ປີນີ້ ສາລະວັນ ຈະປ່ອຍປາ 26 ລ້ານກວ່າໂຕ

ປີ2024 ນີ້, ແຂວງສາລະວັນ ມີແຜນຈະປ່ອຍປາຄືນສູ່ທຳມະຊາດ ຈຳນວນ 26 ລ້ານກວ່າໂຕ ລົງໃສ່ວັງສະຫງວນ ແລະປ່ອຍຕາມນໍ້າທຳມະຊາດເພື່ອເປັນການກະກຽມຮອງຮັບໃນການຕອບສະໜອງໃຫ້ປະຊາຊົນ, ຜູ້ປະກອບການ ຜູ້ທີ່ມີເງື່ອນໄຂໃນການລ້ຽງປາພາຍໃນແຂວງ ກໍຄືກະກຽມໃສ່ສ້າງຂະບວນການວັນອະນຸລັກສັດນໍ້າ-ສັດປ່າ ແລະ ວັນປ່ອຍປາແຫ່ງຊາດ 13 ກໍລະກົດ 2024 ທີ່ຈະມາເຖິງນີ້.

ທ່ານ ສີວັນປະກອນ ວົງບຸນທັນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງສາລະວັນ ໃຫ້ສຳພາດໃນວັນທີ 2 ກໍລະກົດ2024 ນີ້ວ່າ: ປັດຈຸບັນນີ້, ບັນດາສູນ, ສະຖານີຂອງລັດ, ບໍລິສັດ ແລະ ຫົວໜ່ວຍຄອບຄົວສາມາດຜະລິດລູກປາ ແລະ ກົບໄດ້ທັງໝົດ 27 ລ້ານໂຕ ເທົ່າກັບ 103,8% ຂອງແຜນການປີ, ເຫັນວ່າເກີນແຜນ ໃນ​ນີ້, ມີ ​ປາປາກ 8,3 ລ້ານກວ່າໂຕ, ປາ​ນິນ 3,7 ລ້ານກວ່າໂຕ, ປານວນຈັນ 2,2 ລ້ານກວ່າໂຕ, ປາ​ເຂັງ​ 2,1 ລ້ານກວ່າໂຕ, ປາໃນ 6 ລ້ານກວ່າໂຕ, ປາ​ດຸກ 2,8 ລ້ານກວ່າໂຕ, ປາ​ກິນ​ຫຍ້າ 1,3 ລ້ານກວ່າໂຕ ແລະ ກົບ 135.000 ໂຕ.

ສໍາລັບການກະກຽມໃສ່ວັນສ້າງຂະບວນການອະນຸລັກສັດນໍ້າ-ສັດປ່າ ແລະ ວັນປ່ອຍປາແຫ່ງຊາດປີນີ້ ໄດ້ປະສານສົມທົບກັບຫ້ອງການກະສິກໍາ ແລະປ່າໄມ້ 08 ຕົວເມືອງ ເພື່ອກະກຽມຈຸດສະຖານທີ່ປ່ອຍປາ ລວມມີ 16 ຈຸດ​ປ່ອຍໃນທົ່ວແຂວງ.​ ສ່ວນຂະບວນການປ່ອຍປາຂອງແຂວງ ແມ່ນໄດ້ເລືອກຈຸດວັງສະຫງວນ ຕາດເລາະ ເປັນຈຸດລວມ ແລະຈະສືບຕໍ່ຊຸກຍູ້ສົ່ງເສີມປະຊາຊົນປ່ອຍປາ ແລະສັດນໍ້າ ຈົນຮອດທ້າຍເດືອນກັນຍາຄາດວ່າຈະບັນລຸແຜນການທີ່ວາງໄວ້.​ ນອກຈາກຈະປ່ອຍໃນໝອງຂອງກະສິກອນແລ້ວ ຍັງຈະໄດ້ປ່ອຍຕາມທຳມະຊາດອີກ ທັງນີ້ກໍເພື່ອປູກຈິດສຳນຶກ ເຮັດໃຫ້ການອະນຸລັກໄດ້ເຜີຍແຜ່ກວ້າງຂວາງ ພ້ອມທັງຂະຫຍາຍພັນປາ ໃຫ້ອອກແມ່ແຜ່ພັນຢ່າງຫລວງຫລາຍ ແລະ ເປັນການສ້າງລາຍໄດ້ໃຫ້ກັບຄອບຄົວ, ແກ້ໄຂຊີວິດການເປັນຢູ່ໃຫ້ດີຂຶ້ນອີກດ້ວຍ.

ທ່ານ ສີວັນປະກອນ ວົງບຸນທັນ ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນ ຈົ່ງພ້ອມກັນອະນຸລັກຮັກສາ ບໍ່ໃຫ້ຫາປາ-ຫາສັດໃນເຂດສະຫງວນຢ່າງເດັດຂາດ ເນື່ອງຈາກສັດນໍ້າ-ສັດປ່າ ໃນໄລຍະເດືອນມິຖຸນາ-ເດືອນກໍລະກົດ ຂອງທຸກປີ ເປັນໄລຍະທີ່ສັດນໍ້າ, ສັດປ່າຂະຫຍາຍພັນຕາມທຳມະຊາດ ເປັນສ່ວນໃຫຍ່ ດັ່ງນັ້ນ, ເພື່ອເປັນການອະນຸລັກ, ປົກປັກຮັກສາ ໃຫ້ສັດນໍ້າ, ສັດປ່າ ໃນໄລຍະລະດູຝົນນີ້, ລັດຖະບານ ກໍຄືກະຊວງກະສິກຳ ແລະ ປ່າໄມ້ ຈຶ່ງມີກົດໝາຍຄຸ້ມຄອງ ເພື່ອເປັນການຫ້າມບໍ່ໃຫ້ຂ້າ, ລ່າສັດ ຫລື ວາງກັບດັກ, ຕັນຕ້ອນ, ຕັນລີ່ ເວລາປາຂຶ້ນວາງໄຂ່ຢ່າງເດັດຂາດ ເພື່ອເປັນການອະນຸລັກ ປົກປັກຮັກສາ ຊີວະນາໆພັນ ໃຫ້ຍືນຍົງຕະຫລອດໄປ.

แชร์