ບໍລິສັດ ພູເບ້ຍ ມາຍນິງ ໄດ້ມອບເງິນບໍລິຈາກ ເພື່ອຊ່ວຍໂຮງໝໍເສດຖາທິຣາດ ເພື່ອຈັດຊື້ຕູ້ປະສົມເຄມີ

ໃນວັນພະຫັດທີ 4 ກໍລະກົດ, ພວກເຮົາ ໄດ້ມອບເງິນ 100,000,000 ກີບໃຫ້ ໂຮງໝໍ ເສດຖາທິຣາດ ເພື່ອຈັດຊື້ຕູ້ປະສົມເຄມີ.

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ, ແລະ ຕາງໜ້າບໍລິສັດ ໄດ້ມອບເງິນບໍລິຈາກດັ່ງກ່າວໃຫ້ ດຣ ຫວັງນະຄອນ ດິດຕະພົງ, ອໍານວຍການໂຮງໝໍ ເສດຖາທິຣາດ ຢູ່ພິທີມອບ-ຮັບ ເຊິ່ງຈັດຂຶ້ນຢູ່ໂຮງໝໍ.

ຕູ້ປະສົມເຄມີ ຈະຊ່ວຍບຸກຄະລາກອນທາງການແພດ ປະຕິບັດການເກັບຮັກສາ ແລະ ປ້ອງກັນພວກເຂົາຈາກການສໍາຜັດກັບຕົວຢ່າງຫ້ອງທົດລອງທີ່ມີຜິດ ແລະ ອັນຕະລາຍ ໃນຂະນະທີ່ຍັງຊ່ວຍຮັກສາການຄວບຄຸມຄຸນນະພາບ ຕະຫຼອດໄລຍະການກວດໃນຫ້ອງທົດລອງ.

ໃນພິທີມອບ-ຮັບ, ບໍລິສັດ ພູເບ້ຍ ມາຍນິງ ຍັງໄດ້ເຊັນສັນຍາສະບັບດັດແກ້ນໍາໂຮງໝໍ ເສດຖາທິຣາດ, ເຊິ່ງຊ່ວຍຄົນເຈັບປິ່ນປົວມະເຮັງເຕົ້ານົມ ແລະ ມະເຮັງຮວຍໄຂ່ທີ່ດ້ອຍໂອກາດ ແລະ ມີເງື່ອນໄຂ ໃນການຈັດຊື້ເຄື່ອງມືທາງການແພດ, ຄ່າປິ່ນປົວ, ຄ່າອາຫານ, ຄ່າທີ່ພັກ ແລະ ຄ່າເດີນທາງໄປ-ກັບບ້ານເກີດຂອງພວກເຂົາ.

ທ່ານ ດາລິງ ເຊັງ, ຜູ້ອໍານວຍການ ແລະ ປະທານບໍລິຫານຂອງບໍລິສັດ ແພນອອສ໌, ໄດ້ກ່າວກ່ຽວກັບຄວາມສໍາຄັນຂອງການຊ່ວຍເຫຼືອປະຊາຊົນລາວໃຫ້ສາມາດເຂົ້າເຖິງແຫຼ່ງທຶນທີ່ຈໍາເປັນຫຼາຍໃນການຮັກສາສຸຂະພາບ ແລະ ສະຫວັດດີພາບໃຫ້ດີຕະຫຼອດເວລາ.

ທ່ານ ດາລິງ ເຊັ່ງ ກ່າວວ່າ: “ໃນເດືອນຕຸລາ 2019, ບໍລິສັດ ແພນອອສ໌ ແລະ ບໍລິສັດ ພູເບ້ຍ ມາຍນິງ ໄດ້ດໍາເນີນການໂຄສະນາເຜີຍແຜ່ກ່ຽວກັບມະເຮັງເຕົ້ານົມເປັນເວລາໜຶ່ງເດືອນ ຊຶ່ງລະດົມເງິນເພື່ອຊ່ວຍຄົນເຈັບມະເຮັງເຕົ້ານົມທີ່ດ້ອຍໂອກາດຢູ່ລາວ.

ແຜນງານປີ 2019 ໄດ້ໂຄສະນາເຜີຍແຜ່ກ່ຽວກັບຄວາມສໍາຄັນຂອງການກວດພົບແຕ່ຫົວທີ ຜ່ານຂໍ້ມູນ ແລະ ກອງປະຊຸມປຶກສາຫາລື ສໍາລັບພະນັກງານຂອງບໍລິສັດ ແລະ ບັນດາຊຸມຊົນທ້ອງຖິ່ນ. ໃນລະຫວ່າງເດືອນຂອງການເຜີຍແຜ່ຄວາມຮູ້ກ່ຽວກັບມະເຮັງເຕົ້ານົມ, ພະນັກງານ ແລະ ບໍລິສັດຮັບເໝົາ ໄດ້ບໍລິຈາກສິ່ງທີ່ພວກເຮົາສາມາດຊ່ວຍໄດ້ໃຫ້ແຜນງານດັ່ງກ່າວ ແລະ ໃນເວລາປິດບໍລິຈາກ, ບໍລິສັດ ແພນອອສ໌ ໄດ້ບໍລິຈາກເທົ່າກັນກັບຈໍານວນເງິນທີ່ລະດົມໄດ້ທັງໝົດ.

