ໃນມື້ວັນທີ 5 ມິຖຸນາ 2024 ບໍລິສັດລ້ານຊ້າງມີເນໂຣນສ໌ ຈຳກັດ (LXML) ໂດຍການຮ່ວມມືກັບອໍານາດການປົກຄອງເມືອງວິລະບູລີ ແລະຊຸມຊົນທ້ອງຖິ່ນໄດ້ສ້າງຂະບວນການປູກຕົ້ນໄມ້ໃນວັນສິ່ງແວດລ້ອມໂລກ (WED) ເພື່ອເປັນການຟື້ນຟູ ແລະເສີມສ້າງຄວາມອຸດົມສົມບູນທາງທໍາມະຊາດຢູ່ເຂດປ່າອະນຸລັກຫົວຝາຍນ້ຳນາເຕີ້ ທີ່ສອດຄ່ອງຕາມການຈັດຕັ້ງປະຕິບັດຂອງສາກົນໃນການສົ່ງເສີມການປົກປັກຮັກສາ ແລະ ການອະນຸລັກສິ່ງແວດລ້ອມ ພາຍໃຕ້ຄໍາຂັວນ:"ຮ່ວມກັນຢຸດທຳລາຍປ່າໄມ້, ຢຸດຈູດປ່າແບບຊະຊາຍເພື່ອຟື້ນຟູດິນ, ຕ້ານໄພແຫ້ງແລ້ງ ແລະ ນ້ຳຖ້ວມ"

.

ເຂດອານຸລັກປ່າຫົວຝາຍນາເຕີ້ ຕັ້ງຢູ່ຫ່າງຈາກບໍ່ຄໍາ-ທອງ ເຊໂປນປະມານ 50 ກິໂລແມັດສະຖານທີ່ດັ່ງກ່າວມີຄວາມສຳຄັນທາງດ້ານສັງຄົມ ແລະ ນິເວດວິທະຍາ ໃຫ້ແກ່ອຳນາດການປົກຄອງເມືອງວິລະບູລີແລະຊຸມຊົນທ້ອງຖິ່ນອ້ອມຂ້າງ, ພື້ນທີ່ດັ່ງກ່າວແມ່ນສະຖານທີ່ທ່ອງທ່ຽວທີ່ສຳຄັນແຕ່ເນື່ອງຈາກໄດ້ຮັບຜົນກະທົບຈາກບາງກິດຈະກຳທາງດ້ານອຸດສາຫະກໍາທີ່ຜ່ານມາແລະເປັນພື້ນທີ່ສ່ຽງໄພຈາກການຂຸດຄົ້ນ ທີ່ອາດເກີດຂຶ້ນໃນອະນາຄົດ. ເພື່ອເຫັນເຖິງຄວາມສໍາຄັນດັ່ງກ່າວ, ພະແນກສິ່ງແວດລ້ອມຂອງບໍລິສັດ LXML ຈຶ່ງໄດ້ຂຶ້ນແຜນສໍາລັບການຟື້ນຟູລະບົບນິເວດຂອງສະຖານທີ່ແຫ່ງນີ້ ໂດຍການບໍລິຈາກເບ້ຍໄມ້ພື້ນເມືອງ ເພື່ອແນ່ໃສ່ປູກຕົ້ນໄມ້ໃຫ້ເປັນປ່າ, ອະນຸລັກທຳມະຊາດ ແລະ ຟື້ນຟູຊີວະນາໆພັນຂອງພື້ນທີ່ດັ່ງກ່າວ.

