ປີນີ້ ທົ່ວປະເທດຈະປ່ອຍປາ ແລະ ສັດນໍ້າ 64 ລ້ານໂຕ

ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກຳ ແລະ ປ່າໄມ້ ຖະແຫຼງການເນື່ອງໃນໂອກາດວັນປ່ອຍປາ ແລະ ສັດນໍ້າແຫ່ງຊາດ ໃນວັັັນທີ 3 ກໍລະກົດ 2024 ທີ່ ກະຊວງດັ່ງກ່າວວ່າ: ແຜນການປ່ອຍປາ ແລະ ສັດນໍ້າໃນວັນທີ 13 ກໍລະກົດ ປີ 2024 ນີ້ ຂະແໜງ ກະສິກໍາ ແລະ ປ່າໄມ້ ຂອງພວກເຮົາໄດ້ສົມທົບກັບ ຄະນະພັກ ອົງການປົກຄອງທ້ອງ ຖິ່ນທົ່ວປະເທດກະກຽມແຜນການ ແລະ ຂະບວນການປ່ອຍປາ ແລະ ສັດນໍ້າ ເພື່ອຄືນຄວາມອຸດົມສົມບູນສູ່ທໍາມະຊາດ ແລະ ສູ່ແຫຼ່ງນໍ້າຕ່າງໆ ໂດຍມີແຜນປ່ອຍປາ ແລະ ສັດນໍ້າ ໃຫ້ໄດ້ຫຼາຍກວ່າ 64 ລ້ານໂຕ ສ່ວນຢູ່ນະຄອນຫຼວງວຽງຈັນ ກະຊວງກະສິກໍາ ແລະ ປ່າໄມ້ ມີແຜນຈັດພິທີປ່ອຍປາ ແລະ ສັດນໍ້າ ຢູ່ ບ້ານຮ່ອງສຸພາບ ເມືອງ ໄຊເສດຖາ ຄາດວ່າຈະປ່ອຍປາ ແລະ ສັດນໍ້າ ປະມານ 400.000 ໂຕ.

ປັດຈຸບັນ ທົ່ວປະເທດ ມີສູນສະຖານີ ທີ່ຜະລິດລູກປາຂອງລັດ ຈໍານວນ 50 ກວ່າແຫ່ງ ຟາມຜະລິດລູກປາຂອງເອກະຊົນ ຫຼາຍກວ່າ 140 ແຫ່ງ ແລະ ການຜະລິດລູກປາແບບຄອບຄົວ ມີຫຼາຍກວ່າ 400 ແຫ່ງ ສາມາດສະໜອງແນວພັນປາ ໃຫ້ສັງຄົມໄດ້ໂດຍພື້ນຖານ ຈໍານວນ 290 ລ້ານກວ່າໂຕ ຫຼື ເທົ່າກັບ 73% ຂອງແຜນການ ແລະ ໃນທົ່ວປະເທດ ມີວັງສະຫງວນປາ ຫຼາຍກວ່າ 1.100 ວັງ ໃນນັ້ນ ມີຄະນະຄຸ້ມຄອງວັງສະຫງວນແລ້ວ 890 ວັງ ບັນດາສູນ ແລະ ສະຖານີ ດັ່ງກ່າວ ໄດ້ຄົ້ນຄວ້າທົດລອງ ລ້ຽງ ແລະ ຂະຫຍາຍພັນປາ ແລະ ສັດນໍ້າພື້ນເມືອງ ໄດ້ຫຼາຍຊະນິດ ເປັນຕົ້ນແມ່ນ ປາເຄິງ ປາກົດ ປາເໝັ້ນ ແລະ ປາເຂັງ ໃນປີທີ່ຜ່ານມາ ກະຊວງກະສິກໍາ ແລະ ປ່າໄມ້ ໄດ້ສົມ ທົບກັບບັນດາອົງການປົກຄອງທ້ອງຖິ່ນຂອງແຂວງ ໃນຂອບເຂດທົ່ວປະເທດ ຈັດກິດຈະກໍາ ໃນວັນປ່ອຍປາ ແລະ ສັດນໍ້າແຫ່ງຊາດ ໂດຍມີ ປະຊາຊົນ ພໍ່ຄ້າຊາວຂາຍ ຜູ້ປະກອບການ ລວມທັງອົງການຈັດຕັ້ງສາກົນທີ່ກ່ຽວຂ້ອງ ເຂົ້າຮ່ວມ ແລະ ໃຫ້ ການສະໜັບສະໜູນ ແນວພັນປາ ແລະ ແນວພັນສັດນໍ້າ ຢ່າງເປັນຂະບວນຟົດຟື້ນ ເຊິ່ງຈໍານວນປາ ແລະ ສັດນໍ້າທີ່ໄດ້ປ່ອຍທັງໝົດແມ່ນ 62 ລ້ານໂຕ.

