ລ້ຽງໄກ່ພັນໄຂ່ ເປັນໜຶ່ງອາຊີບທີ່ສ້າງລາຍຮັບໄດ້ຢ່າງໝັ້ນຄົງ

ປັດຈຸບັນການສ້າງອາຊີບເສີມໃຫ້ຕົນເອງ ແລະຄອບຄົວຖືວ່າເປັນວິຖີຊີວິດໜຶ່ງທີ່ສ້າງຄວາມໜັ້ນຄົງໃນການແກ້ໄຂຊີວິດການເປັນຢູ່, ເຊິ່ງເໝາະກັບຍຸກປັດຈຸບັນທີ່ເຫັນໄດ້ວ່າຄ່າຄອງຊີບນັບມື້ເພີ່ມຂຶ້ນ, ສະນັ້ນການຫັນມາສູ່ການຜະລິດກະສິກຳປູກຝັງ-ລ້ຽງສັດ ເປັນອາຊີບໜຶ່ງທີ່ຈະຊ່ວຍສ້າງລາຍຮັບ ແລະຊ່ວຍແກ້ໄຂຊີວິດການເປັນຢູ່ດີຂຶ້ນເທື່ອລະກ້າວ.

ທ່ານ ນາງ ທຽນສະຫວ່າງ ພົມມະລີວົງ ອາຍຸ 35 ປີ ຢູ່ບ້ານນາມັນປາ ເມືອງໜອງບົກ ແຂວງຄຳມ່ວນ ທັງເປັນສະມາຊິກຊາວໜຸ່ມຫ້ອງການສາທາລະນະສຸກເມືອງ ທີ່ເປັນຊາວໜຸ່ມຕົວແບບທາງດ້ານການປູກຝັງ-ລ້ຽງສັດ ລາຍງານໃນພິທີປະກາດຮັບຮອງຄະນະຊາວໜຸ່ມເມືອງໜອງບົກ ເປັນເມືອງ 4 ບຸກ ແລະ 3 ດີ 4 ຮູ້ ປະຈໍາປີ 2023 ເມື່ອບໍດົນມານີ້ວ່າ: ຕົນເອງ ເປັນພະນັກງານ-ລັດຖະກອນ ສັງກັດຢູ່ ຫ້ອງການສາທາລະນະສຸກເມືອງໜອງບົກ ສ່ວນຜົວ ແມ່ນໄດ້ອອກຈາກລາດຊະການແລ້ວ ເພື່ອຫັນມາເຮັດກິດຈະກໍາຂອງຄອບຄົວ, ແຕ່ກ່ອນຕົນເອງ ແລະ ຄອບຄົວແມ່ນອາໄສ ແຕ່ເງິນເດືອນຂອງການເປັນພະນັກງານ ເຫັນວ່າລາຍຮັບພໍແຕ່ກຸ້ມກິນເທົ່ານັ້ນ ໃນປີ 2020 ຕົນ ແລະ ຄອບຄົວ ຈຶ່ງມີແນວຄວາມຄິດລິເລີ່ມຢາກຫັນເອົາເວລາຫວ່າງມາສ້າງເສດຖະກິດຄອບຄົວ ດ້ວຍການລ້ຽງໄກ່ພັນໄຂ່ຂາຍ, ການລົງທຶນເບື້ອງຕົ້ນ ເພື່ອເຮັດຄອກ ແລະ ໄດ້ຊື້ໄກ່ເຂົ້າມາທົດລອງ ຈໍານວນ 500 ໂຕ ເປັນເງິນ 30 ລ້ານກີບ ເພື່ອມາຈັດສັນສະຖານທີ່ ມາຮອດປັດຈຸບັນໄກ່ໄຂ່ມີຈຳນວນເພີ່ມຂຶ້ນເປັນ 1.500 ໂຕ ໄລຍະການລ້ຽງ 3 ອາທິດ ແມ່ນສາມາດເກັບໄຂ່ຂາຍໄດ້ແລ້ວ ເປັນລາຍຮັບແຕ່ລະມື້ ຈົນກວ່າໄກ່ອາຍຸໄດ້ 2 ປີ ຖືວ່າສຸດໄຂ່, ການລ້ຽງກໍຄື ໃຫ້ອາຫານເຊົ້າ-ແລງ, ໄກ່ພັນໄຂ່ນີ້ເປີເຊັນການຕາຍແມ່ນມີໜ້ອຍ ຕ້ອງໄດ້ບົວລະບັດໃສ່ຢາປ້ອງກັນ ເມື່ອຮອດລະດູຝົນ, ແຮງງານຫລັກຕົ້ນຕໍ ກໍແມ່ນຄອບຄົວ ແລະ ຈ້າງຄົນງານເພີ່ມ 2 ຄົນ, ເຖິງວ່າຈະບໍ່ໄດ້ເປັນຟາມໃຫຍ່ກໍຕາມແຕ່ກໍສາມາດແກ້ໄຂຊີວິດການເປັນຢູ່ພາຍໃນຄອບຄົວໄດ້ສະເລ່ຍມີລາຍຮັບຈາກການຂາຍໄຂ່ປະມານ 10 ລ້ານກີບຕໍ່ເດືອນ ລາຍຮັບນີ້ແມ່ນໄດ້ຫັກລົບຕົ້ນທຶນແລ້ວ, ເຊິ່ງໃນແຕ່ລະມື້ຈະຕື່ນນອນແຕ່ເຊົ້າ ເພື່ອມາໃຫ້ອາຫານ ແລະ ເກັບໄຂ່ໃສ່ແຕະໄວ້ ເພື່ອຈໍາໜ່າຍສົ່ງລູກຄ້າ, ໄດ້ຄັດແຍກອອກເປັນ 3 ເກຣດ ລາຄາ 60.000-70.000 ກີບຕໍ່ 1 ແຕະ ນອກຈາກການຂາຍໄຂ່ແລ້ວມີຝຸ່ນຄອກຂາຍນຳອີກ ຈະຂາຍໃນລາຄາເປົາໜຶ່ງ 20.000 ກີບ ພ້ອມທັງຂາຍໄກ່ໂຕທີ່ມັນສຸດໄຂ່ແລ້ວ ໃນລາຄາ 1 ໂຕ 50.000 ກີບ ສາມາດເວົ້າໄດ້ວ່າ ລາຍຮັບທັງໝົດຈາກການຂາຍໄຂ່, ຂາຍແມ່ໄກ່ ແລະ ຂາຍຝຸ່ນຄອກ ລວມລາຍຮັບ ຈໍານວນ 320 ລ້ານກີບຕໍ່ 1 ຊຸດ ຂອງການລ້ຽງ.

