ສປປ ລາວ ກຽມພ້ອມຮອບດ້ານ ເປັນເຈົ້າພາບກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57

ສປປ ລາວ ມີຄວາມພ້ອມຮອບດ້ານ ໃນການເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນໆ ທີ່ກ່ຽວຂ້ອງ  ເຊິ່ງຈະຈັດຂຶ້ນໃນລະຫວ່າງວັນທີ 21-27 ກໍລະກົດ 2024 ຢູ່ຫໍປະຊຸມແຫ່ງຊາດ, ນະຄອນຫລວງວຽງຈັນ.

 ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 11 ກໍລະກົດ 2024 ກ່ຽວກັບການກະກຽມຄວາມພ້ອມ ເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນໆທີ່ກ່ຽວຂ້ອງ ໂດຍທ່ານ ໄດ້ຍົກໃຫ້ເຫັນ ຄວາມຄືບໜ້າໃນການກະກຽມເປັນເຈົ້າພາບ ຈັດກອງປະຊຸມດັ່ງກ່າວ. ມາຮອດປັດຈຸບັນ, ບັນດາອະນຸກຳມະການຮັບຜິດຊອບ ແຕ່ລະໜ້າວຽກ ກໍຄືຂະແໜງການທີ່ກ່ຽວຂ້ອງ ໄດ້ສຸມໃສ່ກະກຽມຄວາມພ້ອມຮອບດ້ານ ເຊັ່ນ: ດ້ານເນື້ອໃນ, ດ້ານສະຖານທີ່ພັກເຊົາ, ຍານພາຫະນະ ຮັບໃຊ້ກອງປະຊຸມ, ການໂຄສະນາ, ການປະດັບປະດາ, ການປັບປຸງຖະໜົນຫົນທາງ ແລະ ສະໜາມບິນ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການສື່ສານ ແລະ ອິນເຕີເນັດ, ບຸກຄະລາກອນ, ແຜນງົບປະມານ, ສະຖານທີ່ທ່ອງທ່ຽວ ແລະ ອື່ນໆ ທີ່ມີຄວາມຈຳເປັນ ເຊິ່ງເຫັນວ່າມີຄວາມຄືບໜ້າເປັນຢ່າງດີໃນທຸກດ້ານ ແລະ ມີຄວາມພ້ອມຢ່າງຮອບດ້ານ ໃນການເປັນປະທານ ແລະ ເຈົ້າພາບກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 57 ແລະ ກອງປະຊຸມອື່ນໆ ທີ່ກ່ຽວຂ້ອງ ທີ່ຈະຈັດຂຶ້ນໃນທ້າຍເດືອນ ກໍລະກົດ ນີ້.

ທ່ານ ສະເຫຼີມໄຊ ກົມມະສິດ ຍັງໃຫ້ຮູ້ອີກວ່າ: ການເປັນປະທານອາຊຽນ ຂອງ ສປປ ລາວ ໃນປີ 2024 ນີ້,  ແມ່ນພາຍໃຕ້ຄຳຂວັນ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ ຫລື ພາສາອັງກິດແມ່ນ “ASEAN: Enhacning Connectivity and Resilience” ເຊິ່ງໄດ້ກຳນົດ 9 ບຸລິມະສິດ ສຳລັບການເປັນປະທານອາຊຽນ ເພື່ອຜັນຂະຫຍາຍຄຳຂວັນ ປະທານອາຊຽນ ດັ່ງກ່າວ ເຊິ່ງປະກອບມີ 2 ກຸ່ມຄື: ພາຍໃຕ້ “ເພີ່ມທະວີການເຊື່ອມຈອດອາຊຽນ” ມີ 4 ບຸລິມະສິດ ແລະ ພາຍໃຕ້ “ເພີ່ມທະວີຄວາມເຂັ້ມແຂງອາຊຽນ” ມີ 5 ບຸລິມະສິດ.

ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ຈະໄດ້ຮັບຮອງເອົາຖະແຫລງການຂອງລັດຖະມົນຕີຕ່າງປະເທດ ຫລື Joint Communiqué ເຊິ່ງປັດຈຸບັນ, ໜ່ວຍງານວິຊາການກຳລັງເຈລະຈາຮ່າງຖະແຫລງການດັ່ງກ່າວ ແລະ ເຫັນວ່າມີຄວາມຄືບໜ້າດີ. ພ້ອມນີ້, ຍັງຈະໄດ້ສຸມໃສ່ປຶກສາຫາລືການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ການສ້າງແຜນຍຸດທະສາດ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045 ເຊິ່ງ ສປປ ລາວ ເຮົາໄດ້ເປັນປະທານຮ່ວມກັບມາເລເຊຍ ໃນນາມປະທານອາຊຽນ ຜູ້ຕໍ່ໄປ ນຳພາການຮ່າງແຜນຍຸດທະສາດເພື່ອຈັດຕັ້ງວິໄສທັດປະຊາຄົມ 2045 ເຊິ່ງປະກອບດ້ວຍແຜນຍຸດທະສາດປະຊາຄົມການເມືອງ-ຄວາມໝັ້ນຄົງອາຊຽນ, ແຜນຍຸດທະສາດປະຊາຄົມ ເສດຖະກິດອາຊຽນ, ແຜນຍຸດທະສາດປະຊາຄົມວັດທະນະທຳ-ສັງຄົມອາຊຽນ ແລະ ແຜນຍຸດທະສາດການເຊື່ອມຈອດອາຊຽນ. ສຳລັບ ການຮ່ວມມືລະຫວ່າງອາຊຽນ ກັບ ພາຍນອກ, ອາຊຽນກໍຈະໄດ້ຮ່ວມກັບ 11 ຄູ່ເຈລະຈາ ທົບທວນການຮ່ວມມື ແລະ ກໍານົດແຜນການຮ່ວມມືໃນຕໍ່ໜ້າ ແນໃສ່ປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ໃນໂອກາດນີ້, ສປປ ລາວ ກໍຈະໄດ້ເປັນປະທານຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕາລີ ໃນນາມປະເທດປະສານງານ (2021-2024). ຫລັງຈາກນັ້ນ, ສປປ ລາວ ກໍຈະຮັບໜ້າທີ່ເປັນປະເທດປະສານງານ ສໍາລັບ ອາຊຽນ-ການາດາ (2024-2027) ແລະ ເປັນປະທານຮ່ວມ ອາຊຽນບວກສາມ, ເປັນປະທານກອງປະຊຸມລັດຖະມົນຕີ ຕ່າງປະເທດ ຂອງກອງປະຊຸມສຸດຍອດອາຊີຕາເວັນອອກ (EAS ເຊິ່ງມີ 19 ປະເທດເຂົ້າຮ່ວມ) ແລະ ກອງປະຊຸມເວທີພາກພື້ນອາຊຽນ ຄັ້ງທີ 31 ມີ 27 ປະເທດເຂົ້າຮ່ວມ.

