ສະຫຼຸບແຜນພັດທະນາກີລາ-ກາຍະກຳ

   ໃນວັນທີ 20 ທັນວາ 2018 ທີ່ຫ້ອງປະຊຸມພະແນກສຶກສາທິການແລະກີລາແຂວງໄຊຍະບູລີກົມກີລາມວນຊົນກະຊວງສຶກສາທິການແລະກີລາໄດ້ຈັດກອງປະຊຸມສະຫຼຸບຕີລາຄາຜົນສຳເລັດການຈັດຕັ້ງປະຕິບັດແຜນພັດທະນາກີລາກາຍະກຳມວນຊົນທົ່ວປະເທດປະຈຳປີ 2018 ໂດຍໃຫ້ກຽດເຂົ້າຮ່ວມຂອງທ່ານນາງບຸນພັກອິນທະປັນຍາຮອງເຈົ້າແຂວງໄຊຍະບູລີ, ທ່ານສີທາດຈັນທະບູລີຫົວໜ້າກົມກີລາມວນຊົນກະຊວງສຶກສາທິການແລະກີລາ, ມີບັນດາຫົວໜ້າກົມ, ຮອງກົມອ້ອມຂ້າງກະ ຊວງ, ຫົວໜ້າ, ຮອງຫົວໜ້າພະແນກສຶກສາທິການແລະກີລາທົ່ວປະເທດພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

  ທ່ານນາງບຸນພັກອິນທະປັນຍາຮອງເຈົ້າແຂວງໄຊຍະບູລີກໍ່ໄດ້ກ່າວວ່າ: ວຽກງານກີລາ-ກາຍະກຳມວນຊົນແມ່ນວຽກໜຶ່ງທີ່ສຳຄັນຕໍ່ກັບການພັດທະນາຊັບພະຍາກອນມະນຸດທີ່ພັກ-ລັດຖະບານໄດ້ກຳນົດໄວ້ເພື່ອເຮັດໃຫ້ມວນຊົນທຸກເພດ, ທຸກໄວໄດ້ປະກອບສ່ວນເຂົ້າໃນການຫັດກາຍຍະບໍລິຫານ, ອອກກຳລັງກາຍ, ການຫຼິ້ນກີລາເພື່ອສຸຂະພາບ, ຄວາມເບີກບານມ່ວນຊື່ນແລະພ້ອມພາກັນຈັດຕັ້ງປະຕິບັດຜັນຂະຫຍາຍບັນດາ 7 ຄາດໝາຍຕົວຊີ້ບອກແລະແຜນຈຸດສຸມໃນການສ້າງຂະບວນການຈັດກິດຈະກຳການແຂ່ງຂັນກີລາແຕ່ລະປະເພດໃຫ້ເປັນຂະບວນ.

  ຈາກນັ້ນທ່ານສີທາດຈັນທະບູລີ ເປັນຫົວໜ້າກົມກີລາມວນຊົນ ກະຊວງສຶກສາທິການ ແລະກີລາທີ່ໄດ້ຂຶ້ນຜ່ານບົດສະຫຼຸບລາຍງານ ວຽກງານກີລາ-ກາຍະກໍາມວນຊົນປະຈຳປີ 2018 ແລະແຜນຈຸດສຸມປະຈຳປີ  2019  ໃຫ້ຮູ້ວ່າ: ຕະຫຼອດເວລາໄລຍະທີ່ຜ່ານມາການເຄື່ອນ ໄຫວຈັດກິດຈະກຳ, ການແຂ່ງຂັນກີລາ-ກາຍະກໍາມວນຊົນປະຈຳປີ, ງານບຸນປະເພນີແລະວັນບຸນສຳຄັນຕ່າງຂອງຊາດແລະສາກົນໃນທົ່ວປະເທດມີມວນຊົນເຂົ້າຮ່ວມທັງໝົດ 1,4 ລ້ານກວ່າຄົນ ເທົ່າກັບ 22% ຂອງພົນລະເມືອງລາວທັງໝົດ, ອັດຕາການສົ່ງເສີມການເຄື່ອນໄຫວສະໂມສອນກີລາຂັ້ນ ເມືອງມີ  27 ແຫ່ງ, ຂັ້ນບ້ານ 1.531 ແຫ່ງ, ບັນລຸໄດ້ 18% ໃນທົ່ວປະ ເທດ.

   ພ້ອມນັ້ນໃນກອງປະຊຸມບັນດາ ຫົວໜ້າພະແນກ,ຕາງໜ້າຫົວໜ້າພະແນກສຶກສາທິການແລະກີລາແຕ່ລະແຂວງກໍ່ໄດ້ຂຶ້ນຜ່ານບົດສະຫຼຸບລາຍງານການຊີ້ນຳນຳພາການຈັດຕັ້ງປະຕິບັດແຜນພັດທະນາກີລາ-ກາຍະກຳມວນຊົນປະຈຳປີ 2018 ແລະແຜນຈຸດສຸມປະຈຳປີ 2019 ຂອງແຕ່ລະແຂວງ, ພ້ອມທັງປະກອບຄຳຄິດຄຳເຫັນໃສ່ບົດສະຫຼຸບດັ່ງກ່າວເພື່ອພ້ອມກັນຈັດຕັ້ງປະຕິບັດແລະພັດທະນາກີລາ-ກາຍະກຳມວນຊົນຂອງລາວເຮົາໃຫ້ດີຂຶ້ນເປັນກ້າວໆ.

 

แชร์