ເປັນກຽດເຂົ້າຮ່ວມເປັນປະທານຂອງທ່ານວາລິຍະສີຈັນທອງທິບເຈົ້າເມືອງວິລະບູລີ ແລະທ່ານສະໝານອະເນກາຜູ້ອໍານວຍການໃຫຍ່ບໍລິສັດLXML, ທ່ານ ຮອງເຈົ້າເມືອງ, ຮອງຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງສະຫວັນນະເຂດ,ຜູ້ຕາງໜ້າຈາກຄະນະນໍາບໍລິສັດ,ທ່ານ ຄາວ ຣຽກ, ຜູ້ຈັດການດ້ານຄວາມປອດໄພ ແລະ ສິ່ງແວດລ້ອມ, ທ່ານ ເຊນ ລັງດອນ, ຫົວໜ້າອາວຸໂສໜ່ວຍງານສິ່ງແວດລ້ອມ, ມີອຳນາດການປົກຄອງເມືອງ, ພະນັກງານຈາກພາກລັດຖະບານ, ພໍ່ແມ່ປະຊາຊົນຈາກຊຸມຊົນທ້ອງຖິ່ນ, ພະນັກງານສິ່ງແວດລ້ອມເມືອງວິລະບູລີແລະພະນັກງານວິຊາການຂອງບໍລິສັດເຂົ້າຮ່ວມດ້ວຍ.

.

ໃນໂອກາດດັ່ງກ່າວທ່ານ ວາລິຍະສີ ຈັນທອງທິບ ເຈົ້າເມືອງວິລະບູລີ ໄດ້ສະແດງຄວາມຂອບໃຈຢ່າງຈິງໃຈມາຍັງບໍລິສັດ LXML ໂດຍທ່ານໄດ້ກ່າວວ່າ: “ພວກເຮົາຂໍສະແດງຄວາມຂອບໃຈຢ່າງເລິກເຊິ່ງຕໍ່ກັບການປະກອບສ່ວນອັນສຳຄັນຂອງLXML ເຂົ້າໃນການຟື້ນຟູສິ່ງແວດລ້ອມຂອງຊຸມຊົນຂອງພວກເຮົາ. ການອຸທິດຕົນຂອງບໍລິສັດໃນການສະໜັບສະໜູນອະນຸລັກພື້ນທີ່ປ່າຫົວຝາຍນ້ຳນາເຕີ້ແຫ່ງນີ້ບໍ່ພຽງແຕ່ເປັນການຊ່ວຍປັບປຸງລະບບົບນິເວດໃນທ້ອງຖິ່ນເທົ່ານັ້ນ, ແຕ່ຍັງໄດ້ສະແດງເຖິງການເຮັດໜ້າທີ່ເປັນພົນລະເມືອງດີ ທີ່ມີຄວາມຮັບຜິດຊອບຕໍ່ອົງກອນ, ຕໍ່ປະເທດຊາດອີກດ້ວຍ.”

.

ການປະກອບສ່ວນທີ່ສໍາຄັນຂອງLXML ປະກອບມີ ການສະໜອງເບ້ຍໄມ້ເນື້ອແຂງ200 ຕົ້ນ, ການຕຽມຂຸມປູກ,ພິມປ້າຍໂຄສະນາ, ເສື້ອຢືດຈາລຶກວັນສິ່ງແວດລ້ອມໂລກ 2024, ອາຫານ, ນ້ຳດື່ມ, ໄມ້ພາເລດ 600 ຊຸດ ເພື່ອເຮັດຮົ້ວອ້ອມຕົ້ນໄມ້, ພ້ອມດ້ວຍກໍາລັງແຮງງານຈາກບຸກຄາລະກອນຂອງບໍລິສັດເຂົ້າໃນການປູກຕົ້ນໄມ້, ມີການອະນາໄມສະຖານທີ່, ການປູກຈິດສໍານຶກໃຫ້ແກ່ຊຸມຊົນທ້ອງຖິ່ນກ່ຽວກັບການອະນຸລັກປ່າໄມ້ ແລະ ການປະຕິບັດການຄຸ້ມຄອງສິ່ງເສດເຫຼືອ. ທັງໝົດນີ້ໄດ້ສະແດງໃຫ້ເຫັນເຖິງຄວາມມຸ່ງໝັ້ນຢ່າງຕັ້ງໜ້າເຂົ້າໃນການຄຸ້ມຄອງສິ່ງແວດລ້ອມ ຄິດເປັນມູນຄ່າທັງໝົດ 5,000 ໂດລາ ສະຫະລັດ.

