ຮ່ວມມືຍົກສູງອາຊີບແມ່ບ້ານ ໃຫ້ມີສີມືສະໜອງຕະຫຼາດພາຍໃນ
ບໍລິສັດ ໄອແຄ ບໍລິການ ຈຳກັດ ແລະສູນດີຟິກ ພັດທະນາທັກສະການໂຮງແຮມ ແລະ ການທ່ອງທ່ຽວ ຮ່ວມກັນຈັດການແຂ່ງຂັນແມ່ບ້ານ 2024 ຍົກລະດັບສີມືແຮງງານ ແລະ ຍົກສູງບົດບາດອີກອາຊີບແຮງງານທີ່ມີຄວາມສໍາຄັນບໍ່ແພ້ອາຊີບອື່ນສະໜອງເຂົ້າສູ່ຕະຫຼາດແຮງງານພາຍໃນ.
.
ການແຂ່ງຂັນດັ່ງກ່າວມີຂຶ້ນໃນຕອນເຊົ້າຂອງວັນທີ 7 ກໍລະກົດທີ່ຜ່ານມາ,ໃຫ້ກຽດເຂົ້າຮ່ວມໂດຍ ທ່ານ ນາງ ພຸດທະຫວາ ສີວິໄລ ຜູ້ອຳນວຍການ ບໍລິສັດ ໄອແຄ ບໍລິການ ຈຳກັດ, ທ່ານ ນາງ ປທ ຈຸນລະຈັນ ແພງດີ ຜູ້ອຳນວຍການ ສູນດີຟິກ, ທ່ານ ພຸດທະສອນ ພົມວິໃສ ຫົວໜ້າ ສູນບໍລິການ ວິສາຫະກິດ ຂະໜາດນ້ອຍ ແລະກາງ, ບັນດາຜູ້ສະໜັບສະໜູນ, ຜູ້ເຂົ້າແຂ່ງຂັນ ແລະ ແຂກຖືກເຊີນອີກຈຳນວນໜຶ່ງ.
.
ໂອກາດດັ່ງກ່າວ ທ່ານ ນາງ ພຸດທະຫວາ ໄດ້ຍົກໃຫ້ເຫັນເຖິງ ຄວາມສຳຄັນຂອງການພັດທະນາສີມືແຮງງານ ຍົກສູງອາຊີບໂດຍສະເພາະໃນຂະແໜງການບໍລິການ ເຊັ່ນແມ່ບ້ານ, ແມ່ຄົວ ເພື່ອຕອບສະໜອງຄວາມຕ້ອງການແຮງງານພາຍໃນປະເທດ.
.
ທ່ານ ນາງ ພຸດທະຫວາ ກ່າວວ່າ: “ປັດຈຸບັນປະເທດເຮົາກຳລັງພົບພໍ້ກັບບັນຫາຂາດແຮງງານທີ່ມີທັກສະ ໃນປະເທດ ໂດຍສະເພາະໃນສາຂາບໍລິການ ເຊັ່ນແມ່ບ້ານ, ແມ່ຄົວ. ໃນຂະນະດຽວກັນ ສັງຄົມກັບເບິ່ງຂ້າມຄວາມສຳຄັນ ແລະ ບໍ່ໃຫ້ຄຸນຄ່າກັບເຂົາເຈົ້າ. ສະນັ້ນ ເວທີໃນມື້ນີ້ຈຶ່ງຈະເປັນກະບອກສຽງ ແລະ ເປັນພື້ນທີ່ໃຫ້ພວກເຂົາໃນການສະແດງຄວາມສາມາດໃນຂະແໜງການທີ່ພວກເຂົາພັດທະນາມາ”.
.
ທ່ານ ນາງ ຈັນທະຈອນ ກ່າວວ່າ: ການປ້ອນແຮງງານທີ່ມີທັກສະເຂົ້າໃນຕະຫຼາດນັ້ນເປັນເລື່ອງທີ່ສຳຄັນ ແລະຈຳເປັນຫຼາຍຍົກຕົວຢ່າງຄົນເສີບອາຫານ ບໍ່ແມ່ນພຽງແແຕ່ເອົາມາຫານມາເສີບເທົ່ານັ້ນ ແຕ່ຕ້ອງມີທັກສະໃນການສື່ສານກັບແຂກມີທັກສະໃນການຕ້ອນຮັບແຂກ ເພື່ອແລກມາດ້ວຍຄວາມປະທັບໃຈໃນການບໍລິການ.
.
ໂດຍກິດຈະກໍາມີການແຂ່ງຂັນຢູ່ 3 ຫົວຂໍ້ ຄື : ແມ່ບ້ານດີເດັ່ນ, ແຂ່ງຂັນຈັດໂຕະອາຫານ ແລະ ແຂ່ງຂັນ ເຮັດອາຫານ. ເຊິ່ງຜູ້ຊະນະໃນການແຂ່ງຂັນແມ່ບ້ານໄດ້ແກ່ນາງ ສອນວິໄລ ແກ້ວວິໄລພອນ, ການແຂ່ງຂັດຈັດໂຕະອາຫານ ໄດ້ແກ່ ນາງ ຍອດ ແລະການແຂ່ງຂັນແຕ່ງກິນ ໄດ້ແກ່ນາງສີ.
