ບໍລິສັດ ພູເບ້ຍ ມາຍນິງ ຈັດກອງປະຊຸມທົບທວນວຽກງານຫົກເດືອນກັບລັດຖະບານຂັ້ນແຂວງ ແລະ ສູນກາງ

ບໍລິສັດ ພູເບ້ຍ ມາຍນິງ ຈັດກອງປະຊຸມທົບທວນວຽກງານຫົກເດືອນຄັ້ງທີໜຶ່ງຂອງປີ 2024 ກັບລັດຖະບານລາວໃນວັນທີ 5 ມິຖຸນາຜ່ານມາ ຢູ່ໂຮງແຮມ ແລນມາກ ແມ່ຂອງ ຣີເວີໄຊ, ນະຄອນຫຼວງວຽງຈັນ. ຈຸດປະສົງຂອງກອງປະຊຸມແມ່ນເພື່ອສືບຕໍ່ປຶກສາຫາລືແບບສອງສົ້ນຮ່ວມກັນລະຫວ່າງບໍລິສັດ ພູເບ້ຍ ມາຍນິງ ແລະ ລັດຖະບານລາວ ກ່ຽວກັບເນື້ອໃນສໍາຄັນຂອງຜົນປະໂຫຍດຮ່ວມກັນ.

ກອງປະຊຸມດັ່ງກ່າວ ໄດ້ຕ້ອນຮັບພະນັກງານຈາກພາກລັດຂັ້ນແຂວງ ແລະ ຂັ້ນສູນກາງ ຈາກສໍານັກງານນາຍົກລັດຖະມົນຕີຈໍານວນ 50 ຄົນ, ກະຊວງແຜນການ ແລະ ການລົງທຶນ, ກະຊວງພະລັງງານ ແລະ ບໍ່ແຮ່, ກະຊວງການເງິນ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງໂຍທາທິການ ແລະ ຂົນສົ່ງ ແລະ ກະຊວງປ້ອງກັນປະເທດ. ນອກຈາກນັ້ນ, ອໍານາດການປົກຄອງຈາກແຂວງໄຊສົມບູນ ແລະ ແຂວງຊຽງຂວາງ ແລະ ທ່ານ ໄຊນະຄອນ ອິນທະວົງ, ຮອງລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ພ້ອມກັບທ່ານ ສະຕີບ ຈິມໂປ, ຜູ້ອໍານວຍການບໍລິສັດ ພູເບ້ຍ ມາຍນິງ  ກໍ່ເຂົ້າຮ່ວມກອງປະຊຸມໃນຄັ້ງນີ້.

ທ່ານ ທອງພັດ ອິນທະວົງ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່; ທ່ານ ດາລິງ ເຊັງ, ຜູ້ອໍານວຍການ ແລະ ປະທານບໍລິຫານຂອງບໍລິສັດ ແພນອອສ໌ ແລະ ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ ໄດ້ກ່າວຕ້ອນຮັບຜູ້ເຂົ້າຮ່ວມກອງປະຊຸມໝົດທຸກຄົນ. 

ຕະຫຼອດໄລຍະການປະຊຸມເຄິ່ງມື້, ບໍລິສັດໄດ້ໃຫ້ຜູ້ເຂົ້າຮ່ວມຮັບຊົມວີດີໂອຄວາມຍາວ 20 ນາທີ ກ່ຽວກັບການດໍາເນີນງານລະດັບໂລກຂອງບໍລິສັດ ແລະ ການດໍາເນີນການຂຸດຄົ້ນຢູ່ລາວ ທີ່ຊະນະເລີດລາງວັນຕ່າງໆ. ຜູ້ເຂົ້າຮ່ວມຍັງໄດ້ຮັບຟັງກ່ຽວກັບການປະກອບສ່ວນຂອງບໍລິສັດ ທາງດ້ານການເງິນ ແລະ ເສດຖະກິດໃຫ້ແກ່ແຂວງໄຊສົມບູນ ແລະ ລັດຖະບານຂັ້ນສູນກາງ, ແລະການພັດທະນາຊຸມຊົນ, ໂຄງການປັບປຸງຊີວິດການເປັນຢູ່ຂອງບໍລິສັດ ທີ່ຜ່ານການສົມທຽບມາດຕະຖານການປະເມີນລະດັບສາກົນ. ຕົວແທນຂອງບໍລິສັດ ພູເບ້ຍ ມາຍນິງ ຍັງໄດ້ນໍາສະເໜີໃຫ້ເຫັນຄວາມເປັນເລີດດ້ານການດໍາເນີນງານທີ່ເຂັ້ມແຂງ, ຄວາມປອດໄພ ແລະ ຄວາມເອົາໃຈໃສ່ດ້ານສິ່ງແວດລ້ອມ ຊຶ່ງພາໃຫ້ບໍລິສັດໄດ້ຮັບໃບຢັ້ງຢືນປະເພດດີເດັ່ນ ‘A’ ຈາກກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ສໍາລັບການຄຸ້ມຄອງ ແລະ ຕິດຕາມກວດກາດ້ານສິ່ງແວດລ້ອມໃນປີ 2024.​

