ເຈົ້າແຂວງສະຫວັນນະເຂດເຮັດວຽກເມືອງເຊໂປນ

ທ່ານເຈົ້າແຂວງສະຫວັນນະເຂດ ບຸນໂຈມ ອຸບົນປະເສີດ ພ້ອມດ້ວຍບັນດາທ່ານຫົວໜ້າພະແນກການທີ່ກ່ຽວຂ້ອງໄດ້ລົງເຄື່ອນໄຫວພົບປະໂອ້ລົມອຳນາດການປົກຄອງ ແລະພໍ່ແມ່ປະຊາຊົນບ້ານລະເວີນທີ່ຂຶ້ນກັບກຸ່ມບ້ານຈຽງຕູບ ເມືອງເຊໂປນ ແຂວງສະຫວັນນະເຂດ.

ໃນໂອກາດນີ້, ທ່ານເຈົ້າແຂວງພ້ອມຄະນະໄດ້ຮັບຟັງການລາຍງານກ່ຽວກັບທີ່ຕັ້ງ-ສະພາບຈຸດພິເສດຂອງບ້ານລະເວີນ ຈາກເລຂາພັກ-ນາຍບ້ານລະເວີນ ເຊິ່ງທ່ານໃຫ້ຮູ້ວ່າ: ບ້ານລະເວີນແມ່ນ 1 ໃນຈຳນວນ 6 ບ້ານທີ່ຂຶ້ນກັບກຸ່ມບ້ານຈຽງຕູບ, ຕັ້ງຫ່າງຈາກບ້ານຈຽງຕູບໄປທາງທິດເໜືອປະມານ 30 ກິໂລແມັດ, ທິດເໜືອຕິດກັບເມືອງບົວລະພາ ແຂວງຄຳມ່ວນ, ທິດໃຕ້ຕິດກັບກຸ່ມບ້ານຜາບັງ, ທິດຕາເວັນອອກຕິດກັບ ເມືອງເລຖຸ້ຍ ແຂວງກວາງບິ່ງ ສສ ຫວຽດນາມ, ທິດຕາເວັນຕົກຕິດກັບ ເມືອງວິລະບູລີ ແລະກຸ່ມບ້ານຜາບັງ, ບ້ານລະເວີນມີຈຳນວນຄົນທັງໝົດ 220 ຄົນ, ຍິງ 140 ຄົນ, ມີ 44 ຄອບຄົວ, ມີ 46 ຫຼັງຄາເຮືອນ, ວິຖີການດຳລົງຊີວິດຂອງປະຊາຊົນແມ່ນເພິ່ງພາທຳມະຊາດເປັນຫຼັກ, ໃນນີ້ແມ່ນປູກພືດຕາມລະດູການ ແລະລ້ຽງສັດຂາຍເປັນສິນຄ້າ, ບ້ານລະເວີນ ມີໂຮງຮຽນປະຖົມ 1 ຫຼັງ, ມີຄ້າຍທະຫານ 321, ມີໂຮງໝໍນ້ອຍ 1 ຫຼັງ, ມີແພດ 1 ທ່ານ, ມີກອງຫຼອນ 7 ສະຫາຍ, ປກສ ບ້ານມີ 4 ສະຫາຍ ແລະມີສະມາຊິກພັກ 4 ສະຫາຍ. ຫຼັງຈາກຟັງການລາຍງານແລ້ວ, ທ່ານເຈົ້າແຂວງກໍ່ໄດ້ຮັບຟັງຄວາມຮຽກຮ້ອງຕ້ອງການຂອງປະຊາຊົນ ໂດຍສະເພາະແມ່ນຄວາມຕ້ອງການໃນການພັດທະນາພື້ນຖານໂຄງລ່າງທີ່ຈຳເປັນໃຫ້ແກ່ບ້ານ ເປັນຕົ້ນແມ່ນ: ການບຸກເບີກເນື້ອທີ່ທຳການຜະລິດກະສິກຳ, ລະບົບນໍ້າລິນ, ວິດຖ່າຍ, ຕາຂ່າຍໄຟຟ້າ ເຊິ່ງທ່ານເຈົ້າແຂວງເຫັນດີທີ່ຈະແກ້ໄຂໃຫ້ຕາມຄວາມຮຽກຮ້ອງຕ້ອງການຂອງປະຊາຊົນ, ພ້ອມນັ້ນທ່ານເຈົ້າແຂວງກໍ່ໄດ້ໂອ້ລົມບັນຫາຕ່າງໆກັບອຳນາດການປົກຄອງ ແລະພໍ່ແມ່ປະຊາຊົນບ້ານລະເວີນ ພ້ອມທັງມອບເຂົ້າສານ ແລະສັງກະສີໃຫ້ບ້ານລະເວີນອີກດ້ວຍ. ເວລາຕໍ່ມາ, ທ່ານເຈົ້າແຂວງກໍ່ໄດ້ລົງຕິດຕາມໂຄງການກໍ່ສ້າງພື້ນຖານໂຄງລ່າງພາຍໃນກຸ່ມບ້ານຈຽງຕູບເຊິ່ງໃນນີ້, ທ່ານເຈົ້າແຂວງພ້ອມຄະນະໄດ້ລົງເບິ່ງໂຄງການກໍ່ສ້າງໂຮງໝໍນ້ອຍທີ່ກຳລັງໃກ້ຈະສຳເລັດ, ໂຄງການກໍ່ສ້າງລະບົບນໍ້າລິນ, ໂຄງການກໍ່ໂຮງຮຽນກຸ່ມບ້ານຈຽງຕູບ, ຕໍ່ມາທ່ານດຈົ້າແຂວງ ແລະຄະນະກໍ່ໄດ້ລົງເບິ່ງພື້ນທີ່ຕົວຈິງທີ່ນຳໃຊ້ເປັນພື້ນທີ່ປູກມັນຕົ້ນໂດຍແມ່ນພາກລັດໄດ້ບຸກເບີກ ແລະຈັດສັນຫຼາຍຮ້ອຍເຮັກຕາໃຫ້ປະຊາຊົນໄດ້ປູກພືດເປັນເສດຖະກິດສ້າງລາຍໄດ້ໃຫ້ຄອບຄົວ, ພ້ອມນັ້ນ, ທາງແຂວງກໍ່ຍັງໄດ້ສະໜອງແນວພັນມັນຕົ້ນໃຫ້ປະຊາຊົນໄດ້ປູກນຳພ້ອມ ໂດຍເຫັນໄດ້ວ່າປະຈຸບັນມັນຕົ້ນກຳລັງເຕີບໂຕ ແລະມີລຳຕົ້ນໃຫຍ່ງາມແຂງແຮງດີຄາດວ່າຈະໃຫ້ຜົນຜະລິດທີ່ໜ້າພໍໃຈໃຫ້ແກ່ປະຊາຊົນທັງນີ້ກໍ່ຍ້ອນຄວາມດຸໝັ່ນ ແລະເອົາໃຈໃສ່ຂອງປະຊາຊົນໃນເຂດນີ້. ຕອນທ້າຍ, ທ່ານເຈົ້າແຂວງກໍ່ໄດ້ໂອ້ລົມບັນຫາສຳຄັນກັບຄະນະພັກກຸ່ມບ້ານຈຽງຕູບ ເຊິ່ງການໂອ້ລົມແມ່ນຈັດຂຶ້ນຢູ່ທີ່ສະໂມສອນຫຼັງໃໝ່ຂອງກຸ່ມບ້ານຈຽງຕູບທີ່ຫາກໍ່ໄດ້ສຳເລັດການກໍ່ສ້າງ.

แชร์