ມອບ-ຮັບ ແລະ ເປີດການນໍາໃຊ້ ເວບໄຊໃໝ່ ຂອງໜັງສືພິມປະຊາຊົນ
ການພົວພັນຮ່ວມມື ລະຫວ່າງ ໜັງສືພິມ ປະຊາຊົນ ສຽງຂອງສູນກາງພັກປະຊາຊົນປະຕິວັດລາວ ແລະ ໜັງສືພິມ ເຢິນເຢິນ ສຽງຂອງສູນກາງພັກ-ລັດ ແລະ ປະຊາຊົນຫວຽດນາມ ນັບມື້ແຕກດອກອອກຜົນ ຊຶ່ງໃນວັນທີ 7 ມິຖຸນານີ້ ທີ່ສຳນັກງານໜັງສືພິມປະຊາຊົນ ສະຫາຍ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ) ຫົວໜ້າບັນນາທິການໃຫຍ່ ໜັງສືພິມປະຊາຊົນ ພ້ອມຄະນະ ໄດ້ພົບປະສອງຝ່າຍກັບ ສະຫາຍ ເລ ກວັກ ມິງ ກໍາມະການສູນກາງພັກກອມມູນິດຫວຽດນາມ ຫົວໜ້າບັນນາທິການໃຫຍ່ ໜັງສືພິມ ເຍິນເຢິນ ຮອງຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ ປະທານສະມາຄົມນັກຂ່າວ ຫວຽດນາມ ພ້ອມຄະນະ.
.
ໃນພິທີພົບປະສອງຝ່າຍ, ສະຫາຍ ວັນໄຊ ຕະວິນຍານ ໄດ້ກ່າວຕ້ອນຮັບການມາຢ້ຽມຢາມ ຢ່າງເປັນທາງການ ຂອງຄະນະຜູ້ແທນຂັ້ນສູງຂອງ ໜັງສືພິມ ເຍິນເຢິນ ສສ ຫວຽດນາມ ນໍາໂດຍ ສະຫາຍ ເລ ກວັກ ມິງ ຊຶ່ງສະແດງໃຫ້ເຫັນເຖິງຄວາມສາມັກຄີຮັກແພງ ອັນສະໜິດສະໜົມ, ເປັນການເສີມຂະຫຍາຍມູນເຊື້ອຄວາມສາມັກຄີແບບພິເສດ, ການພົວພັນຮ່ວມມືຮອບດ້ານ ລະຫວ່າງ ສອງພັກ-ສອງລັດ ປະຊາຊົນສອງຊາດ ລາວ-ຫວຽດນາມ ທີ່ມີມາແຕ່ດົນນານໃຫ້ໝັ້ນຄົງທະນົງແກ່ນຕະຫລອດໄປ ເວົ້າລວມ, ເວົ້າສະເພາະ ການພົວພັນຮ່ວມມື ລະຫວ່າງ ໜັງສືພິມ ປະຊາຊົນ ແລະ ໜັງສືພິມ ເຍິນເຢິນ ສສ ຫວຽດນາມ ໃຫ້ນັບທື້ແຕກດອກອອກຜົນຍິ່ໆຂຶ້ນ.
.
ສອງຝ່າຍ ໄດ້ແຈ້ງໃຫ້ກັນຊາບ ກ່ຽວກັບສະພາບລວມດ້ານການຈັດຕັ້ງ ແລະ ການເຄື່ອນໄຫວວຽກງານຂອງໜັງສືພິມໃນໄລຍະຜ່ານມາ ທັງຂໍ້ສະດວກ, ຂໍ້ຫຍຸ້ງຍາກ ແລະສິ່ງທ້າທາຍ. ສອງຝ່າຍຍັງໄດ້ທົບທວນຄືນການພົວພັນຮ່ວມມືກັນໃນໄລຍະຜ່ານມາ, ໂດຍສະເພາະການຮ່ວມມືຊ່ວຍຍົກລະດັບດ້ານວິຊາການ ແລະ ການປັບປຸງເວບໄຊຂອງໜັງສືພິມປະຊາຊົນຈົນສຳເລັດ ພ້ອມມອບ-ຮັບ ແລະ ເປີດນໍາໃຊ້ໃນຄັ້ງນີ້; ພ້ອມນີ້, ສອງຝ່າຍຍັງໄດ້ແລກປ່ຽນບົດຮຽນເຊິ່ງກັນ ແລະ ກັນ, ແລກປ່ຽນຂໍ້ມູນຂ່າວ ຂອງແຕ່ລະປະເທດ ເພື່ອໝູນໃຊ້ເຂົ້າໃນການປະຕິບັດໜ້າທີ່ວຽກງານ ໃຫ້ສອດຄ່ອງກັບສະພາບຄວາມເປັນຈິງຂອງແຕ່ລະປະເທດ ແລະ ຍັງໄດ້ປຶກສາຫາລືບາງວຽກງານ, ບາງກິດຈະກໍາ ເພື່ອຮັດແໜ້ນ ແລະ ເສີມຂະຫຍາຍຄວາມສາມັກຄີ ລະຫວ່າງສອງໜັງສືພິມ. ໃນໂອກາດນີ້, ທ່ານ ວັນໄຊ ຕະວິນຍານ ໄດ້ສະເໜີກ່ຽວກັບການຈັດຊຸດຝຶກອົບຮົມດ້ານຕ່າງໆ ໂດຍສະເພາະການສົ່ງພະນັກງານ-ນັກຂ່າວ ໄປຝຶກອົບຮົມຢູ່ ສສ ຫວຽດນາມ.
