ໄຟຟ້າ ຫົງສາ ສະໜອງລູກປາ 55.000 ໂຕ ໃຫ້ 3 ເມືອງ ແຂວງໄຊຍະບູລີ

ເນື່ອງໃນໂອກາດ ວັນປ່ອຍປາ ແລະ ວັນອະນຸລັກສັດນໍ້າ-ສັດປ່າ ແຫ່ງຊາດ ທີ່ຈະມາເຖິງນີ້, ບໍລິສັດ ໄຟຟ້າ ຫົງສາ ຈໍາກັດ ສະໜອງລູກປາ 55.000 ໂຕ ມູນຄ່າ 38 ລ້ານກວ່າກີບ ໃນນີ້, ໃຫ້ເມືອງຫົງສາ 25.000 ໂຕ, ເມືອງເງິນ 15.000 ໂຕ ແລະ ເມືອງຊຽງຮ່ອນ 15.000 ໂຕ ເພື່ອເປັນການອະນຸລັກສັດນໍ້າ, ຮັກສາຄວາມສົມດຸນໃຫ້ກັບທໍາມະຊາດ ແລະ ສິ່ງແວດລ້ອມຕະຫລອດເຖິງການຄືນຄວາມສົມບູນໃຫ້ກັບແຫລ່ງນໍ້າທໍາມະຊາດໃຫ້ຄົງຢູ່ກັບຊຸມຊົນຕໍ່ໄປ.

ກິດຈະກໍາວັນປ່ອຍປາ ແລະວັນອະນຸລັກສັດນໍ້າ-ສັດປ່າ ແຫ່ງຊາດ ປະຈໍາປີ 2024 ຂອງເມືອງຫົງສາ, ເມືອງເງິນ ແລະເມືອງຊຽງຮ່ອນ ໄດ້ຈັດຂຶ້ນໃນວັນທີ 12 ກໍລະກົດ 2024 ໂດຍມີຄະນະຜູ້ບໍລິຫານ ແລະ ພະນັກງານ ບໍລິສັດ ໄຟຟ້າ ຫົງສາ ຈໍາກັດ ເປັນຕົວແທນເຂົ້າຮ່ວມງານດັ່ງກ່າວ, ເຊິ່ງເມືອງຫົງສາ ຈັດທີ່ໜ້າເຂື່ອນນໍ້າແກ່ນ ໂດຍການເປັນປະທານຂອງ ທ່ານ ຈັນເພັງ ອູ່ທອງຄຳ ຮອງເຈົ້າເມືອງໆຫົງສາ, ທ່ານ ຈິລະສັກ ທິບບໍາລຸງ ຮອງຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ ສາຍງານບໍ່ແຮ່ ບໍລິສັດ ໄຟຟ້າ ຫົງສາ ຈໍາກັດ.

ສຳລັບເມືອງເງິນ ຈັດທີ່ທ່າຊ່ວງເຮືອ ອ່າງນໍ້າຫ້ວຍນານ້ອຍໂດຍການເປັນປະທານຂອງທ່ານ ທະວີສັກ ໄຊຍະວົງ ເຈົ້າເມືອງໆເງິນ ແລະທ່ານ ຍຸດທະນາ ຈຸນພັນທອງ ຜູ້ອໍານວຍການສາຍງານກິດຈະການອົງກອນ ບໍລິສັດ ໄຟຟ້າ ຫົງສາ ຈໍາກັດ. ສ່ວນເມືອງຊຽງຮ່ອນ ຈັດທີ່ ບ້ານປົ່ງ ເມືອງຊຽງຮ່ອນ ໂດຍການເປັນປະທານຂອງ ທ່ານ ແສງອາທິດ ລາວເບລຍຢາທໍ່ ເຈົ້າເມືອງໆຊຽງຮ່ອນ ແລະ ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ.

แชร์