ພາຍຫຼັງສິ້ນສຸດແຜນງານດັ່ງກ່າວ, ບໍລິສັດ ພູເບ້ຍ ມາຍນິງ ໄດ້ເຊັນສັນຍາທີ່ໃຫ້ຄວາມຊ່ວຍເຫຼືອທາງດ້ານການເງິນໃນການປິ່ນປົວມະເຮັງເຕົ້ານົມ ແລະ ມະເຮັງຮວຍໄຂ່ ແກ່ຄົນເຈັບທີ່ດ້ອຍໂອກາດ ຊຶ່ງເປັນຜູ້ທີ່ຜ່ານເງື່ອນໄຂຂອງໂຮງໝໍເສດຖາທິຣາດ. ເນື່ອງຈາກຜົນກະທົບ ແລະ ເຮັດໃຫ້ລ່າຊ້າໂດຍພະຍາດໂຄວິດ-19 ໃນປີ 2020 ແລະ 2021, ບໍລິສັດ ພູເບ້ຍ ມາຍນິງ ໄດ້ໃຫ້ການຊ່ວຍເຫຼືອທາງດ້ານເງິນໃນຄ່າປິ່ນປົວມະເຮັງ, ຄ່າອາຫານ, ຄ່າທີ່ພັກ ແລະ ຄ່າເດີນທາງ ແກ່ຄົນເຈັບທີ່ເປັນມະເຮັງເຕົ້ານົມ ແລະ ມະເຮັງຮວຍໄຂ່ທີ່ດ້ອຍໂອກາດ ແລະ ມີເງື່ອນໄຂ ຈໍານວນ 22 ຄົນ ແລະ ຄົນເບິ່ງແຍງພວກເຂົາຢູ່ໂຮງໝໍ.

ສັນຍາດັດແກ້ສະບັບໃໝ່ນີ້ ຈະໃຫ້ໂອກາດຫຼາຍຂຶ້ນໃນການນໍາໃຊ້ທຶນ ເພື່ອຈັດຊື້ເຄື່ອງມືທາງການແພດທີ່ຈໍາເປັນຫຼາຍ ສໍາລັບໂຮງໝໍ ທີ່ໄດ້ໃຫ້ການປິ່ນປົວທາງການແພດແກ່ ຄົນເຈັບປິ່ນປົວມະເຮັງທີ່ດ້ອຍໂອກາດ.”

ທ່ານ ຈັນເພັງ ບຸນນະຜົນ, ຍັງໄດ້ໃຫ້ຮູ້ຕື່ມອີກວ່າ: “ສາທາລະນະສຸກ ແມ່ນໜຶ່ງໃນຫົກໂຄງການພັດທະນາຊຸມຊົນຫຼັກຂອງບໍລິສັດ ພູເບ້ຍ ມາຍນິງ ທີ່ບໍລິສັດໄດ້ສຸມໃສ່ຢູ່ແຂວງໄຊສົມບູນ ແລະ ສະໜັບສະໜູນບັນດາຊຸມຊົນທ້ອງຖິ່ນອື່ນໆຢູ່ລາວ. ພວກເຮົາຂໍຂອບໃຈແຮງງານຂອງພວກເຮົາສໍາລັບຄວາມມຸ້ງໝັ້ນ ແລະ ການປະກອບສ່ວນທີ່ມີນໍ້າໃຈເອື້ອເຟື້ອເພື່ອແຜ່ຂອງພວກເຂົາໃນການສະໜັບສະໜູນແຜນງານປີ 2019 ເຊິ່ງໄດ້ປ່ຽນແປງຊີວິດໃຫ້ຜູ້ທີ່ໄດ້ຮັບທຶນ. ມັນໄດ້ສະແດງໃຫ້ເຫັນເຖິງຄວາມເຄົາລົບຂອງບໍລິສັດຕໍ່ລັດຖະບານ ແລະ ປະຊາຊົນລາວ ແລະ ຄວາມຕັ້ງໃຈອັນໜັກແໜ້ນຂອງບໍລິສັດທີ່ຈະປະມໍລະດົກຕົກທອດທີ່ດີຢ່າງຍືນຍົງໄວ້ໃນປະເທດ ດ້ວຍການເພີ້ມການເຂົ້າເຖິງສາທາລະນະສຸກທີ່ມີຄຸນນະພາບ.”

แชร์