ເນື່ອງໃນໂອກາດ ວັນປ່ອຍປາ ແລະ ສັດນໍ້າ ແຫ່ງຊາດ ວັນທີ 13 ກໍລະກົດ 2024 ແລະ ກົງກັບວັນຄ້າຍວັນເກີດ ຂອງ ປະທານ ສຸພານຸວົງ ຜູ້ນໍາທີ່ແສນເຄົາລົບຮັກ ຂອງປວງຊົນລາວທັງຊາດ ຂ້າພະເຈົ້າ ຕາງໜ້າໃຫ້ກະຊວງກະສິກໍາ ແລະ ປ່າໄມ້ ຂໍຮຽກຮ້ອງມາຍັງພາກສ່ວນຕ່າງໆ ທັງພາກລັດ ແລະ ເອກະຊົນ ໃນທົ່ວສັງຄົມ ຈົ່ງພ້ອມກັນ ຮ່ວມແຮງ ຮ່ວມໃຈ ຄຸ້ມຄອງ ພັດທະນາ ອະນຸລັກຮັກສາ ປາ ແລະ ສັດນໍ້າ ໃຫ້ຫຼາຍຂຶ້ນ ໂດຍສະເພາະ ສຸມໃສ່ການປ່ອຍປາ ແລະ ສັດນໍ້າ ຄືນສູ່ແຫຼ່ງນໍ້າທໍາມະຊາດ ເພີ່ມຄວາມອຸດົມສົມບູນທາງດ້ານຊະນິດພັນ ແລະ ຈໍານວນປະຊາກອນຂອງປາ ແລະ ສັດນໍ້າ ທີ່ເປັນມໍລະດົກທາງທໍາມະຊາດ ຂອງຊາດ ໃຫ້ຊົມໃຊ້ແບບຍືນຍົງ ແລະ ໃຫ້ເປັນມໍລະດົກຕົກທອດ ຮອດເຊັ່ນລູກ ເຊັ່ນຫຼານ ຂອງພວກເຮົາຕະຫຼອດໄປ ແລະ ໃຫ້ຜູ້ປະກອບການ ແລະ ພໍ່ແມ່ປະຊາຊົນ ລ້ຽງປາ ແລະ ສັດນໍ້າ ໃຫ້ຖືກຕ້ອງຕາມ ກົດໝາຍ ເພື່ອເປັນການ ສ້າງເສດຖະກິດ ສ້າງລາຍຮັບໃຫ້ຄອບຄົວ ແລະ ປະເທດ ຊາດໃຫ້ຫຼາຍຂຶ້ນ ດັ່ງຄໍາຂວັນຂອງປີນີ້ ທີ່ວ່າ: “ຊົມເຊີຍ ວັນປ່ອຍປາ ແລະ ສັດນໍ້າ ແຫ່ງຊາດ ວັນທີ 13 ກໍລະກົດ ຈົ່ງພ້ອມກັນປ່ອຍປາ ແລະ ສັດນໍ້າ ຄືນສູ່ທໍາມະຊາດ ໃຫ້ມີຄວາມອຸດົມສົມບູນຕະຫຼອດໄປ ການປົກປັກຮັກສາ ປາ ແລະ ສັດນໍ້າ ແມ່ນພັນທະຂອງປວງຊົນທັງຊາດ.
ຂ່າວ: ສາວລາວໃຕ້

แชร์