ທ່ານນາງ ສຸນັດຕາ ລິດປັນຍາ ຫົວໜ້າບໍລິສັດລິດປັນຍາສໍາຫຼວດອອກແບບ-ກໍ່ສ້າງຈຳ ກັດຜູ້ດຽວກ່າວລາຍງານໂດຍຫຍໍ້ວ່່າ: ໂຄງການກໍ່ສ້າງຕຶກນອນພິເສດ ເປັນການຜັນຂະຫຍາຍຕາມນະໂຍບາຍ ກໍຄືແຜນພັດທະນາວຽກງານສາທາລະນະສຸກ ທີ່ກະຊວງສາທາລະນະສຸກວາງອອກ, ສອດຄ່ອງຕາມທິດຊີ້ນໍາຂອງລັດຖະບານ ກໍຄືສະພາບຄວາມຮຽກຮ້ອງຕ້ອງການຕົວຈິງຂອງສັງຄົມ ຊຶ່ງໄດ້ອອກແບບໃຫ້ກົມກຽວ ແລະ ເຊື່ອມຕໍ່ກັບລະບົບອາຄານທີ່ມີແລ້ວຂອງໂຮງໝໍແມ່ ແລະ ເດັກເກີດໃໝ່ ຊຶ່ງມີຂະໜາດກວ້າງ 32,6 ແມັດ, ຍາວ 59 ແມັດ ເປັນອາຄານ 3 ຊັ້ນ ປະກອບມີຫ້ອງນອນພິເສດທັງໝົດ 50 ຫ້ອງ ຈັດເປັນ 4 ປະເພດຫ້ອງຄື: ປະເພດ 1 ຫ້ອງພິເສດສູດ VIP Luxury ມີ 2 ຫ້ອງ; ປະເພດ 2 ຫ້ອງສູດ Luxury ມີ 4 ຫ້ອງ; ປະເພດ 3 ຫ້ອງພິ ເສດ VIP ມີ 21 ຫ້ອງ; ປະເພດ 4 ຫ້ອງທົ່ວໄປ Deluxe ມີ 23 ຫ້ອງ; ຫ້ອງໂຖງພະຍາບານຕ້ອນຮັບ, ເຄົ້າເຕີ້ພະຍາບານປະຈຳການ 24 ຊົ່ວໂມງ, ຫ້ອງອາບນໍ້າເດັກ, ຫ້ອງຢາ, ຫ້ອງການບໍລິຫານ, ຮ້ານອາຫານ, ຮ້ານກາເຟ, ມິນິມາກ; ມີລະບົບເຕັກນິກຄົບຊຸດເຊັ່ນ: ລະບົບເຕັກນິກຂອງການແພດ, ລະບົບໄຟຟ້າສະເພາະ (ລວມທັງໄຟຟ້າສໍາຮອງ), ລະບົບລິບ, ລະບົບກ້ອງວົງຈອນປິດ, ອິນເຕີເນັດ, ລະບົບນໍ້າໃຊ້, ນໍ້າເສຍ ແລະ ອື່ນໆ ເພື່ອຄວາມປອດໄພ ແລະ ຄວາມສະດວກສະບາຍໃນການບໍລິການ ທັງໝົດແມ່ນໄດ້ອອກແບບຢ່າງເປັນລະບົບຄົບຊຸດ ຕົວອາຄານທາງນອກແບບຊົງລາວປະຍຸກ ແລະ ດ້ານເຕັກນິກການນໍາໃຊ້ແບບທັນສະໄໝ. (ແນວຄວາມຄິດ ຫຼື ສິ່ງຈູງໃຈໃນການອອກແບບແມ່ນເລີ່ມຈາກຊີວິດຈິງຂອງຕົນ ທີ່ເຄີຍເປັນແມ່ຖືພາ ແລະ ເກີດລູກ 3 ຄົນ ຊຶ່ງຜ່ານການໃຊ້ບໍລິການຂອງໂຮງໝໍທັງຢູ່ພາຍໃນ ແລະ ຕ່າງປະເທດ ເຫັນໄດ້ສະພາບຕົວຈິງຫຼາຍຢ່າງ. ໂຄງການນີ້ມີມູນຄ່າລົງທຶນທັງໝົດ 144,6 ຕື້ກວ່າກີບ (ຫຼື ປະມານ 6,4 ລ້ານກວ່າໂດລາ) ໃນນີ້ບໍລິສັດລົງທຶນທັງໝົດ 101,2 ຕື້ກວ່າກີບ ປະມານ (4,5 ລ້ານໂດລາ) ຖືຮຸ້ນ 70% ແລະ ໂຮງໝໍແມ່ ແລະ ເດັກເກີດໃໝ່ ປະກອບສິດນໍາໃຊ້ທີ່ດິນ 3,700 ຕາແມັດ ຖືເປັນມູນຄ່າ ປະກອບເຂົ້າເປັນທຶນ 43,3 ຕື້ກວ່າກີບ ເທົ່າກັບ (1,9 ລ້ານໂດລາ) ຖືຮຸ້ນ 30%. ໄລຍະ ການລົງທຶນ (ກໍ່ສ້າງ) 3 ປີ. ໄລຍະດຳເນີນບໍລິການ (ຮ່ວມທຸລະກິດ) 25 ປີ.

ໂອກາດນີ້, ທ່ານນາງ ນາລີ ສີສຸລິດ ໄດ້ໃຫ້ກຽດລັ່ນຄ້ອງ 9 ບາດ ເພື່ອເປັນສີລິມຸງຄຸນໃຫ້ແກ່ພິທີ ແລະ ໄດ້ທ່ຽວຊົມໂຮງໝໍແມ່ ແລະ ເດັກເກີດໃໝ່ອີກດ້ວຍ.

ຂ່າວ-ພາບ: ຍຸພິນທອງ

.

- ໜັງສືພິມເສດຖະກິດ-ສັງຄົມ