ສູນບໍລິການໄຟຟ້າ ຫາດຊາຍຟອງ ເລັ່ງແກ້ໄຂບັນຫາໄຟຟ້າຕົກ-ໄຟບໍ່ພໍ, ໄຟດັບ ໃຫ້ປົກກະຕິ

ບັນຫາໄຟຟ້າຕົກ-ໄຟຟ້າບໍ່ພໍ ຫລືໄຟຟ້າດັບ ໃນບາງເວລາ ຢູ່ເມືອງຫາດຊາຍຟອງ ນະຄອນຫລວງວຽງຈັນ ເກີດຈາກຫລາຍສາເຫດທັງໃນ ແລະນອກເຕັກນິກເປັນຕົ້ນ ເກີດຈາກໄພທຳມະຊາດ, ເກີດຈາກຄວາມຜິດພາດທາງດ້ານເຕັກນິກ (ອຸປະກອນເປ່ເພ) ແລະ ສ່ວນໜຶ່ງເກີດຈາກການເພີ່ມຂຶ້ນຂອງຈຳນວນຄົວເຮືອນ, ການຊົມໃຊ້ໄຟຟ້າ ຂອງແຕ່ລະຄົວເຮືອນເກີນກຳນົດ (ເກີນກຳລັງໝໍ້ແປງ) ແລະ ອື່ນໆ. ຕໍ່ກັບບັນຫາດັ່ງກ່າວ, ສູນບໍລິການໄຟຟ້າ ເມືອງຫາດຊາຍຟອງ ພວມເລັ່ງແກ້ໄຂ ເພື່ອໃຫ້ປະຊາຊົນພາຍໃນເມືອງໄດ້ຊົມໃຊ້ໄຟຟ້າໄດ້ຢ່າງພຽງພໍ ແລະເປັນປົກກະຕິ.

ທ່ານ ສຸລິນທອນ ປະທິວັນ ຫົວໜ້າສູນບໍລິການໄຟຟ້າ ເມືອງຫາດຊາຍຟອງ ນະຄອນຫລວງວຽງຈັນ ໄດ້ໃຫ້ສຳພາດໃນວັນທີ 28 ມິຖຸນາ 2024 ຜ່ານມານີ້ວ່າ: ສາເຫດ ທີ່ເຮັດໃຫ້ ໄຟຟ້າຕົກ-ໄຟຟ້າບໍ່ພໍ ຫລື ໄຟຟ້າດັບ ໃນບາງເວລາ ຢູ່ເມືອງຫາດຊາຍຟອງ ເກີດມາຈາກຫລາຍສາເຫດ ເປັນຕົ້ນ ທາງດ້ານນອກເຕັກນິກ ເກີດຈາກໄພທຳມະຊາດ ຄື ໃນລະດູຝົນ ເກີດມີລົມແຮງ, ຝົນຕົກ-ຟ້າຮ້ອງ-ຟ້າຜາ ເຮັດໃຫ້ຕົ້ນໄມ້ຫັກ, ລົ້ມທັບສາຍໄຟ, ເຄືອໄມ້, ດອກກັນໄຟແຕກ, ເສົາລົ້ມ, ສາຍໄຟຂາດ, ກົງເຕີໄໝ້ ແລະ ອື່ນໆ. ສ່ວນລະດູຮ້ອນ ສາຍຕາຂ່າຍຂາດ, ບັ້ງຟີວໄໝ້, ເສັ້ນຟີວຂາດ, ກ້ອນຟີວຂາດ, ຂົ້ວຕາຂ່າຍຫລົມ-ຂາດ ແລະ ເກີດຈາກລະບົບໄຟໃນເຮືອນຂອງປະຊາຊົນເອງ (ຊົມໃຊ້ໄຟເກີດກຳນົດ) ເຊິ່ງກວມ 70%. ອີກສ່ວນໜຶ່ງ ເກີດຈາກການເກີດອຸບັດເຫດ ເຊັ່ນ: ການກໍ່ສ້າງອາຄານ, ລົດຕຳເສົາ, ລົດເກາະສາຍໄຟ ແລະ ເກີດຈາກການປັບປຸງທາງ ໃນຈຸດທີ່ມີສາຍໄຟຝັງດິນ. ສຳລັບ ດ້ານໃນເຕັກນິກ ເກີດຈາກອຸປະກອນໄຟຟ້າເປ່ເພ, ເສຍຫາຍ ຕ້ອງໄດ້ດັບໄຟ ເພື່ອສ້ອມແປງ.

