6 ເດືອນຕົ້ນປີ ແຂວງເຊກອງ ເກັບລາຍຮັບໄດ້ 230 ຕື້ກວ່າກີບ

ຕາມການລາຍງານຂອງທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ໃຫ້ຮູ້ໃນກອງປະຊຸມຄົບຄະນະບໍລິຫານງານພັກແຂວງ (ເປີດກວ້າງ) ຄັ້ງທີ 10 ສະໄໝທີ X ໃນວັນທີ 10 ກໍລະກົດ 2024 ວ່າ: ໃນ 6 ເດືອນຕົ້ນປີ 2024 ແຂວງເຊກອງ ສາມາດເກັບລາຍຮັບເຂົ້າງົບປະມານໄດ້ທັງໝົດ 234,30 ຕື້ກີບ ທຽບໃສ່ແຜນປີເທົ່າກັບ 79%. ໃນນີ້, ພູດສູນກາງປະຕິບັດຢູ່ທ້ອງຖິ່ນ 45,56 ຕື້ກີບ ເທົ່າກັບ 59% ແລະ ລາຍຮັບພູດຂອງແຂວງ 188,74 ຕື້ກີບ ທຽບໃສ່ແຜນປີເທົ່າກັບ 85%; ສ່ວນດ້ານລາຍຈ່າຍປະຕິບັດໄດ້ 182,70 ຕື້ກີບ ທຽບໃສ່ແຜນປີເທົ່າກັບ 47%.

ທ່ານ ຂັນຕີ ສີລະວົງສາ ກ່າວວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2024 ເຫັນວ່າ ມີຫຼາຍຂະແໜງການສາມາດປະຕິບັດໄດ້ຕາມແຜນ ແລະ ລື່ນແຜນການທີ່ວາງໄວ້ ໂດຍສະເພາະແມ່ນຂະແໜງກະສິກໍາ ແລະ ປ່າໄມ້ ສາມາດເກັບກູ້ຜົນຜະລິດເຂົ້ານາແຊງໄດ້ທັງໝົດ 2.946 ໂຕນ ທຽບໃສ່ແຜນປີເທົ່າກັບ 74%; ພືດສະບຽງອາຫານ 8.234 ໂຕນ ເທົ່າກັບ 100% ແລະ ພືດເປັນສິນຄ້າ 10.634 ໂຕນ ທຽບໃສ່ແຜນປີເທົ່າກັບ 100%. ນອກນີ້, ຍັງໄດ້ຊຸກຍູ້ສົ່ງເສີມການລ້ຽງສັດໃຫ້ຂະຫຍາຍຕົວ 1-2% ທົ່ວແຂວງມີສັດລ້ຽງປະເພດຄວາຍ 25.756 ໂຕ; ງົວ 43.025 ໂຕ; ໝູ 64.555 ໂຕ; ແບ້ 19.810 ໂຕ ແລະ ສັດປີກ 986.562 ໂຕ.

ພ້ອມນີ້ຍັງໄດ້ຍົກສູງປະສິດທິພາບການລົງທຶນ, ສຸມໃສ່ການກໍ່ສ້າງພື້ນຖານໂຄງລ່າງທີ່ຈຳເປັນ, ຈັດສັນທີ່ດິນ, ປູກໄມ້ໃຫ້ເປັນປ່າ, ລ້ຽງງົວແບບເປັນຟາມ, ຂຸດຄົ້ນແຮ່ທາດ, ການກໍ່ສ້າງເຂື່ອນໄຟຟ້າ, ສົ່ງເສີມວິຊາການ ແລະພັດທະນາຊັບພະຍາກອນມະນຸດ; ສ້າງໂອກາດໃຫ້ແມ່ຍິງ, ໄວໜຸ່ມ-ເດັກນ້ອຍ, ຜູ້ອາວຸໂສ-ຜູ້ດ້ອຍໂອກາດ ໄດ້ຮັບການພັດທະນາ ແລະ ປະກອບສ່ວນໃນການພັດທະນາເສດຖະກິດ-ສັງຄົມ; ພັດທະນາພື້ນຖານໂຄງລ່າງໃຫ້ສາມາດເຊື່ອມຈອດ-ເຊື່ອມໂຍງພາຍໃນ, ພາກພື້ນ ແລະ ສາກົນ ເພື່ອອໍານວຍຄວາມສະດວກໃຫ້ແກ່ການຜະລິດ, ການບໍລິການ, ການຄ້າ-ການລົງທຶນ, ສ້າງອາຊີບ ແລະ ວຽກເຮັດງານທໍາທີ່ໝັ້ນຄົງໃຫ້ປະຊາຊົນ.
---
ຂ່າວ-ພາບ: ສັນຍາ

แชร์