ຫຼັງຈາກນັ້ນກອງປະຊຸມ ຍັງເປີດໂອກາດໃຫ້ບໍລິສັດ ພູເບ້ຍ ມາຍນິງ ແລະ ລັດຖະບານຂັ້ນແຂວງ ແລະ ຂັ້ນສູນກາງ ສາມາດປຶກສາຫາລືຫຼາຍບັນຫາທີ່ຈໍາເປັນຕ້ອງໄດ້ຮັບການແກ້ໄຂ ເພື່ອຊ່ວຍບໍລິສັດບັນລຸເປົ້າໝາຍໃນການເຕີບໂຕ ແລະ ການພັດທະນາທີ່ມຸ້ງໝັ້ນໃຫ້ຜົນປະໂຫຍດແກ່ລັດຖະບານ ແລະ ປະຊາຊົນລາວ.

ທ່ານ ດາລິງ ເຊັງ, ຜູ້ອໍານວຍການ ແລະ ປະທານບໍລິຫານຂອງບໍລິສັດ ແພນອອສ໌, ໄດ້ກ່າວຢໍ້າເປົ້າໝາຍໄລຍະຍາວຂອງຜູ້ຖືຮຸ້ນຂອງບໍລິສັດ ແພນອອສ໌ ເພື່ອສືບຕໍ່ດໍາເນີນການຂຸດຄົ້ນຂອງພວກເຂົາຢູ່ລາວ.

ທ່ານ ດາລິງ ເຊັງ ກ່າວວ່າ “ໃນນາມຜູ້ຖືຮຸ້ນຂອງບໍລິສັດ ແພນອອສ໌, ກວ່າງດົງ ຣາຍຊິງ ໂຮລດິງ ກຼຸບ (GDRH), ພວກເຮົາມີຄວາມພ້ອມທີ່ຈະສະໜັບສະໜູນໂຄງການເຕີບໂຕຕ່າງໆຂອງບໍລິສັດ ພູເບ້ຍ ມາຍນິງຢູ່ລາວ ແລະ ຮ່ວມມືກັບພາກລັດໃນທຸກຂັ້ນ.

ຄະນະຕົວແທນຂອງ GDRH ຊຶ່ງນໍາໂດຍທ່ານ Lyn Yongzhong, ປະທານກຸ່ມລັດວິສາຫະກິດ GDRH ແລະ ຍັງເປັນເລຂາທິການພັກແຂວງກວ່າງຕຸ້ງ, ໄດ້ເດີນທາງມາຢ້ຽມຢາມລາວໃນເດືອນເມສາຜ່ານມາ ແລະ ເຂົ້າພົບພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ເພື່ອສ້າງສາຍພົວພັນທີ່ເຂັ້ມແຂງລະຫວ່າງສປ ຈີນ ກັບ ລາວ. ການຢ້ຽມຢາມໃນຄັ້ງນີ້ ເປັນຂໍ້ພິສູດໃຫ້ເຫັນການຮ່ວມມືຕໍ່ເນື່ອງ ແລະ ມີອະນາຄົດທີ່ດີຮ່ວມກັນລະຫວ່າງສອງຊາດ. ບໍລິສັດ ແພນອອສ໌ ແລະ ບໍລິສັດ ພູເບ້ຍ ມາຍນິງ ຢໍ້າຈຸດຢືນເປົ້າໝາຍຂອງ GDRH ເພື່ອສືບຕໍ່ສົ່ງເສີມການພັດທະນາເສດຖະກິດ-ສັງຄົມ ແລະ ປະກອບສ່ວນເຂົ້າໃນຄວາມຈະເລີນຮຸ່ງເຮືອງຂອງລາວ.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ, ໃຫ້ຮູ້ຕື່ມອີກວ່າ “ກອງປະຊຸມຍັງຊ່ວຍໃຫ້ບໍລິສັດ ພູເບ້ຍ ມາຍນິງ ແລະ ພາກລັດໃນທຸກຂັ້ນ ສາມາດຈັດບູລິມະສິດດ້ານຕ່າງໆທີ່ສໍາຄັນໃນການຮ່ວມມືອັນເຂັ້ມແຂງຂອງພວກເຮົາ, ເລັ່ງພັດທະນາບໍ່ຂຸດຄົ້ນໃໝ່ ແລະ ບັນລຸການປຶກສາຫາລືກ່ຽວກັບບັນຫາທີ່ຄົງຄ້າງຕ່າງໆ.”

แชร์