ບໍລິສັດທ່າບົກທ່ານາແລ້ງ ສະໜັບສະໜູນກອງປະຊຸມສຸດຍອດທຸລະກິດ ແລະລົງທຶນອາຊຽນ

ບໍລິສັດທ່າບົກທ່ານາແລ້ງ ຈຳກັດຜູ້ດຽວ ໄດ້ສະໜັບສະໜູນການເປັນເຈົ້າພາບຈັດກອງປະຊມສຸດຍອດທຸລະກິດ ແລະການລົງທຶນອາຊຽນ 2024 (ASEAN Business and Investment Summit 2024) ມູນຄ່າ 1 ແສນໂດລາສະຫະລັດ ໃຫ້ກັບ ສະພາການຄ້າ ແລະອຸດສາຫະກຳ ແຫ່ງຊາດລາວ (ສຄອຊ), ເຊິ່ງພິທີເຊັນສັນຍາການສະໜັບສະໜູນດັ່ງກ່າວ ຈັດຂຶ້ນໃນວັນທີ 8 ກໍລະກົດ 2024 ທີ່ ນະຄອນຫຼວງວຽງຈັນ ລະຫວ່າງ ທ່ານ ອຸເດດ ສຸວັນນະວົງ ປະທານ ສຄອຊ ແລະ ທ່ານ ຈັນທອນ ສິດທິໄຊ ປະທານສະພາບໍລິຫານ ບໍລິສັດທ່າບົກທ່ານາແລ້ງ ຈຳກັດຜູ້ດຽວ ໂດຍມີພາກສ່ວນກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ທ່ານ ອຸເດດ ສຸວັນນະວົງ ໄດ້ໃຫ້ຮູ້ວ່າ: ກອງປະຊຸມສຸດຍອດທຸລະກິດ ແລະການລົງທຶນອາຊຽນ 2024 (ASEAN Business and Investment Summit 2024) ຈະຈັດຂຶ້ນຢ່າງເປັນທາງການ ໃນລະຫວ່າງວັນທີ 8-11 ຕຸລາ 2024 ທີ່ ໂຮງແຮມແລນມາກນະຄອນຫລວງວຽງຈັນ ໂດຍຈະໄດ້ມີກອງປະຊຸມປິ່ນອ້ອມ ເຊິ່ງເປັນເຈົ້າພາບຈັດໂດຍຕາງໜ້າຂອງພາກທຸລະກິດລາວ ໃນນັ້ນ ຈະມີກອງປະຊຸມ: ASEAN Young Entrepreneur Council (AYEC) Carnival and AGM, ກອງປະຊຸມ ASEAN Women Entrepreneurs Conference 2024 and AWEN Special Awards Ceremony, ກອງປະຊຸມ ASEAN Investment Forum (AIF) ແລະ ກອງປະຊຸມ International Logistics Symposium. ກອງປະຊຸມຄັ້ງນີ້, ຄາດຄະເນຈະໄດ້ເຊີນບັນດາຫົວໜ່ວຍທຸລະກິດຈາກ ສປປ ລາວ, ບັນດາປະເທດອາຊຽນ ແລະຈະໄດ້ເຊື້ອເຊີນເອົາຜູ້ນໍາຂອງໂລກ, ອົງການຈັດຕັ້ງສາກົນຕ່າງໆ ແລະ ຜູ້ບໍລິຫານລະດັບສູງຈາກບໍລິສັດຫລາຍປະເທດ ແລະພາກພື້ນມາເຂົ້າຮ່ວມໃນງານຫລາຍກວ່າ 500-600 ຄົນ.

ນອກຈາກເປັນເຈົ້າພາບຈັດ ກອງປະຊຸມສຸດຍອດທຸລະກິດ ແລະການລົງທຶນອາຊຽນແລ້ວ, ຍັງຈະໄດ້ຈັດການແຂ່ງຂັນລາງວັນທຸລະກິດອາຊຽນດີເດັ່ນ ປະຈຳປີ 2024 ເຊິ່ງການແຂ່ງຂັນດັ່ງກ່າວແມ່ນເປີດກວ້າງໃຫ້ບັນດາຫົວໜ່ວຍທຸລະກິດປະເທດອາຊຽນເຂົ້າຮ່ວມສະໝັກ,ເຊິ່ງພິທີມອບລາງວັນຈະໄດ້ຈັດຂຶ້ນໃນວັນທີ 9 ຕຸລາ 2024 ຢູ່ໂຮງແຮມດອນຈັນພາເລສ, ນະຄອນຫລວງວຽງຈັນ. ສໍາລັບ ລາງວັນປະກອບມີ 3 ປະເພດລາງວັນໃຫຍ່ຄື: ປະເພດລາງວັນເຊື່ອມໂຍງຂະແໜງການບຸລິມາສິດດີເດັ່ນ ເຊິ່ງບໍລິສັດຂະໜາດນ້ອຍ ແລະໃຫຍ່ສາມາດສະໝັກເເຂ່ງຂັນໄດ້ໂດຍແບ່ງເປັນບໍລິສັດນ້ອຍ 1 ລາງວັນ ແລະບໍລິສັດຂະໜາດໃຫຍ່ 1 ລາງວັນ, ລວມມີ 20 ລາງວັນ ໂດຍຈະປະກອບມີ 10 ຂະແໜງການ; ປະເພດລາງວັນສຳລັບທຸລະກິດ SMEs ດີເດັ່ນ ໃຫ້ສະເພາະແຕ່ບໍລິສັດທຸລະກິດ SME ເທົ່ານັ້ນ ທີ່ສາມາດສະໝັກລາງວັນປະເພດນີ້ໄດ້ ໂດຍລາງວັນປະເພດນີ້ ມີ 5 ຂະແໜງການ; ແລະລາງວັນພິເສດ ບໍລິສັດຂະໜາດນ້ອຍ ຫລືຂະໜາດໃຫຍ່ກໍສາມາດສະໜັກແຂ່ງຂັນໄດ້ຊຶ່ງລາງວັນປະເພດນີ້ ມີ 5 ຂະແໜງການ.
ຂ່າວ: ສາວລາວໃຕ້

แชร์