ນອກຈາກນີ້, ກໍຍັງຈະມີກອງປະຊຸມປິ່ນອ້ອມອື່ນໆ ກັບປະເທດຄູ່ຮ່ວມມືຂະແໜງການຕ່າງໆ ແລະ ຄູ່ຮ່ວມມືແມ່ນໍ້າຂອງນຳອີກ. ສັງລວມແລ້ວຈະມີກອງປະຊຸມປະມານ 25 ກອງປະຊຸມ ແລະ ມີລັດຖະມົນຕີຕ່າງປະເທດ ຕາງໜ້າ 35 ປະເທດເຂົ້າຮ່ວມ. ສໍາລັບ ເອກະສານທີ່ຈະຮັບຮອງ, ຮັບຊາບ ແລະ ຈະອອກໃນກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ນີ້ ມີປະມານ 29 ສະບັບ. ໃນນັ້ນ, ເອກະສານທີ່ຈະຮັບຮອງມີ 14 ສະບັບ, ເອກະສານທີ່ຈະຮັບຊາບ ມີ 10 ສະບັບ ແລະ ເອກະສານທີ່ ຈະອອກມີ 5 ສະບັບ ໃນນີ້ລວມມີຖະແຫລງການຮ່ວມ ຂອງລັດຖະມົນຕີຕ່າງປະເທດອາຊຽນ ຄັ້ງທີ 57 ເຊິ່ງຖືວ່າເປັນເອກະສານທີ່ສຳຄັນອັນໜຶ່ງ ຂອງກອງປະຊຸມ. ນອກນັ້ນ, ກໍມີເອກະສານສຳຄັນອື່ນໆ ເປັນຕົ້ນບັນດາຖະແຫລງການຮ່ວມຕ່າງໆລະຫວ່າງ ອາຊຽນ ແລະ ຄູ່ເຈລະຈາຂອງອາຊຽນ ພວມຢູ່ໃນຂັ້ນຕອນການປຶກສາຫາລືລະຫວ່າງອາຊຽນ ແລະ ຄູ່ເຈລະຈາທີ່ກ່ຽວຂ້ອງ.

ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ມີຄວາມສຳຄັນຫລາຍ ເພາະຈະເປັນການກະກຽມໃຫ້ແກ່ ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ກໍຄື ກອງປະຊຸມສຸດຍອດອື່ນໆກ່ຽວຂ້ອງ ທີ່ຈະຈັດຂຶ້ນໃນວັນທີ 8-11 ຕຸລາ 2024 ແລະ ຜົນສໍາເລັດຂອງການເປັນເຈົ້າພາບ ແລະ ເປັນປະທານກອງປະຊຸມ ດັ່ງກ່າວ, ຈະເປັນການຍົກສູງ ບົດບາດຂອງ ສປປ ລາວ ໃນເວທີພາກພື້ນ ແລະ ສາກົນ. ພ້ອມກັນນັ້ນ, ກໍເປັນການສ້າງໂອກາດ ໃນການຊຸກຍູ້ ແລະ ສົ່ງເສີມການຄ້າ, ການລົງທຶນ, ທ່ອງທ່ຽວ ແລະ ໂຄສະນາເຜີຍແຜ່ ຮີດຄອງປະເພນີອັນດີງາມຂອງຊາດລາວ ໃຫ້ບັນດາຄະນະຜູ້ແທນ ແລະ ນັກຂ່າວ ຈາກປະເທດ ສະມາຊິກອາຊຽນ, ຄູ່ເຈລະຈາ ແລະ ຄູ່ຮ່ວມມືພາຍນອກອາຊຽນ, ທັງເປັນການສົ່ງເສີມປີທ່ອງທ່ຽວລາວ 2024 ຕື່ມອີກ.

ໂອກາດນີ້, ທ່ານ ສະເຫຼີມໄຊ ກົມມະສິດ ຍັງໄດ້ຮຽກຮ້ອງໃຫ້ທົ່ວສັງຄົມ ກໍຄື ປະຊາຊົນລາວ ບັນດາເຜົ່າ ມີຄວາມເຂົ້າໃຈ ພາລະບົດບາດອັນສໍາຄັນ ໃນການທີ່ ສປປ ລາວ ໄດ້ຮັບກຽດເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57, ພ້ອມທັງ ໃຫ້ປະກອບສ່ວນເປັນເຈົ້າພາບທີ່ດີ ແລະ ພ້ອມກັນຮັກສາຄວາມສະຫງົບ, ອຳນວຍຄວາມສະດວກ, ຮັກສາຄວາມສະອາດ, ຄວາມເປັນລະບຽບຮຽບຮ້ອຍ ໃນສັງຄົມ ເພື່ອເຮັດໃຫ້ ການນຳເນີນກອງປະຊຸມ ດັ່ງກ່າວ, ປະສົບຜົນສຳເລັດຢ່າງຈົບງາມ.

แชร์