ຢ່າງໃດກໍຕາມ ເພື່ອເຮັດໃຫ້ປະຊາຊົນ ພາຍໃນເມືອງຫາດຊາຍຟອງ ໄດ້ຊົມໃຊ້ໄຟຟ້າ ຢ່າງພຽງພໍ ແລະ ເປັນປົກກະຕິ ສູນບໍລິການໄຟຟ້າ ເມືອງຫາດຊາຍຟອງ ໄດ້ມີແຜນ ທີ່ຢູ່ໃນຂັ້ນຕອນດຳເນີນການຈັດຕັ້ງປະຕິບັດ ເປັນຕົ້ນພາກຕາຂ່າຍ 22 ກິໂລໂວນ ຈະປ່ຽນສາຍຕາຂ່າຍນ້ອຍເປັນໃຫຍ່ ແຕ່ວົງວຽນສົມສະໜຸກ ຫາ ກົງເຕີ ຕໍ່ເຂດບ້ານສົມຫວັງ, ປ່ຽນສາຍຕາຂ່າຍນ້ອຍ ເປັນໃຫຍ່ ແຕ່ວົງວຽນ ສົມສະໜຸກ ຫາ ກົງເຕີຕໍ່ເຂດດອນກອຍ. ພາກຕາຂ່າຍ 0.4 ກິໂລໂວນ ຈະປ່ຽນສາຍຕາຂ່າຍນ້ອຍເປັນໃຫຍ່ ແລະ ເປືອຍເປັນຫຸ້ມ ຢູ່ເຂດບ້ານຖິ່ນເພຍ. ສຳລັບ ພາກໝໍ້ແປງ 22/0.4 ກິໂລໂວນ ມີແຜນຈະປັບປຸງຍົກກຳລັງໝໍ້ແປງ ແລະ ປ່ຽນໝໍ້ແປງໃຫ້ມີກຳລັງໃຫຍ່ຂຶ້ນ, ປັດຈຸບັນ ໄດ້ຂຶ້ນແຜນປະຕິບັດ ແລະ ຢູ່ໃນຂັ້ນຕອນການຈັດຊື້ ຈຳນວນ 27 ໜ່ວຍ (ສະເພາະເມືອງຫາດຊາຍຟອງ) ແລະ ຈະເສີມໝໍ້ແປງ ໃຫ້ແຕ່ລະບ້ານ ຈຳນວນ 8 ບ້ານ ທີ່ມີຕາຂ່າຍນ້ອຍ ແລະ ໄກຈາກໝໍ້ແປງ ທີ່ເປັນສາເຫດເຮັດໃຫ້ໄຟບໍ່ພໍ (ແຮງດັນຕົກ) ໃຫ້ໄດ້ຊົມໃຊ້ໄຟຟ້າຢ່າງພຽງພໍ.

ໂອກາດນີ້, ທ່ານ ສຸລິນທອນ ປະທິວັນ ຍັງໄດ້ຮຽກຮ້ອງໃຫ້ປະຊາຊົນ ພາຍໃນນະຄອນຫລວງວຽງຈັນ ໂດຍສະເພາະ ປະຊາຊົນໃນເມືອງຫາດຊາຍຟອງ ພ້ອມກັນຊົມໃຊ້ໄຟຟ້າຢ່າງມີສະຕິ, ກວດກາສະພາບເຕັັກນິກໄຟຟ້າຢູ່ ໃນເຮືອນຂອງຕົນເອງ ເປັນຕົ້ນ ກວດສາຍໄຟ, ດອກໄຟ ແລະ ອື່ນໆ ໃຫ້ເປັນປະຈຳ, ພ້ອມກັນໃຊ້ໄຟຟ້າຢ່າງປະຢັດ, ມັດທະຍັດ (ຊົມໃຊ້ໄຟຟ້າຕາມກຳນົດ ຫ້າມໃຊ້ໄຟເກີນ) ແລະ ໃຫ້ເປັນຫູເປັນຕາ ຊ່ວຍກັນ ຖ້າເຫັນອຸບັດເຫດເກີດຂຶ້ນ ໂດຍສະເພາະ ຕົ້ນໄມ້ລົ້ມທັບສາຍໄຟ, ກິ່ງໄມ້ ຫລື ງ່າໄມ້ ເດໄປໃສ່ ສາຍໄຟ ແລະ ອື່ນໆ ກໍໃຫ້ແຈ້ງ ໜ່ວຍງານ ກ່ຽວຂ້ອງ ກໍຄື ໂທສາຍດ່ວນ 1199 ໄດ້ຕະຫລອດ 24 ຊົ່ວໂມງ ເພື່ອໃຫ້ເຈົ້າໜ້າທີ່ໄຟຟ້າ ລົງໄປແກ້ໄຂ ຫລື ຕັດອອກ ແລະ ພ້ອມກັນ ໃຫ້ຄວາມຮ່ວມມື ກັບເຈົ້າໜ້າທີ່ໄຟຟ້າ; ໃຫ້ປະຊາຊົນ ເປັນເຈົ້າການ ປະຕິບັດພັນທະຂອງຕົນເອງ ກໍຄື ຈ່າຍຄ່າໄຟຟ້າ ໃຫ້ເປັນປົກກະຕິ, ຈ່າຍໃຫ້ຖືກຕາມກຳນົດເວລາ (ບໍ່ໃຫ້ຕິດໜີ້ຍືດຍາວ ຈົນກ້າວໄປເຖິງເຈົ້າໜ້າທີ່ໄຟຟ້າໄປຕັດໄຟ ແລ້ວເກີດມີຫາງສຽງຕໍ່ວ່າ).
ຂ່າວ: ທະນູທອງ

แชร์