ຫລາຍພາກສ່ວນຮ່ວມສົ່ງເສີມການທ່ອງທ່ຽວພາຍໃນ
ສະພາການຄ້າ ແລະ ອຸດສາຫະກຳ ແຫ່ງຊາດລາວ ຮ່ວມກັບ ສະມາຄົມທຸລະກິດທ່ອງທ່ຽວລາວ, ສູນການຄ້າວຽງຈັນເຊັນເຕີ ແລະ ບໍລິສັດ ການບິນລາວ ຈັດງານສົ່ງເສີມການທ່ອງທ່ຽວພາຍໃນ ພາຍໃຕ້ຫົວຂໍ້ “Let' Travel ບິນ ກິນ ທ່ຽວ ຄົບຈົບໃນງານດຽວ” ຢູ່ສູນການຄ້າວຽງຈັນເຊັນເຕີ ນະຄອນຫລວງວຽງຈັນໃນລະຫວ່າງວັນທີ 28-30 ມິຖຸນາ 2024, ໃຫ້ກຽດເຂົ້າຮ່ວມມີ ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ງານສົ່ງເສີມການທ່ອງທ່ຽວພາຍໃນ ພາຍໃຕ້ຊື່ງານ “Let' Travel ບິນ ກິນ ທ່ຽວ ຄົບຈົບໃນງານດຽວ“ ຖືເປັນການຮ່ວມຈັດງານສົ່ງເສີມການທ່ອງທ່ຽວລາວ ເປັນຄັ້ງທີ 4 ແນໃສ່ ສົ່ງເສີມພາກຫົວໜ່ວຍທຸລະກິດການທ່ອງທ່ຽວ ແລະ ທຸລະກິດທ້ອງຖິ່ນ ພາຍໃນປະເທດ ໃຫ້ມີຄວາມເຂັ້ມແຂງຂຶ້ນກວ່າເກົ່າ ເພື່ອຊຸກຍູ້ສົ່ງເສີມ ປີທ່ອງທ່ຽວລາວ 2024 ໃຫ້ມີບັນຍາກາດອັນຄຶກຄື້ນ ແນໃສ່ດຶງດູດ ເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວ ສປປ ລາວ ໃຫ້ຫລາຍຂຶ້ນ.
ພາຍໃນງານຜູ້ເຂົ້າຮ່ວມຍັງມີສິດຮ່ວມລຸ້ນຮັບລາງວັນ ປີ້ຍົນພາຍໃນປະເທດ, ບັດເຂົ້າສະປາ, ລອຍນໍ້າ ແລະ ຫ້ອງພັກຟຣີ ຢູ່ຫລາຍສະຖານທີ່ທ່ອງທ່ຽວ ແລະ ໂຮງແຮມ ຈາກຜູ້ປະກອບການດ້ານການທ່ອງທ່ຽວ ທີ່ໄດ້ນຳເອົາຜະລິດຕະພັນຂອງຕົນມາວາງສະແດງ ພຽງແຕ່ຈອງແພັກເກັດທ່ອງທ່ຽວ ພາຍໃນງານ. ຫລັງຈາກນັ້ນ, ນຳໃບບິນ ຫລື ຫລັກຖານການຈອງ ມາຂຽນຄູປ່ອງປ່ອນຊີງໂຊກໄດ້ທີ່ຫ້ອງວາງສະແດງ Exo Travel Laos ແລະ ຈະມີການຈັບສະຫລາກປະກາດຜົນລາງວັນ ຜ່ານຊ່ອງທາງ Facebook Page Vientiane Center.
ຂ່າວ: ໄພ້ໄຊທານີ