.

ທ່ານ ສະໝານ ອະເນກາ, ຜູ້ອໍານວຍການໃຫຍ່ບໍລິສັດLXML ໄດ້ກ່າວ ເຖິງຄວາມສໍາຄັນໃນໂອກາດດັ່ງກ່າວທີ່ມີເນື້ອໃນບາງຕອນວ່າ: "LXML ມີຄວາມພາກພູມໃຈທີ່ໄດ້ຮ່ວມມືກັບການຈັດຕັ້ງເມືອງວິລະບູລີໃນງານສະເຫຼີ່ມສະຫຼອງວັນສິ່ງແວດລ້ອມໂລກອັນສຳຄັນນີ້, "ຂ້າພະເຈົ້າເຊື່ອວ່າ ໂດຍການເຮັດວຽກຮ່ວມກັນ, ພວກເຮົາສາມາດຮັບປະກັນອະນາຄົດອັນເຕັ່ມໄປດ້ວຍຄວາມອຸດົມສົມບູນ ແລະ ຄວາມຍືນຍົງທາງທໍາມະຊາດ ໃຫ້ກັບເຂດອະນຸລັກຫົວຝາຍນາເຕີ້ແລະ ຊຸມຊົນທີ່ອາໄສຢູ່ໃນພື້ນທີ່ແຫ່ງນີ້" ນອກຈາກກິດຈະກໍາປູກຕົ້ນໄມ້ແລ້ວ ກໍ່ຍັງໄດ້ມີຂະບວນການສ້າງກິດຈະກໍາການຖາມ-ຕອບ ເພື່ອສົ່ງເສີມການປູກຈິດສໍານຶກ ແລະ ໃຫ້ຄວາມຮູ້ກ່ຽວກັບການອະນຸລັກສິ່ງແວດລ້ອມທີ່ຍືນຍົງ ນຳອີກດ້ວຍ.

.

ຢູ່LXML ເຊໂປນ, ພວກເຮົາມຸ່ງໝັ້ນທີ່ຈະຫຼຸດຜ່ອນຜົນກະທົບທາງດ້ານສິ່ງແວດລ້ອມ ແລະ ພະຍາຍາມ ຟື້ນຟູທີ່ດິນທີ່ຖືກລົບກວນໃຫ້ກັບຄືນມາສູ່ສະພາບເດີມທີ່ສາມາດນຳໃຊ້ໄດ້. ບູລິມະສິດຂອງພວກເຮົາໃນພື້ນທີ່ນີ້ລວມມີ, ການປ້ອງກັນຜົນກະທົບຂອງສະພາບແວດລ້ອມໃນການດໍາເນີນງານ, ການຮ່ວມກັນຟື້ນຟູຢ່າງກ້າວໜ້າເຂົ້າໃນແຜນການ ແລະ ການດໍາເນີນງານຂອງພວກເຮົາ, ການສົ່ງມອບແນວທາງການປະຕິບັດອຸດສາຫະກໍາທີ່ມີການຟື້ນຟູທີ່ດິນ ແລະ ການປູກພືດເພື່ອທົດແທນ. ນອກນີ້, ພວກເຮົາຍັງໃຫ້ຄວາມສໍາຄັນແກ່ການມີສ່ວນຮ່ວມຂອງຊຸມຊົນ ໃນການລິເລີ່ມດ້ານການປົກປັກຮັກສາສິ່ງແວດລ້ອມຮ່ວມກັບພວກເຮົາ, ເພາະພວກເຮົາເຊື່ອສະເໝີວ່າ ການຮ່ວມມືກັບພາກສ່ວນກ່ຽວຂ້ອງໃນທ້ອງຖິ່ນແມ່ນມີຄວາມສໍາຄັນຕໍ່ກັບຄວາມຍືນຍົງທາງ ດ້ານສິ່ງແວດລ້ອມໃນໄລຍະຍາວ.