.
ໂອກາດດຽວກັນ, ສະຫາຍ ເລ ກວັກ ມິງ ກໍໄດ້ແຈ້ງສະພາບການຂອງການເຄື່ອນໄຫວວຽກງານຂອງໜັງສືພິມ ເຍິນເຢິນ, ພ້ອມທັງສະແດງຄວາມຍິນດີ ແລະ ຫວັງວ່າຈະໄດ້ຕ້ອນຮັບຄະນະຈາກໜັງສືພິມປະຊາຊົນ ກໍຄືພະນັກງານ-ນັກຂ່າວ ເພື່ອໄປຝຶກອົບຮົມຢູ່ ສສ ຫວຽດນາມ ຊຶ່ງຈະເຮັດໃຫ້ໄດ້ຮັບຜົນໃນການຍົກສູງຄວາມສາມາດດ້ານຕ່າງໆ ໄດ້ຢ່າງວ່ອງໄວ. ສະເພາະການມອບ-ຮັບ ແລະ ເປີດນໍາໃຊ້ ເວັບໄຊ ໃນມື້ນີ້, ຈະໃຫ້ມີປະສິດທິພາບ ແລະ ປະສິດທິຜົນເພີ່ມຂຶ້ນ ສອງຝ່າຍເຮົາຕ້ອງມີການພົວພັນຮ່ວມມື, ແລກປ່ຽນກັນຢ່າງເປັນປົກກະຕິ ໂດຍສະເພາະ ພະນັກງານ-ນັກຂ່າວ ຈະຕ້ອງໄດ້ຝຶກອົບຮົມໂດຍກົງ. ຜ່ານມາ, ໜັງສືພິມ ເຍິນເຢິນ ກໍໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ໜັງສືພິມປະຊາຊົນ ດ້ານຕ່າງໆ ຫຼາຍໆຄັ້ງ, ເທື່ອນີ້ ເປັນການສະໜັບສະໜູນດ້ານລະບົບເວບໄຊ ຄັ້ງທໍາອິດ. ນອກນີ້, ກໍຍັງໃຫ້ຄໍາໝັ້ນສັນຍາວ່າ: ເຫັນດີເປັນເອກະພາບໃນການຮ່ວມມືຊ່ວຍເຫຼືອການປັບປຸງເນື້ອໃນ ແລະ ວັດຖຸອຸປະກອນ ເພາະໜັງສືພິມປະຊາຊົນ ແລະ ໜັງສືພິມເຍິນເຢິນ ມີການພົວພັນຮ່ວມມືທີ່ເປັນມູນເຊື້ອ ມາແຕ່ດົນນານແລ້ວ.
.
ຫຼັງພິທີພົບປະ, ສະຫາຍ ວັນໄຊ ຕະວິນຍານ ແລະ ສະຫາຍ ເລ ກວັກ ມິງ ກໍໄດ້ພ້ອມກັນລົງນາມໃນຂໍ້ຕົກລົງການຮ່ວມມື ລະຫວ່າງ ສອງໜັງສືພິມ ເພື່ອສືບຕໍ່ຮັດແໜ້ນມູນເຊື້ອການພົວພັນຮ່ວມມືຂອງສອງຝ່າຍ ເພື່ອແນໃສ່ຊຸກຍູ້ການພົວພັນຮ່ວມມືໃນວຽກງານໂຄສະນາ, ການຮ່ວມມືໃນຂົງເຂດສື່ມວນຊົນ ທັງເປັນການປະກອບສ່ວນ ເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງປະເທດ ລາວ - ຫວຽດນາມ. ຂໍ້ຕົກລົງການຮ່ວມມືສະບັບນີ້, ມີຜົນສັກສິດນັບແຕ່ວັນລົງນາມ ແລະ ມີຜົນບັງຄັບໃຊ້ເປັນເວລາ 5 ປີ, ສາມາດຕໍ່ອາຍຸດໄດ້ 5 ປີ ຕາມການຕົກລົງເຫັນດີຂອງສອງຝ່າຍ.
ຫຼັງຈາກນັ້ນ ທັງສອງຝ່າຍ ໄດ້ເຂົ້າຮ່ວມພິທີມອບ-ຮັບ ແລະ ເປີດການນໍາໃຊ້ເວບໄຊ ປັບປຸງໃໝ່ ຂອງໜັງສືພິມປະຊາຊົນ ໂດຍມີ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ເລ ກວັກ ມິງ, ສະຫາຍວັນໄຊ ຕະວິນຍານ ຮ່ວມກົດປຸ່ມເພື່ອເປີດນໍາໃຊ້ເວບໄຊຢ່າງເປັນທາງການ.
