ເຄິ່ງປີ ອັດຕະປື ເກັບລາຍຮັບເຂົ້າລັດໄດ້ 386 ຕື້ກວ່າກີບ

ອີງຕາມການລາຍງານຂອງ ທ່ານ ຄໍາເຜີຍ ໂສມຖາວອນ ຫົວໜ້າພະແນກການເງີນແຂວງ ອັດຕະປື ຕໍ່ກອງປະຊຸມອົງການປົກຄອງແຂວງ ໃນວັນທີ 2 ກໍລະກົດ 2024 ນີ້ໃຫ້ຮູ້ວ່າ: ການຈັດຕັ້ງປະຕິບັດແຜນງົບປະມານ 6 ເດືອນຕົ້ນປີ 2024 ສາມາດບຸກທະລຸໄດ້ດ້ວຍການຂຸດຄົ້ນລາຍຮັບ ແລະປະຕິບັດການຄຸ້ມຄອງລາຍຈ່າຍງົບປະມານ ເຊີ່ງໄດ້ປະກອບສ່ວນຢ່າງຕັ້ງໜ້າ ເຂົ້າໃນການພັດທະນາເສດຖະກິດ - ສັງຄົມ ຂອງແຂວງ ແລະຕິດພັນກັບການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະນະໂຍບາຍວຽກງານສາມສ້າງ ຂອງຂະແໜງການເງິນ ໃນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາດ້ານການເງິນ ແລະໃນປີ 2024 ນີ້ ແມ່ນເປັນປີທີ 4 ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແລະເປັນປີທີ 2 ຂອງການຈັດຕັ້ງປະຕິບັດຕາມນະໂຍບາຍແຂວງກຸ້ມຕົນເອງ, ຄຽງຄູ່ກັບການສືບຕໍ່ຜັນຂະຫຍາຍ ແລະຈັດຕັ້ງປະຕິບັດແຜນພັດທະນາວຽກງານການເງິນ-ງົບປະມານ ແຕ່ປີ 2021-2025 ຂອງຂະແໜງການເງິນ, ເຊິ່ງປີ 2024 ແຂວງອັດຕະປື ກໍ່ຄືພະແນກການເງີນແຂວງ ໄດ້ຮັບຕົວເລກແຜນການມອບໝາຍລາຍຮັບງົບປະມານທັງໝົດ 750 ຕື້ກີບ, ທຽບໃສ່ແຜນການປີ 2023 ເທົ່າກັບ 128.48%.

ຜ່ານການຈັດຕັ້ງປະຕິບັດແຜນງົບປະມານໃນ 6 ເດືອນຕົ້ນປີ ມາຮອດວັນທີ 25 ມີຖຸນາ ປີ 2024ປະຕິບັດລາຍຮັບໄດ້ທັງໝົດ 386 ຕື້ກວ່າກີບ, ເທົ່າກັບ 55.77% ຂອງແຜນການປີ, ໃນນັ້ນ ລາຍຮັບພູດສູນກາງ 61 ຕື້ກວ່າກີບ ເທົ່າກັບ 52.54% ຂອງແຜນການປີ, ລາຍຮັບທ້ອງຖີ່ນ 325 ຕື້ກວ່າກີບ ເທົ່າກັບ 56.43% ຂອງແຜນການປີ, ຮັບຈາກສ່ວຍສາອາກອນ 165 ຕື້ກວ່າກີບ ເທົ່າກັບ 61.94% ຂອງແຜນການປີ, ຮັບຈາກຊັບສີນຂອງລັດ 160 ຕື້ກວ່າກີບ ເທົ່າກັບ 51.67% ຂອງແຜນການປີ ແລະ ເກັບລາຍຮັບຈາກຫົວໜ່ວຍທີ່ສູນກາງມອບໃຫ້ ປະຕິບັດໄດ້ 253 ຕື້ກວ່າກີບ ເທົ່າກັບ 53.58%, ເຄື່ອນຍ້າຍໃຫ້ສູນກາງ 40 ຕື້ກີບ ເທົ່າກັບ 35.65% ຂອງແຜນການປີ, ໃນຄະນະດຽວກັບ 6 ເດືອນຜ່ານມາ ປະຕິບັດລາຍຈ່າຍໄດ້ 188 ຕື້ກວ່າກີບ ເທົ່າກັບ 50.03% ຂອງແຜນການປີ, ຕົ້ນຕໍແມ່ນຈ່າຍເງິນເດືອນ ແລະ ເງິນອຸດໜູນຕ່າງໆ 113 ຕື້ກວ່າກີບ ເທົ່າກັບ 50.46% ຂອງແຜນການປີ, ຈ່າຍເງິນນະໂຍບາຍ ແລະ ຊ່ວຍໜູນຕ່າງໆ 9 ຕື້ກວ່າກີບ ເທົ່າກັບ 28.51% ຂອງແຜນການປີ, ຈ່າຍເງິນບໍລິຫານ 13 ຕື້ກວ່າກີບ ເທົ່າກັບ 30.32% ຂອງແຜນການປີ, ຈ່າຍເງິນດັດສົມ-ສົ່ງເສີມ 2 ຕື້ກວ່າກີບ ເທົ່າກັບ 1,22% ຂອງແຜນການປີ, ຈ່າຍເງິນແຮ ແລະ ເງິນອື່ນໆ 29 ຕື້ກວ່າກີບ, ຈ່າຍເງິນຊື້ຊັບສົມບັດຄົງທີ່ 15 ລ້ານກວ່າກີບ ເທົ່າກັບ 2.62% ຂອງແຜນການປີ, ແລະ ຈ່າຍເງິນລົງທືນ ມີ 19 ຕື້ກວ່າກີບ ເທົ່າກັບ 32,96% ຂອງແຜນການປີ.
ຂ່າວ: ພອນປະເສີດ

แชร์