ໄຟຟ້າລາວສາຂານະຄອນຫລວງ2 ຊີ້ແຈງບັນຫາໄຟຟ້າບໍ່ພຽງພໍ ໄຟຕົກ ແລະໄຟມອດ

ຈາກກໍະນີທີ່ມີປະຊາຊົນບາງເຂດທີ່ນອນຢູ່ໃນຄວາມຮັບຜິດຊອບຂອງລັດວິສາຫະກິດໄຟຟ້າລາວສາຂານະຄອນຫລວງ 2 ຈົ່ມວ່າກ່ຽວກັບໄຟຟ້າບໍ່ພຽງພໍ ແລະ ມັກເກີດໄຟຕົກ ໄຟມອດ ທີ່ເກີດຂຶ້ນໃນປັດຈຸບັນນີ້.

ທ່ານ ເພັດສະໝອນ ວັນທາ, ຫົວໜ້າລັດວິສາຫະກິດໄຟຟ້າລາວສາຂານະຄອນຫລວງ 2 ໄດ້ຊີ້ແຈງຜ່ານສື່ມວນຊົນວ່າ: ເນື່ອງຈາກປັດຈຸບັນສັງຄົມມີການຂະຫຍາຍຕົວສູງ ເຮັດໃຫ້ຂະ ຫຍາຍເພີ່ມຂື້ນຂອງຈຳນວນຄົວເຮືອນເພີ່ມຂື້ນຢ່າງໄວວາເຮັດໃຫ້ການຊົມໃຊ້ໄຟຟ້າສູງຂື້ນແບບກ່າວກະໂດດ. ລັດວິສາຫະກິດໄຟຟ້າສາຂານະຄອນຫລວງ2 ມີແຜນການ ເຄື່ອນໄຫວສ້ອມແປງ, ປຽ່ນຖ່າຍ ແລະເສີມບັນດາອຸປະກອນຕ່າງໆ ຂອງລະບົບຈຳໜ່າຍໂດຍປະຕິບັດຕາມລຳດັບຂອງການສະເໜີທີ່ສະເໜີເຂົ້າມາຂອງອົງການປົກຄອງບ້ານຕ່າງໆແຕ່ກະຍັງບໍ່ທັນທົ່ວເຖິງເນື່ອງຈາກງົບປະມານຂອງໄຟຟ້າລາວມີຈຳກັດ.

ທ່ານກ່າວຕື່ມວ່າ: ມາຮອດປັດຈຸບັນໄຟຟ້າລາວສາມາດສະໜອງໄຟຟ້າຮັບໃຊ້ພຽງພໍ, ແຕ່ຍ້ອນການຊົມໃຊ້ພະ ລັງງານໄຟຟ້າບາງຈຸດທີ່ຍັງຜິດປົກກະຕິ ຈິ່ງເກີດມີສະພາບໄຟຟ້າບໍ່ພຽງພໍບາງເຂດນັ້ນ ເກີດຈາກການການນຳໃຊ້ພະລັງ ງານໄຟຟ້າບັນທຸກໂຫຼດຫມໍ້ແປງເກີນບໍ່ສາມາດຈ່າຍໄຟໄດ້ພຽງພໍເນື່ອງຈາກອາກາດຮ້ອນອົບເອົ້າ, ການຊົມໃຊ້ໄຟຟ້າເພີ່ມຂຶ້ນຢ່າງກ້າວກະໂດດ, ທາງໄຟຟ້າລາວບໍ່ສາມາດແກ້ໄຂປັບປຸງໄດ້ຢ່າງທັນການເຊີ່ງເປັນເຫດພາວະວິໄສທີ່ບໍ່ສາມາດຫຼີກຫລ່ຽງໄດ້ເມື່ອມີການຊົມໃຊ້ໄຟຫຼາຍກໍເຮັດໃຫ້ອຸປະກອນພາກສາຍສົ່ງ ແລະພາກຈຳໜ່າຍເກີດຄວາມເສຍຫາຍ ແລະເກີດອຸບັດຕິເຫດໄຟຟ້າ ເຊັ່ນ: ຫມໍ້ແປງໄຫມ້ ຫຼືເປເພ່ ສາຍໄຟເປື່ອຍເກີດຊອດລັດວົງຈອນ ແລະອື່ນໆ ເນື່ອງຈາກບັນທຸກໂຫຼດການຊົມໃຊ້ເກີນຂອບເຂດຄວາມສາມາດຮັບໄດ້ຂອງອຸປະກອນພາກຈຳໜ່າຍ.

ອີງຕາມການສະເໜີຂອງລູກຄ້າພາຍໃນນະຄອນຫຼວງວຽງຈັນ ເຫັນວ່າການສະໜອງໄຟບໍ່ພຽງພໍມີທັງໜົດ 110 ຈຸດ ສະເພາະເຂດຮັບຜິດຊອບຂອງ ສາຂານະຄອນ ຫຼວງ2 ມີ 68 ຈຸດ.

ຢ່າງໃດກໍຕາມ, ທ່ານຝາກເຕືອນມາຍັງພໍ່ແມ່ປະຊາຊົນກໍຄືຜູ້ຊົມໃຊ້ໄຟຟ້າຈົ່ງມີສະຕິໃນການຊົມໃຊ້ໄຟຟ້າ, ໃຫ້ໝັ່ນກວດກາ ແລະປ່ຽນຖ່າຍເຄື່ອງໃຊ້ໄຟຟ້າ, ສາຍໄຟທີ່ເກົ່າແກ່ ຫຼືໃຊ້ມາດົນແລ້ວອອກພ້ອມຊົມໃຊ້ພະລັງງານໄຟຟ້າແຕ່ສະເພາະສິ່ງທີ່ຈຳເປັນເພື່ອເປັນການຊ່ວຍກັນຫຼຸດຜ່ອນການໂຫຼດພະລັງງານໄຟ ຟ້າພ້ອມກັນນີ້ຖ້າຫາກຜູ້ຊົມໃຊ້ໄຟຟ້າຫາກພົບເຫັນອຸບັດຕິເຫດດ້ານໄຟຟ້າທີ່ສາມາດແຈ້ງສາຍດ່ວນໄຟຟ້າລາວ ໝາຍເລກ 1199 ຕະຫລອດ 24 ຊົ່ວໂມງ ຫຼືສູນບໍລິການໄຟຟ້າໃກ້ບ້ານເພື່ອຄວາມປອດໄພທາງດ້ານຊີວິດ ແລະຊັບສິນຂອງທ່ານ.

ສໍາລັບລັດວິສາຫະກິດໄຟຟ້າລາວສາຂານະຄອນຫລວງ2 ຮັບຜິດຊອບ 5 ເມືອງນອກຂອງນະຄອນຫລວງວຽງຈັນ ຄື: ໄຊທານີ, ຫາດຊາຍຟອງ, ນາຊາຍທອງ, ສັງທອງ ແລະປາກງື່ມ. ມີຈຳນວນບ້ານທີ່ຄຸ້ມຄອງທັງໝົດ 322 ບ້ານ, ມີລະບົບຈຳໜ່າຍ ທັງໝົດ 10 ສະຖານີ ຄື: ສະຖານີທ່າສະຫວ່າງ, ສະຖານີວຽງແກ້ວ, ສະຖານີໂຄກສະອາດ, ສະຖານີດົງໂພສີ, ສະຖານີທ່ານາແລ້ງ, ສະຖານີນາໄຫ, ສະຖານີວີຕ້າປາກ, ສະຖານີນາຊາຍທອງ, ສະຖານີເພຍລາດ ແລະ ສະຖານີນາບົງ.

แชร์