ໂອກາດມອບ-ຮັບເວບໄຊ, ສະຫາຍ ເລ ກວັກ ມິງ ໄດ້ກ່າວວ່າ: ປັດຈຸບັນການພັດທະນາທາງດ້ານເອເລັກໂຕຣນິກ ຫັນເປັນທັນສະໄໝຂອງສື່ມວນຊົນ ແມ່ນມີຄວາມສໍາຄັນ ເພື່ອໂຄສະນາແນວທາງນະໂຍບາຍຂອງພັກ, ລັດຖະບານ ໃຫ້ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງໃຫ້ທົ່ວເຖິງ; ການຊ່ວຍເຫຼືອປັບປຸງເວບໄຊໃໝ່ ໃຫ້ແກ່ໜັງສືພິມປະຊາຊົນ ເປັນການປະຕິບັດຕາມການຊີ້ນໍາ ຄໍາໝັ້ນສັນຍາ ທີ່ໜັງສືພິມເຍິນເຢິນເຄີຍໃຫ້ໄວ້ກັບສະຫາຍ ຫົວໜ້າໂຄສະນາສຶກສາ ສູນກາງພັກກອມມິນິດຫວຽດນາມ ແລະ ຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ມາຮອດມື້ນີ້ ຄໍາໝັ້ນສັນຍາດັ່ງກ່າວໄດ້ເປັນຈິງ.
.
ສະຫາຍ ເລ ກວັກ ມິງ ກ່າວອີກວ່າ: ພິທີມອບ-ຮັບຄັ້ງນີ້, ບໍ່ໄດ້ໝາຍເຖິງການສິ້ນສຸດໂຄງການຊ່ວຍເຫຼືອ ແຕ່ຍັງຈະສືບຕໍ່ກໍ່ສ້າງທາງດ້ານເຕັກນິກ ແລະພະນັກງານ-ນັກຂ່າວ ໜັງສືພິມຕໍ່ໄປ.
ສະຫາຍ ວັນໄຊ ຕະວິນຍານ ໄດ້ກ່າວສະແດງຄວາມຂອບໃຈຕໍ່ໜັງສືພິມ ເຍິນເຢິນ, ພ້ອມທັງໃຫ້ຄໍາໝັ້ນສັນຍາວ່າ ຈະເອົາໃຈໃສ່ຄຸ້ມຄອງ ນໍາໃຊ້ເວບໄຊ ດັ່ງກ່າວນີ້ ໃຫ້ດີ ແລະ ໃຫ້ເກີດປະໂຫຍດສູງສຸດ.
.
ເວບໄຊ ປັບປຸງໃໝ່ ຂອງໜັງສືພິມປະຊາຊົນ ເປັນການນໍາໃຊ້ລະບົບຊ໊ອບແວຣ໌ ທີ່ທັນສະໄໝທີ່ສຸດ ເມື່ອທຽບກັບບັນດາອົງການສື່ມວນຊົນຂອງລາວ ຊຶ່ງມີລັກສະນະຮອງຮັບການເປີດກວ້າງ ແລະ ຂະຫຍາຍຕົວໃນອະນາຄົດ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງສື່ມວນຊົນທີ່ທັນສະໄໝ ແລະ ດ້ານຂໍ້ມູນຕ່າງໆ ໂດຍໃຊ້ລະບົບຈັດການເນື້ອຫາສະລະ CMS (Content Management System) ທີ່ຕິດຕັ້ງເວບໄຊລະບົບເບຕາ (Beta) ຊຶ່ງເປັນການຍົກສູງຄຸນນະພາບການຈັດວາງເນື້ອໃນ, ຮູບພາບ ໃນຮູບແບບຕ່າງໆຢູ່ໜ້າເວບໄຊ ໃຫ້ມີສີສັນໂດດເດັ່ນ ເປັນເອກະລັກ ເພື່ອດຶງດູດຜູ້ເຂົ້າຊົມເຂົ້າອ່ານ.
.
ພາຍຫຼັງມອບ-ຮັບ ແລະ ເປີດການນໍາໃຊ້, ໜັງສືພິມປະຊາຊົນ ມີສິດຄຸ້ມຄອງ ແລະ ເຄື່ອນໄຫວທັງໝົດ; ໃນກໍລະນີທີ່ຈໍາເປັນໃນການແກ້ໄຂບັນຫາກ່ຽວກັບເວບໄຊ, ບັນດາຊ່ຽວຊານ ໜັງສືພິມເຍິນເຢິນ ຈະດໍາເນີນການສະໜັບສະໜູນແບບທາງໄກ ຫຼື ມາລາວ ເພື່ອຊ່ວຍແກ້ໄຂໂດຍກົງ.
