ເປີດນຳໃຊ້ເວັບໄຊ ກອງປະຊຸມ ໄອປາ ຄັ້ງທີ 45

ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX, ວັນທີ 1 ກໍລະກົດ 2024 ນີ້, ສະພາແຫ່ງຊາດ ໄດ້ເປີດນຳໃຊ້ເວັບໄຊ ຂອງກອງປະຊຸມສະມັດຊາໃຫຍ່ລັດຖະສະພາລະ ຫວ່າງຊາດອາຊຽນ ຫລື ໄອປາ(AIPA) ຄັ້ງທີ 45 (https://www.aipa45.gov.la) ໃຫ້ກຽດຮ່ວມເປີດເວັບ ໄຊດັ່ງກ່າວ ມີ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ມີບັນດາຮອງປະທານສະພາແຫ່ງຊາດ, ປະທານກໍາມາທິການ, ເລຂາທິການສະພາແຫ່ງຊາດ, ພ້ອມດ້ວຍຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ ເຂົ້າຮ່ວມ.

ທ່ານ ຈັນທະວົງ ແສນອາມາດມົນຕີ ຮອງປະທານກຳມາທິການການຕ່າງປະເທດ ໃຫ້ຮູ້ວ່າ: ອະນຸກໍາມະການກອງເລຂາແຫ່ງຊາດ ໄດ້ສົມທົບກັບສະຖາບັນຄົ້ນຄວ້ານິຕິກຳ ສະພາແຫ່ງຊາດ ອອກແບບ ແລະ ພັດທະນາເວັບໄຊ ຂອງກອງປະຊຸມສະມັດຊາໃຫຍ່ ລັດຖະສະພາ ລະຫວ່າງຊາດອາຊຽນ (AIPA) ຄັ້ງທີ 45, ຈຸດປະສົງແມ່ນເພື່ອເຜີຍແຜ່ຂໍ້ມູນ-ຂ່າວສານ, ຂໍ້ມູນພື້ນຖານ, ການຕິດຕາມເອກະສານ, ແຜນການປະຕິບັດງານ, ແຜນການເຄື່ອນໄຫວຕ່າງໆ ແລະ ຄວາມຄືບໜ້າ ຂອງກະກຽມກອງປະຊຸມເປັນແຕ່ລະໄລຍະອອກສູ່ສາທາ ລະນະ ໃຫ້ແກ່ບັນດາປະເທດລັດຖະສະພາສະມາຊິກໄອປາ, ປະເທດຜູ້ສັງເກດການ ແລະ ອົງການກ່ຽວຂ້ອງ ໃນການເຂົ້າເຖິງເນື້ອໃນເອກະສານ ທີ່ກ່ຽວຂ້ອງກັບກອງປະຊຸມສະມັດຊາໃຫຍ່ ລັດຖະສະພາ ລະຫວ່າງຊາດອາ ຊຽນ ຄັ້ງທີ 45 ແລະ ເຜີຍແຜ່, ໂຄສະນາ, ປຸກລະດົມ ເພື່ອໃຫ້ປະຊາຊົນໃນທົ່ວສັງຄົມ ຮັບຊາບ ແລະ ເຂົ້າໃຈກ່ຽວກັບຄວາມໝາຍຄວາມສໍາຄັນຂອງການເປັນເຈົ້າພາບຈັດກອງປະຊຸມໄອປາ ແລະ ການປະກອບສ່ວນເຂົ້າໃນການຮ່ວມກັນເປັນເຈົ້າພາບທີ່ດີ.

ໂຄງຮ່າງໜ້າເວັບໄຊ ອອກແບບເປັນພາສາອັງກິດ, ເນື້ອໃນຂອງເວັບໄຊ ປະກອບມີ: ໜັງສືເຊີນ, ຮ່າງວາລະດໍາເນີນກອງປະຊຸມ, ຮ່າງຕາຕະລາງການດໍາເນີນກອງປະຊຸມ, ຂໍ້ມູນທົ່ວໄປ, ບົດສະເໜີຂອບແນວຄວາມຄິດ, ຮ່າງມະຕິກອງປະຊຸມ, ແບບຟອມການລົງທະບຽນ ແລະ ເນື້ອໃນເອກະສານກ່ຽວຂ້ອງທີ່ຈຳເປັນ ອື່ນໆ.
ຂ່າວ: ສາວລາວໃຕ້

แชร์