ໃນລະຫວ່າງວັນທີ 10 ມິຖຸນາ 2024, ທ່ານ ບຸນໂຈມ ອຸບົນປະເສີດ ເລຂາພັກແຂວງ ເຈົ້າແຂວງສະຫວັນນະເຂດ ພ້ອມດ້ວຍຄະນະນຳບັນດາພະແນກການ, ກົມກອງຂອງແຂວງ ໄດ້ສືບຕໍ່ລົງຕິດຕາມ, ຊຸກຍູ້ວຽກງານການພັດທະນາຮອບດ້ານ ແລະການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກຢູ່ເມືອງວິລະບູລີ. ໂດຍໄດ້ຮັບການຕ້ອນຮັບ ແລະນຳພາທາງຂອງທ່ານ ວາລິຍະ ສີຈັນທອງທິບ ເຈົ້າເມືອງວິລະບູລີ ພ້ອມຄະນະ.

 

ໂອກາດນີ້, ທ່ານເຈົ້າແຂວງສະຫວັນນະເຂດ ກໍ່ໄດ້ໃຫ້ກຽດພົບປະໂອ້ລົມຄະນະພັກ-ອຳນາດການປົກຄອງເມືອງ ຕະຫຼອດເຖິງພະນັກງານຫຼັກແຫຼ່ງຂອງເມືອງ ເຊິ່ງກ່ອນອື່ນ, ທ່ານກໍ່ໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມໃນໄລຍະຜ່ານມາ ແລະການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກຢູ່ຂັ້ນເມືອງໂດຍສັງເຂບ ຕໍ່ຈາກນັ້ນ, ທ່ານ ບຸນໂຈມ ອຸບົນປະເສີດ ກໍ່ໄດ້ກ່າວແນະນຳໃນຫຼາຍບັນຫາສຳຄັນຕໍ່ຄະນະນຳຂອງເມືອງວິລະບູລີ ໃນນີ້, ໄດ້ເນັ້ນໜັກສຳຄັນໃນວຽກງານປັບປຸງຮາກຖານການເມືອງ ໃຫ້ມີຄວາມໜັກແໜ້ນເຂັ້ມແຂງ ໂດຍສະເພາະໃນຂັ້ນບ້ານ ແລະກຸ່ມບ້ານ ເພື່ອຕີຖອຍປະກົດການຫຍໍ້ທໍ້ຕ່າງໆໃນສັງຄົມ ເຮັດໃຫ້ການຈັດຕັ້ງປະຕິບັດແນວທາງນະໂຍບາຍຂອງພັກ-ລັດທີ່ວາງອອກໃນແຕ່ລະໄລຍະມີຜົນສຳເລັດ ພ້ອມດຽວກັນນີ້, ກໍ່ໃຫ້ຄະນະພັກເມືອງ ພ້ອມກັນສ້າງຂະບວນການທີ່ພົ້ນເດັ່ນ ກໍ່ຄືການສ້າງເມືອງວິລະບູລີ ໃຫ້ເປັນເມືອງພົ້ນທຸກ, ສ້າງ 2 ບ້ານທີ່ຍັງທຸກຍາກ(ບ້ານກະຫຼາຍ ແລະບ້ານນາກະຊິນ)ໃຫ້ພົ້ນທຸກ ແລະສ້າງບ້ານພັດທະນາໃຫ້ໄດ້ຕື່ມອີກ 7 ບ້ານ ໂດຍສູ້ຊົນໃຫ້ບັນລຸໃຫ້ໄດ້ໃນທ້າຍປີ 2024 ຊຶ່ງເປັນຜົນງານທີ່ຍິ່ງໃຫຍ່ໄວ້ຕ້ອນຮັບກອງປະຊຸມໃຫຍ່ອົງຄະນະພັກເມືອງ ທີ່ຈະໄຂຂຶ້ນໃນປີ 2025ນີ້.

 

ໃນການລົງເຄື່ອນໄຫວຄັ້ງນີ້, ທ່ານ ບຸນໂຈມ ອຸບົນປະເສີດ ຍັງໄດ້ລົງຕິດຕາມ, ຊຸກຍູ້ການພັດທະນາຫໍມູນເຊື້ອວິລະຊົນບ້ານນ້ຳປະເຄນ, ລົງເບິ່ງການກໍ່ສ້າງເສັ້ນທາງພາຍໃນບ້ານ, ຢ້ຽມຢາມ-ໃຫ້ກຳລັງໃຈແພດ-ໝໍ ກໍ່ຄືຄົນເຈັບໃນໂຮງໝໍນ້ອຍ, ຕິດຕາມເບິ່ງການຕໍ່ເຕີມຫ້ອງການ ແລະການສ້ອມແປງໂຮງຮຽນປະຖົມສົມບູນຂອງບ້ານ ໃນໂອກາດນີ້, ທ່ານເຈົ້າແຂວງ ກໍ່ຍັງໄດ້ມອບທຶນຮອນຈຳນວນໜຶ່ງເພື່ອຊຸກຍູ້ວຽກງານລວມຂອງບ້ານວິລະຊົນນ້ຳປະເຄນ. ວາລະຕໍ່ມາ, ທ່ານ ບຸນໂຈມ ອຸບົນປະເສີດ ໄດ້ໄປຢ້ຽມຢາມສວນວັດທະນະທຳເຜົ່າຜູ້ໄທພາຍໃນຕົວເມືອງວິລະບູລີ ໃນນີ້ລວມມີ: ເຮືອນຜູ້ໄທ, ສິລະປະ-ວັດທະນະທຳ ແລະເຄື່ອງນຸ່ງຂອງຊົນເຜົ່າຜູ້ໄທ ແລະຍັງໄດ້ຕິດຕາມເບິ່ງພື້ນຖານການລະຜິດສຳຄັນອື່ນໆພາຍໃນເມືອງວິລະບູລີຕື່ມອີກ.