ທ່ານ ນາງ ທຽນສະຫວ່າງ ພົມມະລີວົງ ໃຫ້ຮູ້ຕື່ມວ່າ: ສຳລັບແຜນພັດທະນາໃນຕໍ່ໜ້າ ທາງຄອບຄົວຈະຂະຫຍາຍພື້ນທີ່ຂອງການລ້ຽງໄກ່ພັນໄຂ່ ເພີ່ມອີກໃຫ້ໄດ້ 300 ໂຕ ເພື່ອຈະໃຫ້ທ່ວງທັນກັບຄວາມຮຽກຮ້ອງຕ້ອງຂອງຕະຫລາດ. ຍ້ອນຄວາມດຸໝັ່ນ, ຊື່ສັດ, ປະຢັດ, ອົດທົນ ຈຶ່ງເຮັດໃຫ້ຄອບຄົວຂອງຂ້າພະເຈົ້າ ຫລຸດພົ້ນອອກຈາກຄວາມທຸກຍາກ ກາຍເປັນຄອບຄົວຊາວໜຸ່ມຕົວແບບໃນປັດຈຸບັນ.

ສະນັ້ນສະມາຊິກຊາວໜຸ່ມຄວນເອົາເປັນແບບຢ່າງ ໃນການສ້າງເສດຖະກິດຄອບຄົວ ບໍ່ວ່າອາຊີບໃດກໍດີ ແລະໃຫ້ຖືກຕ້ອງຕາມລະບຽບກົດໝາຍ ຖ້າພວກເຮົາຫາກເຮັດດ້ວຍຄວາມອົດທົນ, ເຮັດແບບມີຫົວຄິດປະດິດສ້າງ, ກ້າເຮັດ, ກ້າຕັດສິນໃຈລົງມື ແນ່ນອນຜົນສໍາເລັດກໍຈະຕາມມາ ເພື່ອໃຫ້ບັນລຸຕາມເນື້ອໃນຂໍ້ແຂ່ງຂັນ 4 ບຸກ ຂອງຊາວໜຸ່ມລາວ ໃນຂໍ້ທີ 4 ຄື: ບຸກດ້ານວິຊາຊີບ-ສ້າງວຽກເຮັດງານທຳ. ຖ້າໃຜສົນໃຈຢາກຖອດຖອນບົດຮຽນດ້ານເຕັກນິກວິທີການແບບນີ້ກໍສາມາດມາໄດ້ ຫລື ຕ້ອງການໄຂ່ໄປຂາຍ ຫລື ໄກ່ນໍາໄປທົດລອງລ້ຽງ ຕິດຕໍ່ປະສານຫາ ທ່ານ ນາງ ທຽນສະຫວ່າງ ພົມມະລີວົງ ເບີໂທລະສັບ 030 5615151; What app 02056475757; Facebook: Koung Phommalyvong.

ໂດຍ: ກັນຍາ

แชร์