ນາຍົກ ຮ່ວມສະຫຼອງບຸນປີໃໝ່ລາວທີ່ອຸດົມໄຊ

 ວັນທີ 13 ເມສາຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະພັນລະຍາໄດ້ໃຫ້ກຽດເຂົ້າຮ່ວມພິທີເປີດງານມະຫາສົງການສືບສານປະເພນີເດືອນ 6 ຕົກປີໃໝ່ບຸນບັ້ງໄຟປະສານໃຈພັດທະນາ (ງານສະເຫຼີມສະຫຼອງບຸນປີໃໝ່ລາວ ພສ 2562) ທີ່ສະໜາມກິລາແຂວງ, ໂດຍມີທ່ານ ຄໍາພັນ ເຜີຍຍະວົງ ເຈົ້າແຂວງໆອຸດົມໄຊ ພ້ອມດ້ວຍແຂກຖືກເຊີນຈາກສູນກາງ ແລະປະເທດໃກ້ຄຽງ, ຕະຫຼອດຮອດປະຊາຊົນຊາວແຂວງອຸດົມໄຊ ແລະສື່ມວນຊົນເຂົ້າຮ່ວມຢ່າງຫຼວງ ຫຼາຍ.

 ທ່ານ ສົມຈິດ ປັນຍາສັກ ຮອງເຈົ້າ ແຂວງໆອຸດົມໄຊ ໃຫ້ຮູ້ວ່າ: ເພື່ອເປັນການອະນຸລັກຮັກສາວັດທະນະທໍາ, ຮີດຄອງປະເພນີອັນດີງາມຂອງຊາດ, ຂອງທ້ອງ ຖິ່ນໃຫ້ຍືນຍົງຢູ່ຄູ່ຄົນລາວຕະຫຼອດໄປ; ເພື່ອນໍາເອົາວັດທະນະທໍາຮີດຄອງປະເພນີຂອງບັນດາເຜົ່າປະກອນສ່ວນເຂົ້າໃນການຊຸກຍູ້ສົ່ງເສີມການທ່ອງທ່ຽວ ແລະການພົວພັນຮ່ວມມືເຊື່ອມໂຍງ, ແລກປ່ຽນວັດທະນະທໍາຮີດຄອງປະເພນີກັບພາຍໃນ ແລະຕ່າງປະເທດໂດຍສະເພາະປະເທດເພື່ອນມິດໃກ້ຄຽງ, ທັງເປັນການສະເຫຼີມສະຫຼອງປີທ່ອງທ່ຽວລາວ-ຈີນ ປີ 2019 ເພື່ອສ້າງລາຍຮັບໃຫ້ແກ່ປະຊາຊົນບັນດາເຜົ່າ ແລະຜູ້ປະກອບການດ້ານການບໍລິການຢູ່ພາຍໃນແຂວງ, ອັນສຳຄັນເພື່ອເປັນການອວຍພອນປີໃໝ່ເຊິ່ງກັນ ແລະກັນ, ປຸກລະດົມ, ເຕົ້າໂຮມຄວາມສາມັກຄີປະຊາຊົນບັນດາເຜົ່າປະກອບສ່ວນເຂົ້າໃນຂະບວນການປົກປັກຮັກສາ ແລະສ້າງສາພັດທະນາປະເທດຊາດກໍ່ຄືແຂວງອຸດົມໄຊ ໃຫ້ເປັນຂະບວນການກວ້າງຂວາງ, ຟົດຟື້ນ, ມ່ວນຊື່ນ. ນອກນັ້ນກໍ່ຍັງເປັນການດຶງດູດນັກທ່ອ ງທ່ຽວ, ນັກລົງທຶນທັງພາຍໃນ ແລະຕ່າງປະເທດເຂົ້າມາທ່ອງທ່ຽວ ແລະ ລົງທຶນຢູ່ແຂວງອຸດົມໄຊ ໃຫ້ນັບມື້ຫຼາຍຂຶ້ນ, ນຳເອົາຊື່ສຽງອັນດີ ແລະຜົນງານອັນພົ້ນເດັ່ນຂອງແຂວງອຸດົມໄຊໃຫ້ເປັນທີ່ຮູ້ຈັກກັນກວ້າງຂວາງກວ່າເກົ່າ.

 ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ໃຫ້ກຽດເປີດພິທີຢ່າງເປັນທາງການດ້ວຍການລັ່ນຄ້ອງເກົ້າບາດ. ຫຼັງຈາກນັ້ນກໍ່ໄດ້ທ່ຽວຊົມບັນດາກິດຈະກຳ, ການວາງສະແດງ ແລະຈຳໜ່າຍສິນຄ້າຂອງປະຊາຊົນ ແລະຜູ້ປະກອບການທຸລະກິດ,ພ້ອມກັນນັ້ນກໍ່ໄດ້ເຂົ້າຮ່ວມຮັບປະທານອາຫານພື້ນບ້ານທີ່ໄດ້ຈັດຂຶ້ນພາຍ ໃນງານຄັ້ງນີ້ທີ່ເອີ້ນວ່າ: ເທດສະການອາຫານພື້ນບ້ານຂອງແຂວງອຸດົມໄຊ ທີ່ບັນດາຮ້ານອາຫານມີຊື່ສຽງພາຍໃນແຂວງໄດ້ພ້ອມກັນຈັດມາໃຫ້ຜູ້ເຂົ້າຮ່ວມງາ ນດັ່ງກ່າວໄດ້ຊີມ ແລະຮັບປະທານ.

ຂ່າວ: ນສພ ເສດຖະກິດ-ສັງຄົມ

แชร์