ເຄິ່ງປີ ເສດຖະກິດແຂວງອັດຕະປື ຂະຫຍາຍຕົວຢູ່ໃນລະດັບ 5.23%

ອີງຕາມການລາຍງານຂອງ ທ່ານ ສູນນະຄອນ ແກ້ວວຽງຄໍາ ຫົວໜ້າພະແນກແຜນການ ແລະການລົງທຶນແຂວງອັດຕະປື ຕໍ່ກອງປະຊຸມອົງການປົກຄອງແຂວງ ເມື່ອວັນທີ 2 ກໍລະກົດ 2024ນີ້ ໃຫ້ຮູ້ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2024 ຂອງແຂວງອັດຕະປື ແມ່ນດໍາເນີນຢູ່ໃນເງື່ອນໄຂສະພາບການຂອງໂລກ ແລະ ພາກພື້ນ ຍັງສືບຕໍ່ຜັນແປຢ່າງສັບສົນ ແລະ ມີຄວາມທ້າທາຍຫຼາຍດ້ານ ເປັນຕົ້ນ: ເສດຖະກິດ ໂລກຍັງສືບຕໍ່ຖົດຖອຍ, ອັດຕາເງິນເຟີ້ເພີ່ມສູງຂຶ້ນ, ຄວາມຂັດແຍ່ງທາງດ້ານການເມືອງຢູ່ບາງຂົງເຂດ, ໄພພິບັດທາງທໍາມະຊາດທີ່ເກີດຂຶ້ນ,ເຊິ່ງສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງແຂວງ, ຄຽງຄູ່ກັບສິ່ງທ້າທາຍດັ່ງກ່າວ ກໍຍັງມີໂອກາດຫຼາຍດ້ານ ເປັນຕົ້ນ: ການເປີດປີທ່ອງທ່ຽວລາວ ໃນປີ 2024, ການສືບຕໍ່ປະຕິບັດ 2 ວາລະແຫ່ງຊາດ ແລະວຽກງານເຄັ່ງຮ້ອນ ເຊິ່ງກາຍເປັນປັດໃຈທີ່ສໍາຄັນໃຫ້ແກ່ການພັດທະນາເສດຖະກິດ-ສັງຄົມ ໃນປີ 2024 ຂອງແຂວງອັດຕະປື ມີການຂະຫຍາຍຕົວ.

ໃນໄລຍະ 6 ເດືອນຕົ້ນປີ ລວມຍອດຜະລິດຕະພັນພາຍໃນ ຂະຫຍາຍຕົວສະເລ່ຍຢູ່ໃນລະດັບ 5.23% (ມະຕິສະພາ 6.92%), ເປັນມູນຄ່າຕາມລາຄາໃນປີ 5,522 ຕື້ກີບ ເທົ່າກັບ 83% ຂອງແຜນການ (ມະຕິສະພາ 6,615 ຕື້ກີບ), ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນ 33.17 ລ້ານກີບ ຫຼື 1,504 ໂດລາ (ອັດຕາແລກປ່ຽນ 22,054 ກີບ/1 ໂດລາ), ໃນນັ້ນ: ຂະແໜງກະສິກຳ-ປ່າໄມ້ ຂະຫຍາຍຕົວ 6.82% ກວມເອົາ 51.07% ຂອງ GDP (ມະຕິສະພາ: ຂະຫຍາຍຕົວ 8.49% ກວມເອົາ 48.43% ຂອງ GDP), ຂະແໜງອຸດສາຫະກຳຂະຫຍາຍຕົວ 3.23% ກວມເອົາ 25.18% ຂອງ GDP (ມະຕິສະພາ: ຂະຫຍາຍຕົວ 4.27% ກວມເອົາ 23.27% ຂອງ GDP) ແລະ ຂະແໜງບໍລິການ ຂະຫຍາຍຕົວ 2.41% ກວມເອົາ 23.74% ຂອງ GDP (ມະຕິສະພາ: ຂະຫຍາຍຕົວ 5.05% ກວມເອົາ 28.29% ຂອງ GDP).

ປັດໃຈຕົ້ນຕໍທີ່ຍູ້ແຮງເຮັດໃຫ້ຕົວເລກ GDP ເພີ່ມຂຶ້ນ ແມ່ນຍ້ອນຂະແໜງກະສິກຳ ແລະ ຂະແໜງອຸດສາຫະກຳປຸງແຕ່ງ ຕົ້ນຕໍ ແມ່ນມາຈາກການຜະລິດພືດ ແລະ ສັດ ເພື່ອທົດແທນການນໍາເຂົ້າ ແລະສົ່ງອອກເພີ່ມຂຶ້ນໂດຍສະເພາະພືດອຸດສາຫະກຳ (ມັນຕົ້ນ, ໝາກກ້ວຍ, ອ້ອຍ ແລະໝາກໄມ້ອື່ນໆ), ນອກຈາກນັ້ນກໍເຫັນວ່າຂະແໜງການຄ້າ (ຂາຍຍົກ-ຂາຍຍ່ອຍ), ຂະແໜງຄົມມະນາຄົມຂົນສົ່ງ ແລະຂະແໜງໂຮງແຮມ-ຮ້ານອາຫານ ກໍ່ມີການຂະຫຍາຍຕົວດີເຊັ່ນດຽວກັນ.
ຂ່າວ: ພອນປະເສີດ

แชร์