເປັນບຸລິມະສິດສໍາຄັນ ແລະ ເຫັນຄວນເອົາໃຈໃສ່ຕື່ມພ້ອມທັງປິ່ນອ້ອມກັບ 6 ແນວທາງການຫັນປ່ຽນຂອງເລຂາທິການໃຫຍ່ອົງການ ສປຊ ໃນການຂັບເຄື່ອນການຈັດຕັ້ງປະຕິບັດວາລະສາກົນແຕ່ນີ້ຮອດປີ​ 2030 ໂດຍໄດ້ສະທ້ອນໃຫ້ເຫັນຜົນຂອງການຈັດຕັ້ງປະຕິບັດກາງສະໄໝຂອງແຜນປະຕິບັດງານແຫ່ງຊາດ 5 ປີ ຄັ້ງທີ IX ເຂົ້າໃນການລາຍງານ ແລະ ໄດ້ລົງເລິກໃນ 11 ເປົ້າໝາຍການພັດທະນາແບບຍືນຍົງທີ່ເປັນບຸລິມະສິດຂອງ ສປປ ລາວ ຄື: ປພຍ 1: ລຶບລ້າງຄວາມທຸກຍາກ, ປພຍ 2: ລຶບລ້າງຄວາມອຶດຫິວ, ປພຍ 3: ການມີສຸຂະພາບ ແລະ ຊີວິດການເປັນຢູ່ທີ່ດີ, ປພຍ 4: ການສຶກສາທີ່ມີຄຸນນະພາບ, ປພຍ 5: ຄວາມສະເໝີພາບລະຫວ່າງຍິງ-ຊາຍ, ປພຍ 7: ພະລັງງານທີ່ສະອາດ, ປພຍ 8: ການມີວຽກເຮັດງານທໍາທີ່ມີກຽດ ແລະ ເສດຖະກິດມີການຂະຫຍາຍໂຕ, ປພຍ 9: ການຫັນເປັນອຸດສາຫະກໍາ, ປພຍ13: ມີແຜນຮັບມືກັບການປ່ຽນແປງດິນຟ້າອາກາດ, ປພຍ 17: ເປັນຄູ່ຮ່ວມເພື່ອເປົ້າໝາຍການພັດທະນາແບບຍືນຍົງ ແລະ ປພຍ 18: ຊີວິດປອດໄພຈາກລະເບີດບໍ່ທັນແຕກຊຶ່ງເປັນເປົ້າໝາຍແຫ່ງຊາດ.

ພ້ອມກັນນັ້ນ, ໃນໄລຍະກອງປະຊຸມດັ່ງກ່າວນີ້ ສປປ ລາວ ຍັງໄດ້ຈັດກອງປະຊຸມປິ່ນອ້ອມ (Side Event) ຮ່ວມກັບປະເທດອາແຊກໄບຊານ ໂດຍການເປັນປະທານຮ່ວມຂອງທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ຂອງ ສປປ ລາວ ແລະ ຮອງລັດຖະມົນຕີກະຊວງເສດຖະກິດ ຂອງ ປະເທດອາແຊັກໄບຊານ, ພາຍໃຕ້ຫົວຂໍ້: ການເກັບກູ້ລະເບີດບໍ່ທັນແຕກທີ່ຕົກຄ້າງ/ລະເບີດຝັງດິນເພື່ອການບັນລຸເປົ້າໝາຍການພັດທະນາແບບຍືນຍົງ ແລະພ້ອມກັນກ້າວໄປ (UXO/Mine Action to Attain the Sustainable Development Goals and Leave No One Behind) ຊຶ່ງເປັນຫົວຂໍ້ທີ່ຕິດພັນກັບ ປພຍ ແຫ່ງຊາດຂອງ ສປປ ລາວແມ່ນ ປພຍ 18: ຊີວິດປອດໄພຈາກລະເບີດຕົກຄ້າງທີ່ບໍ່ທັນແຕກ (Lives Safe from UXO) ແລະອາແຊກໄບຊານແມ່ນ ປພຍ 18: ການເກັບກູ້ລະເບີດຝັງດິນ (Mine Action). ນອກຈາກນັ້ນ, ໂດຍເຫັນໄດ້ຄວາມສຳຄັນຂອງວຽກງານເກັບກູ້ລະເບີດບໍ່ທັນແຕກທີ່ຕົກຄ້າງ, ສປປ ລາວ ກໍໄດ້ມີການຈັດງານວາງສະແດງແຜ່ນຜ້າ​ທີ່​ຖືກ​ຕ່ຳ​ ແລະ ແຕ້ມເປັນ​ລວດ​ລາຍ​​ຮູບ​ພາບການ​ເລົ່າ​ເລື່ອງ​ຜົນ​ກະ​ທົບ​ຂອງລະເບີດບໍ່ທັນແຕກ​ທີ່ຕົກຄ້າງ ຕໍ່​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ, ສະ​ແດງ​ໃຫ້​ເຫັນ​ຜົນ​ໄດ້​ຮັບ​ຈາກ​ການກວດ​ກູ້ລະເບີດບໍ່ທັນແຕກ​ທີ່​ໄດ້​ຊ່ວຍປົກ​ປັກ​ຮັກ​ສາ​ຊີ​ວິດ ແລະ ​ພັດ​ທະ​ນາ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໃຫ້​ດີ​ຂຶ້ນ. ການຈັດງານທັງສອງນີ້ແມ່ນແນໃສ່ເຜີຍ​ແຜ່ແນວທາງນະໂຍບາຍ ແລະ ສ້າງ​ຄວາມ​ຮັບ​ຮູ້​ກ່ຽວ​ກັບ​ຜົນ​ກະ​ທົບຂອງ ລບ​ຕ ຢູ່ ສ​ປ​ປ ລາວ, ເພີ່ມ​ຄວາມ​ເຂົ້າ​ໃຈ​ເຖິງ​ຜົນ​ກະ​ທົບ​ທີ່​ມີ​ຕໍ່​ປະ​ຊາ​ຊົນ​ ແລະ ​ການ​ດຳ​ລົງ​ຊີ​ວິດ​ປະ​ຈຳ​ວັນຂອງເຂົາເຈົ້າທີ່​ຍັງ​ຕ້ອງ​ໄດ້​ໃຊ້​ຊີ​ວິດ​ກັບ​ຄວາມ​ສ່ຽງ​ຈາກ​ລະ​ເບີດ​ບໍ່​ທັນ​ແຕກ ແລະ ລະດົມ​ການຮ່ວມມື​ສະ​ໜັບ​ສະ​ໜູນ​ຕໍ່​ວຽກ​ງານ​ດັ່ງ​ກ່າວ ຈາກວົງຄະນາຍາດສາກົນ.
ຂ່າວ: ກຕປ

แชร์